1 CRÓNICAS 12

1David Cispa churin Saúlpa ñawpaqenmanta qharqosqa Siclagpi kashajtin, chayman jamorqanku uj mashkha wapu soldados, paykunataj Davidta yanaparqanku. 2Paykunaqa flechana arcosniyoj karqanku, sumaj warak'ajkuna ima. Flechajtaj warak'ajtaj kanku puraj makisninkuwan. Benjaminmanta Saúlpa ayllunmanta kaykuna karqanku: 3Kamachejninku Ahiezer, Joás ima. Paykunaqa Gabaa llajtamanta Semaj churisnin karqanku; Azmavetpa churisnin Jezielwan, Peletwan; Anatot llajtamanta Beracawan, Jehuwan. 4Gabaonmanta Ismaías; payqa kinsa chunka wapu soldadosmanta ujnin kaj karqa, paykunaj kamachejninkutaj. Gederamanta Jeremías, Jahaziel, Johanán, Gederamanta Jozabad ima; 5Eluzai, Jerimot, Bealías, Semarías, Harufimanta Sefatías ima; 6Elcana, Isías, Azareel, Joezer, Jasobeampiwan coreitasmanta kajkuna; 7Gedormanta Jerohampa churisnin Joelawan Zebadiaswan ima. 8Gad ayllumanta kajkunapis wakinkuna Davidwan tantakaporqanku, ch'in pampapi jark'achasqa pakakunampi kashajtin. Paykunaqa may wapu maqanakojkuna karqanku, maqanakupaj sumaj wakichisqas, jark'akuna escudowan, jinataj t'ojsina lanzawan ima. León jina phiña uyas karqanku, orqospitaj tarukas jina phawarillaj kanku. 9Kaykuna karqanku: Ñawpaj kajqa Ezer karqa; iskay kajtaj Obadías karqa; kinsa kajtaj Eliab karqa; 10tawa kajtaj Mismana karqa; phishqa kajtaj Jeremías karqa; 11sojta kajtaj Atai karqa; qanchis kajtaj Eliel karqa; 12pusaj kajtaj Johanán karqa; jisq'on kajtaj Elzabad karqa; 13chunka kajtaj Jeremías karqa; chunka ujniyoj kajtaj Macbanai karqa. 14Chaykunaqa Gad ayllumanta soldadosta kamachejkuna karqanku. Paykunamanta aswan pisi kajqa pachaj soldadosman sayaykuyta atej, chay aswan wapu kajtaj waranqa soldadosman sayaykuyta atej. 15Paykuna Jordán Mayuta chimparqanku chay ñawpaj kaj killapi, mayu junt'a yaku wasaykurispa rishajtin. Chantá chay tukuy vallespi kajkunaqa ayqerqanku inti llojsimuynej ladoman, jinataj inti yaykuynej ladomampis. 16Chay jawaqa wakin runas Benjamín ayllumanta kajkuna jinataj Judá ayllumanta kajkunapis Davidwan tantakoj rerqanku, chay jark'achasqa pakakunapi kashajtin. 17Davidqa paykunaman llojsispa, nerqa: Sichus noqaman jamushankichej allin sonqowan yanapanawaykichejpaj chayqa, tukuy sonqowan munasaj ujchakunawaykichejta; sitajchus wasanchanawaykichejpaj, enemigosniymantaj jaywaykunawaykichejpaj jamunkichej chayqa, mana ima juchayoj kashajtiy, jina kanman chayqa, ñawpa tatasninchejpa Diosninku chayta rikuspa, qankunata castigachun, nispa. 18Chaypacha chay kinsa chunka runaspa kamachejninku Amasaiman Diospa Espíritun jamojtin, pay jatunmanta nerqa: Isaípa churin David, qampata kayku, qanwampunitaj kashayku. Allin kawsay qampaj kachun, qanta yanapasojkunapajpis, imaraykuchus Diosniyki yanapashasunki, nispa. Davidtaj paykunata soldadosnimpaj jap'ispa, soldadosta kamachejkuna ukhupi kanankupaj churarqa. 19Manasés ayllumanta wakinkunapis Davidman riporqanku, maypachachus David filisteoswan khuska Saúlpa contranta maqanakunankupaj risharqa chaypacha. Chaywampis Davidqa filisteosta mana yanaparqachu; filisteospa kamachejninkukuna parlanakuytawan, kachapusqanku: Davidqa noqanchejta wañurparichiytawankama wiraqochin Saulman riponqa, nispa. 20Manasés ayllumanta kajkuna runas Davidman chimpaporqanku, Siclagman rishajtin. Chaykunaqa karqanku Adnas, Jozabad, Jediael, Micael, Jozabad, Eliú, Ziletai ima. Paykuna Manasespa soldadosninmanta kamachejkuna karqanku. 21Chaykunaqa Davidta yanaparqanku suwa soldadospa contrankupi. Tukuyninku may wapu maqanakojkuna karqanku, soldadosnimpa kamachejninkunamantaj tukorqanku. 22Sapa p'unchay Davidta yanapajkuna chayamullarqankupuni, may ashkha soldados kanankukama, Diospa soldadosnin chhika may ashkhapuni. 23Kaykuna kanku tukuy soldados maqanakupaj jina wakisqas, pikunachus Hebronman Davidpaman jamorqanku Saúlpa reinonta Davidman pasachimunankupaj, Dios nisqanman jina: 24Judá ayllumanta kajkuna sojta waranqa pusaj pachajniyoj runas karqanku jark'akuna escudosnintin, t'ojsina lanzasnintin, maqanakupaj wakichisqa. 25Simeón ayllumanta kajkuna qanchis waranqa pachajniyoj wapu maqanakojkuna karqanku, maqanakupaj sumaj wakisqas. 26Leví ayllumanta kajkuna tawa waranqa sojta pachajniyoj karqanku, 27kinsa waranqa qanchis pachajniyojtaj Aaronpa ayllunmanta karqanku. Joiadataj kamachejninku karqa, 28Sadocwan ima. Payqa wapu maqanakoj wayna karqa ayllun ukhumanta iskay chunka iskayniyoj kamachejninkunawan. 29Benjamín ayllumanta kajkuna, chay Saúlpa kikin ayllunmanta kinsa waranqa runas karqanku. Paykunaqa yaqha tukuyninku Saulman sayasqa kaj kanku. 30Efraín ayllumanta karqanku iskay chunka waranqa pusaj pachajniyoj may wapu soldados. Ayllunkupitaj may mentasqa karqanku. 31Manasés khuskan ayllumanta chunka pusajniyoj waranqa karqanku. Paykuna mink'asqa karqanku Davidta kamachejninkupaj jina churamunankupaj. 32Isacar ayllumanta kajkuna yachajkuna karqanku Israel ayllu imastachus ruwana kajmanta. Paykunaqa karqanku iskay pachaj kamachejkuna, ayllunkumanta kajkunataj chaykunaj nisqankuman jina ruwaj kanku. 33Zabulón ayllumanta kajkuna phishqa chunka waranqa karqanku. Paykunaqa tukuy laya armaswan wakichisqa karqanku, mana iskayrayaspa Davidta yanaparinankupajtaj may k'uchis karqanku. 34Neftalí ayllumanta karqanku waranqa kamachejkuna, kinsa chunka qanchisniyoj soldadostaj t'ojsina lanzaswan, jark'akuna escudoswan maqanakupaj wakisqas. 35Dan ayllumanta kajkuna iskay chunka pusajniyoj waranqa, sojta pachajniyoj soldados karqanku. 36Aser ayllumanta kajkuna, tawa chunka waranqa maqanakupaj wakisqa soldados karqanku. 37Chay jawaqa Jordán Mayu chay chimpamanta, Rubén ayllumanta kajkuna, Gad ayllumanta kajkuna, jinataj Manasés khuskan ayllumanta kajkunapiwan pachaj iskay chunkayoj waranqa karqanku; paykunaqa tukuy laya armasniyoj karqanku. 38Chay tukuy maqanakoj soldadosqa Hebronman rerqanku, wakisqas wañuchinaku maqanakuman rinankupaj jina, allin sonqowan Davidta tukuy Israel ukhupi reyta churanankupaj. Ajinallatataj Israel tukuy aylluntin uj yuyaylla karqanku chayta ruwanankupaj. 39Chaypi Davidwan kinsa p'unchayta karqanku mikhuspa, ujyaspataj, llajta masisninku chay tukuyta paykunapaj wakichisqankurayku. 40Chay jawaqa qayllasninkupi kajkuna kawsaqesninkupis Isacarmanta kajkuna, Zabulonmanta kajkuna, jinataj Neftalimantapis burrospi, camellospi, mulaspi, bueyespi ima kay tukuy mikhunasta apamorqanku: Jak'uta, higo t'antasta, k'isasta, vinota, aceiteta, wakasta, ovejasta ima. Tukuy imasmanta ashkhata apamorqanku, Israel ayllu ukhupi sinch'i kusiy kasqanrayku.

will be added

X\