1 CRÓNICAS 14

1Tiro llajtaj reynin Hiramqa runasta Davidman kacharqa, jinataj wasi ruwajkunata, carpinterostapis. Paykunaqa cedro kurkusta aparqanku kamachina wasita Davidpaj ruwapunankupaj. 2Chaypacha Davidqa yacharqa Diosqa payta Israelpa reynin kanampajpuni churasqanta, reinontataj mayta oqharisqanta, Israel ayllunta munakusqanrayku. 3Davidqa waj warmiswan casarakullarqataj Jerusalenpi. Jinataj aswanraj karqanku churisnin, jinataj ususisnimpis. 4Jerusalenpi nacekorqanku, chay churisnimpata sutisninku kaykuna karqanku: Samúa, Sobab, Natán, Salomón, 5Ibhar, Elisúa, Elpelet, 6Noga, Nefeg, Jafía, 7Elisama, Beeliada, Elifelet ima. 8Chantá filisteosqa yachaytawankama David tukuynin Israelpa reynin kanampaj churasqa kasqanta, tukuyninku Davidta mask'aj rerqanku. Davidtaj chayta yachaspa, paykunaj contrankupi llojserqa. 9Chaypacha filisteosqa jamuspa, Refaim Valleman junt'aykorqanku. 10Chantá Davidqa Tata Diosman tapurerqa: Atiymanchu filisteoswan maqanakoj riyta? Yanapawankichu paykunata atipayta? nispa. Tata Diostaj kuticherqa: Arí, paykunata makisniykiman jaywaykusaj, nispa. 11Davidtaj Baal-perazimman rispa, paykunata atipaykorqa, nerqataj: Uj mayu yaku chayamun, jinata Tata Diosqa ñanta kicharin enemigosniypa chawpinkuta, nispa. Chayrayku chay cheqata Baal-perazim sutiwan suticharqanku. 12Chay jawa filisteospis lantisninkuta saqerpayarqanku, Davidtaj soldadosninta kamacherqa chay lantista ruphaykuchinankuta. 13Chantá filisteosqa ujtawan maqanakoj jamullarqankutaj Refaim Vallenejkama. 14Jinamanta Davidqa watejmanta Diosta tapurillarqataj, Diostaj payman kuticherqa: Ama ñawpaqenkumantachu maqanakoj yaykuychej, manachayqa muyuykuychej, bálsamo sach'as chayman, chayaspataj qhepa ladomanta maqanakoj yaykuychej. 15Maypachachus sach'as patanejpi thaskishaspa ch'ajwajta uyarinki chaypacha, maqanakoj churakuy; chay niyta munanqa Noqa ñawpaqeykita rishasqayta filisteo soldadosta wañurachinaypaj, nispa nerqa Tata Diosqa. 16Davidqa ruwarqa Diospa nisqanman jina, soldadosnintaj filisteosta atipaykorqanku Gabaonmanta Gezerkama. 17Chayrayku tukuynej jallp'aspi David wapu kasqanqa uyarikorqa. Tata Diostaj tukuy nacionesman Davidmanta manchachikuyta churarqa.

will be added

X\