1 Tukuy israelitas tantakuspa, Hebronman Davidwan parlaj rerqanku. Chaypitaj nerqanku: Noqaykoqa yawar masiyki kayku. 2 Cheqamanta Saúlqa reyniyku kashajtimpis, qampuni israelitastaqa wañuchinaku maqanakuman pusaj kanki. Chay jawaqa Señorniyki Tata Dios nisorqa: Qanmin Israel aylluytaqa michinki, paykunatataj rey jina kamachinki, nispa. 3 Chay jinamanta Israelpa tukuy kurajninkunaqa Hebronman Davidwan parlaj rerqanku, Davidtaj paykunawan Tata Diospa ñawpaqempi uj tratota ruwarqa. Chaypacha paykunaqa Davidta churarqanku aceitewan jawispa, Israel ukhupi reyninku kanampaj, Samuelnejta Tata Dios nisqanman jina. 4 Davidwan, tukuy israelitaswan Jerusalenman rerqanku, Jebús nisqa, chay llajtaman. Chaypeqa jebuseos tiyakusharqanku. 5 Paykunataj Davidman nerqanku: Qan mana kayman yaykumuyta atinkichu, nispa. Chaywampis Davidqa sinch'i jark'achasqa Sión llajtata atipaspa, jap'ikaporqa. Kunantaj chay llajtaqa Davidpa Llajtan nisqa kashan. 6 Davidtaj nisqa: Pichus ñawpajta jebuseoswan maqanakoj rejtaqa kuraj kaj kamachej kanampaj churasaj, nispa. Ñawpajta maqanakuman rej runaqa Sarviaj churin Joab karqa. Jinataj payqa kurajpaj churasqa karqa. 7 Chaymantataj Davidqa sinch'i jark'achasqa llajtapi tiyakaporqa. Chayrayku Davidpa Llajtan nispa suticharqanku. 8 Chay muyuyninmantaj llajtata jataricherqa Milomantapacha llajta perqakama. Joabtaj chay wakinta allinchacherqa. 9 Davidqa aswan atiyniyojman tukusharqa Tukuy Atiyniyoj Tata Dios paywan kasqanrayku. 10 Kaykuna karqanku Davidpa aswan sumachaj kaj soldadosnin. David kamachishajtin, paykunaqa sumajta yanaparqanku, tukuy israelitaswan khuskataj reyninkupaj Davidta churarqanku, Tata Diospa nisqanman jina. 11 Kaykuna karqanku Davidpa sumachaj soldadosnimpa sutisnin: Hacmonijpa churin Jasobeam chay kinsa chunka wapu soldadospa kamachejninku karqa. Uj kutillapi payqa kinsa pachaj soldadosta t'ojsina lanzanwan wañuracherqa. 12 Paypa qhepantaj Eleazar karqa, ahohita Dodoj churin; kinsantin wapu soldadosmanta ujnin kaj karqa. 13 Payqa Davidwan Pas-damim llajtapi karqa, maypachachus filisteos wañuchinaku maqanakupaj chaypi tantakorqanku chaypacha. Chaypi karqa cebada tarpusqa chajra. Maypachachus israelitas filisteosmanta ayqesqanku chaypacha, 14 payqa chay tarpusqa chajra chawpipi sayaykuytawan, paykunamanta jark'akuspa filisteosta atipaykorqa. Jinamanta Tata Diosqa payta yanaparqa t'ukunata atipaykunampaj. 15 Uj kutipitaj chay kinsa chunka kurajkunamanta kinsantillanku Adulam chhanka jusk'uman Davidwan tinkukoj rerqanku. Filisteosmanta soldadostaj Refaim Vallepi jarasqa karqanku. 16 David chhanka jusk'upi kashajtin, filisteosmanta soldadosqa Belenpi kasharqanku. 17 Chaypacha Davidqa kay jinata parlarikorqa: Imaynapichus pillapis, Belén llajta punkupi kashan, chay pujyumanta yakuta jaywariwanman, nispa. 18 Chantá chay kinsantin wapu soldadosqa filisteospa jarankuman yaykuspa, Belenman yaykuna punkumanta uj ladopi kasharqa, chay pujyumanta yakuta orqhomuspa, Davidman aparqanku. Davidtajrí mana ujyarqachu, manachayqa ofrendata jina Tata Diospa ñawpaqempi pampaman jich'arqa. 19 Chantá nerqa: Dios ama saqewachunchu kay yakuta ujyanaytaqa. Chaytachus ujyayman chayqa, chay runaspa yawarnintachari ujyaspa jinayman; paykunaqa wañuyta mana manchachikuspa yakuta apamorqanku, nispa. Chayrayku Davidqa chay yakuta mana ujyarqachu. Chaytaqa chay kinsa wapu soldados ruwarqanku. 20 Joabpa wawqen Abisaiqa chay kinsa chunka ajllasqa kajkuna ukhupi kamachejninku karqa. Uj kutipi maqanakoj churakorqa, t'ojsina lanzanwantaj kinsa pachaj runasta wañuracherqa. Jinamanta chay kinsa aswan wapu soldados jina may uyarisqa karqa. 21 Tukuyninkumanta aswan jatumpaj qhawasqa karqa, kamachejninkutaj karqa. Chaywampis manapuni chay kinsa wapus jinapunichu karqa. 22 Cabseelmanta Joiadaj churin Benaiaqa wapu runa karqa, ashkha t'ukuna imastataj ruwarqa. Payqa Moabmanta Arielpa iskaynin churisnintapis wañucherqa. Uj p'unchaypi rit'imusharqa chaypacha, uj jusk'uman yaykorqa, chay ukhupitaj uj leonta wañucherqa. 23 Wañuchillarqataj uj jatunkaray egipcio runatapis. Chay runaqa iskay metros khuskanniyoj jina sayayniyoj karqa, paytaj uj t'ojsina lanzawan armasqa purej. Chay lanzanqa awana k'aspiman rijch'akorqa. Benaiataj uj k'aspillawan maqanakoj churakuspa, chay lanzanta kacharparicherqa, chay kikin lanzallanwantaj wañurparicherqa. 24 Ajinata Joiadaj churin Benaiaqa chay imasta ruwarqa, kinsa chunka wapu runas ukhupitaj may uyarisqa karqa. 25 Paykunamanta nisqaqa astawan allimpaj qhawasqa karqa. Chaywampis manapuni chay kinsa aswan wapu runas jinapunichu karqa. Davidqa Benaiata churarqa payta qhawajkunaj soldadosninkojpa kurajninku kanampaj. 26 Chay wapu soldadosqa kaykuna karqanku: Joabpa wawqen Asael; Belenmanta Dodoj churin Elhanán; Harodmanta 27 Samot; Paltimanta Heles; 28 Tecoamanta Iquespa churin Ira; Anatotmanta Abiezer; 29 Husamanta Sibecai; Ahomanta Ilai; 30 Netofamanta Maharai; Baanaj churin Heled, paypis Netofallamantataj karqa. 31 Gaboamanta Ribaijpa churin; chayqa Benjamín suyupi kashan. Piratonmanta Benaía; 32 Gaas Mayumanta Hidai; Arabamanta Abiel; 33 Bahurinmanta Azmavet; Saalbommanta Eliaba; 34 Gizonmanta Jasenpa churisnin; Haramanta Sagejpa churin Jonatán; 35 Sacarpa churin Ahiam, paypis Harallamantataj karqa; Urpa churin Elifal; 36 Mequeramanta Hefer; Pelonmanta Ahías; 37 Carmelmanta Hezrai; Esbaijpa churin Naarai; 38 Natanpa wawqen Joel; Hagraijpa churin Mibhar; 39 Amonmanta nisqa Selec; Berotmanta Naharai. Payqa Sarviaj churin Joabpaj armasta apaykachapojnin karqa. 40 Jatirmanta Ira; Jatirllamantataj Gareb; 41 Heteosmanta Urías; Ahlaipa churin Zabad; 42 Sizaj churin Adina, payqa Rubén ayllupi kamachej karqa. Paywantaj kinsa chunka runas karqanku; 43 Maacaj churin Hanán; Mitnimanta Josafat; 44 Astarotmanta Uzías; Aroeimanta Hotampa churisnin Sama, Jehiel ima; 45 Simrijpa churin, Jediaelwan wawqen Tizmanta Joha ima; 46 Mahanaimmanta Eliel; Elnaampa churisnin Jebaiwan, Josaviaswan; Moabmanta Itma; 47 Eliel; Obed; Sobamanta Jaasiel ima.
