1 Filisteosqa israelitaswan maqanakorqanku, israelitastaj paykunaj ñawpaqenkumanta ayqerqanku. Gilboa Orqopi ashkha israelitas wañuchisqa karqanku. 2 Filisteostaj Saúlta qhatiykorqanku churisnintawan. Chantá wañucherqanku Jonatanta, Abinadabta, Malquisuata ima. 3 Jinapi Saúlpa qayllampi maqanakoqa sinch'i karqa. Flechasta kacharejkunaqa flechasninkuwan jap'irparichispa, wañuy patapi saqerqanku. 4 Chayrayku Saúlqa, pichus armasninta apaykachapojta nerqa: Espadaykita orqhokuspa, tukuycharpariway, Diosta mana rejsejkuna runas ama ñak'arichiwaspa alqochakunankupaj, nispa. Chay yanapajnintajrí mana Saúlta wañuchiyta munarqachu, sinch'ita manchachikusqanrayku. Chantá Saúlqa espadanta sayachiytawan, patanman urmaykurparerqa. 5 Armasninta apaykachapoj runaqa Saúlta wañojta rikuspa, paypis kikillantataj espadan pataman urmaykuspa wañullarqataj. 6 Ajinata chay p'unchaypi wañorqanku Saúl, kinsantin churisnin, tukuy aylluntin ima. 7 Chay vallepi tukuy tiyakojkunaqa israelitasta ayqeshajta rikuspa, Saúl, kinsantin churisnin ima wañusqankutataj yachaspa, paykunapis llajtasninkuta saqespa, ayqerikapullarqankutaj. Chantá filisteosqa jamuspa, chay llajtaspi tiyakaporqanku. 8 Q'ayantin filisteosqa wañusqaspa imasninkuta jap'ikapoj rispa, Gilboa Orqopi Saúlta, churisnintawan, wañusqas wijch'urayashajta tarerqanku. 9 Chaypacha Saúlpa ayanmanta p'achasta lluch'orqanku, umanta qholuspa, armasnintawantaj apakaporqanku. Jinallataj willarachimorqanku filisteo jallp'api tukuy runasman, lantisninkuman ima. 10 Chaymantataj Saúlpa armasnintaqa lantisninkoj yupaychana wasinman churamorqanku, umantataj Dagonta yupaychananku wasiman warkhuykamorqanku. 11 Galaadpi kaj Jabesmanta tukuy runas yacharqanku filisteos imaynatachus Saúlta ruwasqankuta. 12 Chantá tukuy wapu kajkuna tantaykukuytawan, Saúlpa ayanta, jinataj churisnimpatapis Jabes llajtaman aparqanku. Chaypitaj chay ayasninkuta uj sach'a uraman p'ampaykorqanku. Chantá qanchis p'unchayta ayunota ruwarqanku. 13 Ajinatamin Saúlqa wañorqa, Diosta wasanchasqanrayku. Payqa juchallerqa Tata Diospa kamachisqasninta mana kasuspa, uj aysiri warmita tapukamusqanraykutaj. 14 Mana Tata Diosta taporqachu. Chayraykumá Tata Diosqa payta wañuchicherqa, reinontataj Isaípa churin Davidman qoporqa.
