1 Chaymantami rikaray uk a'ngel syilumanta ishkimuqta. Payqami chay manchaypaq uch'ku ruripa llabinta charikusha karan. Chaynullami charikushapis karan uk kusala largu kadinata. 2 Chaymi chay angelqa, chay dragon, kusala unay largu kuru, dyablu, Satanastaqa aypar mil an~upaqna kadinawan wataran. 3 Chaymantaqami chay manchaypaq uch'ku rurimanna itakur kirparan. Chaynu kirparmi chay punkupiqa ch'uraran uk siyuta. Chayna chay mil an~u pasanankaman ama tukuy nasyunkunata llullachinanpaq. Chaymantaqa chay mil an~u pasatinqami, chay dragontaqa kach'anqa ayka tyimpullapaqqa. 4 Rikaraypis achka mantakuna samanakunata. Chaypiqami chay kusala allita rikar yach'aqkuna tayaranllapa. Chaqa paykunaqami unayqa Jesuspi kriyir Tayta Dyus munashannulla rurar kawsayatin kunkanta pitir wanuchisha karanllapa. Piru paykunaqami mana adurashallapachu karan chay munstruta, chaynulla imagenninmatapis. Chaynulla manami dijakashallapachu karan chay munstrupa markanta urkunpi, manaqa makinpi ch'urananllapamatapis. Chaymi ashwan rikayatiy paykunaqa kawsamur, Jesuswan pulla mil an~uta mantakuq ch'urakaranllapa. 5 Chaynumi Tayta Dyusqa manaraq mayqantapis kawsachimuyar, chay paypa kaqninkunata puntataqa kawsachimuran. Piru chay wakin wanushakunaqami mana kawsamuranllapachu, chay mil an~u pasanankaman. 6 Chaymi nishaykillapa: Kusa shumaqmi kanqa chay puntallata kawsamuqkunaqa. Chaqa paykunaqami Dyuspa akrashankunana kanqallapa nir. Chaymi ashwan chay ishkay kutipaq wakinkuna wanuyanllapa chayqa, manana paykunataqa imanachiytapis puytinqanachu. Chaqa paykunaqami Dyuspa, chaynulla Jesucristupa uk kura yach'achikuqninna kanqa. Chaymi ashwan paykunaqa Jesucristuwan pulla mantakunqallapa, mil an~uta. 7 Piru chaynu mil an~u pasashana katinqa, chay Satanastaqa kach'anqallapa chay watarayashanmantaqa. 8 Chaymi tukuyla intiruta rinqa tukuyla nasyunkunaman kusalata ingan~akuq. Chaynulla ashwan rinqa ingan~aq Gogpi kaqkunata, Magogpi kaqkunata ima. Chaymi chaynuqa kusala achka suldadukunata tantanqa, imanutaq mar yakupa manyanpimaqa aqu quturan chaynuta. 9 Chaynu kusala achka runakunata tantarmi kusala largu mayta rir ch'aranllapa Tayta Dyuspa kusala munashan pwibluman. Chaynu ch'armi chay pwiblutaqa limpu riduranllapa mana allinkunata rurananllapapaq. Piru chaykamanqami unaq syilumanta nina ratamur limpu rupachiran paykunataqa. 10 Chaymanta chay dyablu ingan~akusha chaytaqa, itakukaran chay quch'api asufriwan nina ratakuqman. Chaqa chayllamanmi chay munstruta, chaynulla chay llullakur yach'achikur puriq chaypis itakukasha karanllapa. Chaqa chaypiqami unaqpis tutapis mana agwantaypaqta qischakanqallapa, tukuy tyimpupaqna. 11 Chaymi rikaray kusala yuraq mantakuna samanata. Chaynulla rikaraypismi chay samanapi Dyus taqta ima. Chaymantami paypa naypanmantaqa, pacha chaynulla syilumapis limpu chinqaran. Chaymi mana rikaypaqnachu karan maylawpipis. 12 Chaymantami rikaray chay wanushakuna atun kaqkuna chaynulla taksha kaqkuna 13 Chaymi chay mar yakumapis, pay wanuchishankunata qukuran. Chaynullami, chay wanuy chaynulla tukuy wanushakunapa tananpis wanushakunataqa qukuran. Chaymi tukuyta rikar yach'aranllapa, imakunatami kawsayarqa ruraran ima nirmapis. 14 Chaymantaqami chay wanuyta, chaynulla chay tukuy wanushakunapa tanan kaqtapis, itakuran chay quch'api nina ratakuqman. Chaymi chay quch'api nina ratakuq kaqqami, qashan ishkay kutipaqna wanur tukuy tyimpupaq qischakanllapa chay karan. 15 Chaynulla chaymanmi itakuranllapapis, chay tukuy tyimpupaq kawsanallapapaq librupi shutinkuna mana iskribikasha kaqkunatapis.
