1 CRÓNICAS 20

1Chay qhepan kaj watapi, reyes maqanakuman llojsej kanku chay tiempopi, Joab wakichikuspa, llojserqa soldadosninwan, amonitaspa jallp'ankutataj q'ararparerqa. Ñawpajman astawan rispataj, Rabá llajtata atipanampaj muyuykorqa. Chayman yaykuspa, raqaykunallataña saqerparerqa. Davidrí Jerusalenpi qhepakorqa. 2Chantá Davidqa reyninkoj umanmanta pilluta orqhorqa, chaytaj valorniyoj rumi k'achanchasniyoj kaspa, kinsa chunka kinsayoj kilos pesarqa. Chay pillutataj Davidpa umanman churaykorqanku. Chaymantá Davidqa chay llajtamanta waj ashkha valorniyoj imastapis orqhollarqataj. 3Chay llajtapi puchorqankuraj, chay runastataj orqhomuytawan, sierraswan, fierro trillanaswan, hachaswan ima trabajacherqanku. Davidqa kikillantataj ruwarqa amonitaspa tukuy llajtasninkuwan. Chaymantataj tukuy soldadosninwan khuska Jerusalenman kutiporqa. 4Aswan qhepaman filisteoswan Gezerpi wañuchinaku maqanaku karqa. Chay kutipeqa usatita Sibecai sutiyojqa jatunkaray runaspa mirayninkumanta kaj Sipai sutiyojta wañurparicherqa, filisteostaj atipasqa karqanku. 5Filisteoswan waj kutipi maqanakuypitaj Jairpa churin Elhanán wañurparicherqa Lahmi sutiyojta. Payqa Gatmanta Goliatpa wawqen karqa. Chay runaj t'ojsina lanzampa pata puntanqa may jatumpuni karqa, awana telarpa k'aspin chhikampuni. 6Gat llajtapeqa waj wañuchinaku maqanaku kallarqataj. Chaypipis uj jatunkaray runa kallarqataj. Payqa iskay chunka tawayoj dedosniyoj karqa, sapa makimpi sojtakama, sapa chakimpipis sojtakama. Paypis jatunkaray runaspa miraynillankumantataj karqa. 7Payqa israelitaspa contrankupi sayaykojtin, Davidpa wawqen Simeaj churin Jonatanqa payta wañurparicherqa. 8Chay jatunkaray runasqa Gatmanta Refaj churisnin karqanku. Paykunata David wañucherqa, jinataj yanapajninkunapis.

will be added

X\