San Mateo 8

1Jesu's chay sirkamanta ishkimutinqami, kusala achka runakuna ikinta riranllapa. 2Chaymantaqami uk runa ismuyaq kwirpuyjun payman qimikar naypanpi qunqurikur niran: --Taytituy, llakipamayarqa allichamay-ari kay qishayniymantaqa nir. 3Chaynu nitinqa, Jesusqa makinwan kamar niran: --Munanimi alliyanaykita. Kananlla alliyay nir. Chaymi chay kutilla chay ismuyaq kwirpuyjun runaqa, alliyaran qishayninmantaqa. 4Jesusqami niranpis: --Amami mayqantapis willankichu. Ashwanmi rir qimikay kuraman. Chaymi apanki ufrinditaykita Moise's mantakushannulla. Chayna tukuy yach'ananllapapaq qishaynikimantaqa alliyashaykina nir. 5Chaymanta Capernau'm pwibluman Jesu's yaykutin, Romamanta suldadukunapa uk mantaqnin, qimikaran payta rugaq. 6Chaymi niran: --Taytituy, sirbikuqniymi wasiypi qishaq. Manami kwirpunqa kuyuylamatapis puytiyanchu. Ashwanmi kusala saqra nanaywan qischakayan nir. 7Jesusqa niran: --Rishaqmi allichaq nir. 8Chaynu nitin, chay suldadukunapa mantaqninqa niran: --Taytituy, nuqa mana kwintachaypaqla kashayraykumi mana allinchu wasiymanraq rir yaykunaykipaqqa. Ashwanmi kayllamanta 'Alliyanqa' niy, chay sirbikuqniyqa alliyananpaq. 9Chaqa nuqallatami mantamaqniykuna mantaman. Chaynulla nuqapis wakin suldadukunata mantani. Chaymi mayqannintapis 'Riy' nitiyqa, rin. Ukta 'Shamuy' nitiypis, shamun. Chaynulla sirbiqniytapis imata rurananpaq kach'atiypis ruran. 10Chaynu nitin uyaparmi Jesusqa kusa dispantakashalla aligriyaran. Chaymi chay wakin ikinta riqkunataqa niran: --Chiqaptami nishaykillapa: Tukuyla Israel pwiblupiqa manami mayqantapis kay runa yupay allita kriyiqtaqa tarishachu kani. 11Chaymi nishaykillapapis: Achka jwira runakunami shamunqallapa rupay iqamunanlawmanta, rupay iqananlawmanta ima. Chaymi paykunana tayanqa pulla mikuq Abrahamwan, Isaacwan, Jacobuwan syilumanta kaq mantakuyashanpiqa. 12Piru Dyus mantakuyashan luryanpi kananpaq karan chaykunaqami, itakukayanqa waqta tutaparaqlla infyirnumanna. Chaymi chaypina kusala mana agwantaypaqta qischakar qaych'akushanrayku kirunmatapis richyachinqallapa. 13Chaymantami Jesusqa chay suldadukunapa mantaqnintaqa niran: --Riyna wasikiman. Qam kriyishaykinullami wasikipiqa rurakanqa nir. Chaynu Jesu's nitinlami, chay kutilla sirbikuqninqa alliyaranna. 14Jesusqami riran Pedrupa wasinman. Chaypimi Pedrupa swigranta tariran, mantanpi qishaq usuraqta. Kusala rupawanmi karan. 15Chaymi Jesusqa, chay warmisitataqa makinmanta kamaran. Chayna chay rupaqa dijaranna. Chaymantami ashwan chay warmisitaqa sharikur paykunata qaraqna qallariran. 16Tutapatinnaqa Jesusman achka runakuna dyablupa yarpuyninwan kaqkunata apamuranllapa. Piru Jesusqami rimarla chay dyablupa yarpuynin runakunapi kaqtaqa itakuran. Chaynullami allicharanpis tukuyla qishaq kaqkunataqa. 17Tukuy kaykunaqami chaynuqa pasaran Dyuspa rimaqnin Isai'as kaynu nishan kumplikananpaq. Chaqa kaynumi nisha kayaq: "Paylla nanayninchikkunata urquran. Chaynulla paymi qishayninchikkunatapis aparan" nir. 18Uk diyapimi Jesusqa achka runakunapa rurinpi rikariran. Chaymi yach'akuqninkunataqa kaynu niran: Pasashunllapa chay quch'apa chimpanman nir. 19Chaymantaqa Moise's mantakushankunata yach'ar yach'achikuq runami Jesusman qimikar niran: --Yach'achikuq Taytituy, mayta ritkipismi pullayki rinayani nir. 20Chaynu nitinmi Jesusqa niran: --Surrukunami mach'ayniyjun pununanpaqqa. Chaynulla pariq kurukunapis qushayjun ima. Piru Dyusmanta Shamuq Runapaq-shuypaqami mana kanchu maylapipis umanta sintikuchinanlapaqmapis nir. 21Chaynu nitinmi yach'akuqninkunamanta ukqa kaynu niran: --Taytituy, dijamay rishaq taytay wanutin pampaqraq. Chaymantanami rishun nir. 22Chaynu nitinmi Jesusqa niran: --Kusa allinmi kananlla nuqawan rinaykipaq. Chaqa nuqapi mana kriyiqkunaqami imanutaq wanushakunamaqa chaynu. Chaymi dijay wanushakunaqa paykunapurana pampanakunqa nir. 23Chaymantami Jesusqa yach'akuqninkunawan yaku karruman iqar riranllapana. 24Chaynu riyatinllapami chay quch'a yakuqa kusata wakman kayman maqchikaq qallariran. Chaymi chay yaku karrutaqa pampanayaranna. Piru chaykamanqami Jesusqa punuyaran. 25Chaymi yach'akuqninkunaqa rikch'achiq rir niranllapa: --¡Taytituy, washamayllapari! ¡Yaku rurimanmi chinqayanchikllapana! nir. 26Chaynu rikch'achitinllapami Jesusqa niran: --¿Imapaqtaq kusalata manchakunkillapa? ¡Qamkunaqami manaraq allitaqa kriyimankillaparaqchu! nir. Chaynu nirnaqami, sharir wayrawan yakutaqa willatinla limpu limpu qasillaran. 27Chaynu rurashanraykumi kusa dispantakashalla paykunapura tapunakuyaqllapa: --¿Kayqa, imanu runa katintaq wayrawan yakumapis kasunqa? nir. 28Chaymanta Jesusqa chay quch'apa uklaw manyan Gadara shutiq lugarman ch'aran. Chaymi chay lugarmantaqa dyablupa yarpuyninwan kaq ishkay runakuna, pantyunmanta lluqshir, payman qimikaran. Chay runakunaqami kusala saqra manchaypaqta tukuqllapa. Chaymi chay lugartaqa mana mayqanpis pasayta puytiqllapachu. 29Piru Jesusta rikarqami, kaynu nir qaych'akuq ch'urakaranllapa: --¡Dyuspa Wamran Jesu's, amami nuqakunamanqa yakapakamuychu! ¿Chaqa qamqachu manapis jwisyu diya ch'amuyatinraq kananlla shamushayki qischamaqllapa? nir. 30Piru chay kayashanllapamanta largukaqpimi achka kuchikuna shitqakuyaranllapa. 31Chaymi chay dyablupa yarpuyninqa, Jesustaqa kaynu nir rugaranllapa: --Kay runakunamanta lluqshichir itakumarllapaqa, dijamayllapa chay achka kuchikuna kan chayman yaykunayllapapaq nir. 32Chaynu nitinmi Jesusqa niran: --Riyllapa nir. Chaynami chay dyablupa yarpuyninqa runakunamanta lluqshir kuchikunamanna yaykuran. Chaymi kuchikunaqa chay kutilla kusalata kallpar, qaqata rishannu quch'aman ratar ch'uqar wanuranllapa. 33Nataq chay kuchikunata michiqkunaqami alsakar riranllapa. Chaymi pwibluman ch'arqa imanu chay dyablupa yarpuyninwan kaq runakuna pasashantaqa tukuyta parlaranllapa. 34Chaymi chay kutilla pwiblumanta kaq runakunaqa lluqshir riranllapa Jesu's kayashanmanqa. Chaynu Jesusta chaypi rikarllapami kusalata rugaranllapa kay lugarniyllapamantaqa wakaq tukuy nir.

will be added

X\