1 Diospa arcanta apaspa, churaykorqanku uj toldo wasiman, David chaypaj ruwachisqa, chayman. Chay ratopacha uywasta wañuchispa q'olacherqanku Diospa ñawpaqempi, jinallataj allinyakuna jaywanastapis. 2 Davidtaj chay imasta Diosman jaywaytawankamaqa, tukuynin Israel aylluta Tata Diospa sutimpi bendecerqa. 3 Tukuynin israelitasman, qharisman, warmismanwan qorqa uj t'antatakama, uj mat'a aychata, uvas k'isamanta ruwasqa uj t'antatapis. 4 Davidqa levitasmanta wakinta ajllaspa, paykunata Diospa arcampa ñawpaqenman churarqa tukuy imata ruwaspa graciasta qonankupaj, yupaychanankupajtaj Israelpa Señornin Tata Diosta. 5 Kamachejninkoqa Asaf karqa, paypa qhepampitaj Zacarías karqa; chaymanta Jeiel, Semiramot, Jehiel, Matatías, Eliab, Benaía, Obed-edom, Jeiel ima karqanku. Paykunaqa tocanasnintin karqanku, salteriosniyoj, arpasniyoj ima. Asafqa platillosta tocarqa. 6 Sacerdotesmantataj Benaiaswan, Jahazielwan cornetasta tocaspalla sayarqanku Diospa arcampa ñawpaqempi. 7 Chay kikin p'unchayllataj Davidqa kamacherqa Asaftawan, chay wawqesnintawan Tata Diosman takinankuta kay takiyta, graciasta Diosman qospa: 8 Tata Diosman graciasta qoychej. Sutinta oqhariychej Diosniykichejpaj rejsikapusqaykichejrayku. Tukuy ayllusman willaraychej ruwasqasninmanta. 9 Paypa sutimpi takiychej takiykunata. Jatuchaj ruwasqasninmanta parlaychej. 10 Sutin may santo kasqanmanta kusirakuychej. Sonqosninkupi kusikuchunku Tata Diosta mask'ajkunaqa. 11 Tata Diosman qayllaykuychej, atiyninman qayllaykuychej; tukuy tiempo Tata Diospa uyanta mask'aychej. 12 Jatuchaj ruwasqasninmanta yuyarikuychej, chay t'ukuna ruwasqasninmantapis. Chay kamachisqasta qosqasninmantapis yuyarikuychej, 13 qankuna Israel kamachimpa ayllunmanta kajkuna, Jacobpa wawasnin, ajllasqa kajkuna. 14 Payqa Señorninchej Tata Dios; Pay kamachin tukuy kay pachata. 15 Waranqa runa mitasñapis pasachunku, manataj jayk'ajpis qonqaponqachu chay trato ruwasqamantaqa. 16 Abrahamwan ruwarqa, chay tratomantaqa, Isaacman jurarqa, chaymantapis mana qonqaponqachu. 17 Chay tratotataj Jacobman kamachisqata jina qorqa, Israelpaj wiñay trato kanampaj: 18 Canaán jallp'ata qosqayki, maychus herenciayki jina chayasunki, chayta, nispa. 19 Paykunaqa pisilla ñan purejkuna jina kaspa, 20 nacionmanta nación purerqanku, reinomanta reino forasteros jina. 21 Chaywampis Dios mana saqerqachu pipis paykunata ñak'arichinanta. Paykunarayku reyestapis k'amerqa kay jinata: 22 Ajllakusqay runasta ama llankhankichejchu, amataj profetasniytapis imanankichejchu, nispa. 23 Tata Diosman takiychej, tukuy kay pachapi tiyakojkuna runas; sapa p'unchay salvacionninmanta willaraychej. 24 Naciones ukhupi willaychej jatun kayninmanta, t'ukuna ruwasqasninmantawan tukuy aylluspa ñawpaqenkupi. 25 Tata Diosqa may jatunmin, mayta yupaychanapaj jinapuni. Payqa tukuy dioskunamanta nisqaqa aswan manchachikuna. 26 Waj nacionesmanta runaspa diosninkukunaqa lantislla kanku. Tata Diostajrí tukuy janaj pachakunata ruwarqa. 27 Ñawpaqempeqa jatun kaynin k'ancharishan. Atiywan, kusiywan ima tiyakunampeqa kashan. 28 Tukuy nacionesmanta ayllus, Tata Diosta yupaychaychej atiyniyoj kasqanman jina, jatun kayninman jinataj. 29 Sutinman jina Tata Diosta jatumpaj qhawaychej; Paypa ñawpaqenman jaywanaykichej kajwan chimpaykuychej. Tata Diosta yupaychaychej may santo kaynimpa k'anchaynimpi. 30 Tukuy kay pachapi kajkuna ñawpaqempi kharkatitichunku. Paymin kay pachatapis sayacherqa mana kuyuchisqa kanampaj. 31 Janaj pachakunapis kay pachapis kusikuchunku. Tukuy nacionesman willachunku: Tata Diosqa rey jina kamachishan, nispa. 32 Mama qocha sonarichun, jinallataj chaypi tukuy kajkunapis. Campopis, tukuy chaypi kajkunawan ima kusikuchunku. 33 Chantá montepi sach'aspis kusiywan takirenqanku Tata Diospa ñawpaqempi, imaraykuchus Payqa kay pachata juzgaj jamushan. 34 Tata Diosman graciasta qoychej, imaraykuchus Payqa may k'achamin, khuyakuynin wiñaypaj kasqanraykutaj. 35 Niychej: Salvawayku Diosniyku; Qanmin salvawajniyku kanki. Naciones ukhumanta tantaykuwayku, makinkumantataj kacharichiwayku. Ajinamanta graciasta qosqayku santo sutiykiman, kusikusqaykutaj Qanta jatunchaspa. 36 Bendecisqa kachun Israelpa Señornin Tata Diosqa wiñay wiñaynintimpaj. Chantá takiyta tukojtinku, tukuynin ayllu kuticherqa: Ajina kachun, nispa. Chantá Tata Diosta yupaycharqanku. 37 Ajinata Davidqa Tata Diospa trato ruwasqan arcaj ñawpaqempi churarqa Asafta wawqesnintawan, chaypi sapa p'unchay imaschus ruwanas kasqanman jina ruwanankupaj. 38 Churallarqataj Obed-edomta, chay sojta chunka pusajniyoj wawqesnintawan, paykunata yanapanankupaj. Punku qhawajkunapajtaj churarqa Jedutunpa churin Obed-edomta, Hosata ima. 39 Sadoctawan, wawqesnin sacerdotestawan churarqa Gabaonpi Dioswan Tinkukuna Toldopi. 40 Paykunaqa Tata Diosman wañuchisqa uywasta chay altarpi Tata Diospaj q'olachinallankupuni karqa paqarimpi, jinataj tardepipis, Tata Diospa leynimpi nisqanman jina. Chayta Tata Diosqa uj kamachisqata jina Israel aylluman saqerqa. 41 Churallarqataj paykunatawan khuskata Hemanta, Jedutunta, chay pikunachus sutisninkumanta ajllasqa karqanku, chaykunatawan, Diosman graciasta qospa takinankupaj khuyakuynenqa wiñaypaj kasqanmanta. 42 Paykunaqa cornetasta, chantá platillosta ima tocaj kanku, waj tocanastawan, Diosman takiykunata takichispa. Jedutunpa churisnenqa punkuta qhawanankupaj churasqa karqanku. 43 Chaymantataj tukuy israelitasqa wasisninkuman kutiporqanku. Davidpis wasinman kutipullarqataj familianta bendecimunampaj.
