San Mateo 13

1Chaymantami chay diyaqa Jesusqa chay wasimanta lluqshir rir kusala atun quch'apa manyanpi taran. 2Chaynu kusa achka runakuna tantakayatinmi, Jesusqa uk yaku karruman iqar taran. Nataq runakunaqami chay quch'apa manyanlapi kidaranllapa. 3Chaymantami Jesusqa kusa achka imakunata kumparasyunkunawan yach'achikuq qallarir, kaynu niran paykunataqa: "Uk runami tarpukuq riran ch'akranman. 4Chaymantami shikwakutinqa wakin simillaqa nanman rataran. Chaymi pariq kurukuna shamur mikuran chay simillataqa. 5"Nataq wakin similla-shuypaqa rumipa ananpi yaqqa mana allpa kaqman rataran. Piru chay simillaqami daskaqla winaq qallariran, mana ruri maypi pampakashanrayku. 6Chaymantami rupay iqamutinqa mana allita ch'upakushanrayku, daskaqla ñutukur chakiran. 7"Nataq wakin simillakunaqami kasha rurikunaman rataran. Chaymantami kashakuna winar ch'amitachiran. 8"Piru wakin similla-shuypaqami rataran kusa shumaq pachaman. Chaymi kusa shumaqta winatin, kusala shumaqta kusichakuranllapa. Chaqa, wakin ispigaqami syin murisituyjun karan. Nataq wakin ispigaqa sisinta murisituyjun. Wakin-shuypaqa, trinta murisituyjun ima karan. 9Chaymi nishaykillapa: Rinriyjun kaqkunaqa uyakur intrakayllapa nir". 10Chaymantami Jesuspa yach'akuqninkunaqa qimikar tapuran: --¿Imapaqtaq kumparasyunkunalawan runakunataqa yach'achinki? nir. 11Chaymi Jesusqa niran: "Qamkunatami Dyusqa imanumi mantakun nirqa paylla intrachishuyanllapa, michka unay mana intrakasha katinllapamapis. Piru wakin runakunata-shuypaqa mana. 12Chayraykumi nini: Dyuspi intrakaqkunataqa masta intrachinqa, kusa intrakaq kananllapapaq. Piru mana intrakanaqkunata-shuypaqa, chay ashlilata intrakashanmatapis tantar qunqachinqa. 13Chayraykumi kay kumparasyunkunalawan yach'achikuni. Chaqa, paykunaqami chapakurpis mana rikakunchu. Chaynulla uyakurpis mana intrakanllapachu. 14Chaymi paykuna chaynu katin ima, Dyuspa rimaqnin Isai'as nishanqa kumplikan. Chaqa niqmi: 'Michka kusata uyakurmapis, mana intrakanqallapachu. Chaynulla michka chapakurmapis, mana rikakunqallapachu nir. 15Chaqa kay pwiblumanta runakunapa yarpuyninqami mana intrakaqpaq tikrakasha. Chaymi rinrinllapamapis limpu kirpakasha amana uyakunanllapapaq. Chaynulla nawinllapamapis limpu kirpakasha amana rikakunanllapapaqnachu. Chaynuqami tukushallapa ama nuqapi kriyinanllapapaq. Mana nuqapaq intrakar kriyitinllapaqami, mana allichashaqmapischu'. 16"Nataq qamkuna-shuypaqa kusala shumaqmi kankillapa. Chaqa nawikillapamapis allita rikakun. Chaynulla rinrikillapamapis allita uyakun ima. 17Nishaykillapapismi: Chiqaptami Dyuspa rimaqninkuna, wakin kusa allin runakunapis, kanan rikayankillapa chayta, chaynulla uyapayankillapa ima chaytaqa, rikayta uyapayta ima munaqllapa. Piru paykunaqami michka chaynu munarmapis mana rikaran chaynulla uyaparanllapalamapischu. 18"Allita intrakayllapa, chay kumparasyun tarpukuqpaq rimarqa imatami intrachimanchikllapa nir: 19Chaymi Dyusmanta shamur mantakuqpaq uyapar mana intrakaqqa, chay similla nanman ishkiran chay yupay. Chaymantami dyablu shamurqa, chay uyakur shunqunpi tarpusha yupay purichiyashantaqa ashuchin. 20"Nataq chay similla rumikunapa ananman rataran chaykunaqami, intrachimanchik runakuna Dyus rimashanta kusa aligrila uyakuqpaq. 21Piru mana allita ch'upakusha karmi, mana shachinakuytaqa puytinchu. Chayraykumi Dyuspi kriyishanrayku imallapiqa qischakar, manaqa imanachinanllapapaq ikinllapapi puritinqa chay uyakushanta dijarna qunqanllapa. 22"Nataq chay simillakuna kashapa rurinman ishkishakuna-shuypaqa, intrachimanchik Dyuspa rimayninta uyapaqkunapaq. Piru kay pachapi imanupis kusa imayjun kanar, imakunapi yarpupakur imaqa, Dyusmanta ashunllapa. Chayraykumi, chay munashankuna, yarpupakushankuna ima, paykunata ch'amitachiq yupay qunqachin Dyuspa rimaynintaqa. Mana dijanchu puquq yupay kusa allin kananpaqqa. 23"Piru chay similla kusa shumaq pachaman ishkisha-shuypaqa intrachimanchik, Dyuspa rimayninta intrakar kasuqkunapaq. Chaykunaqami, kusa achkata puqur kusichakaq yupay ima shumaqta kawsanllapa. Imanutaq wakin ispigakunamaqa, syin murisituyjun karan, wakin-shuypaqa sisinta murisituyjun, wakinqami trinta murisituyjun karan kada ispigitaqa". 24Jesusqami kaynu nir kay kumparasyunta parlakuranpis: "Syilumanta kaqpa mantakuyninqami, uk tarpukuq runa shumaq simillanta tarpuran chay yupay. 25Piru tukuy punuyatinllapa, payta ch'iqniq runa shamur shikwakuran balliku simillata chay trigupa rurinpiqa. Chaynu shikwakurqami upallala riranna. 26"Chaymanta trigu winar ispigakutin imanaqa, chay ballikukunapis rikariranna. 27Chaymi chay trabajaqkunaqa riran amunta willaq, kaynu nir: 'Taytituy, qam tarpushayki simillaqami kusa allin karan. ¿Maymantataq chay ballikuqa winamushaqa?' nir. 28"Chay ch'akrapa amunqa niran: 'Mayqan ch'iqnimaqmi chaytaqa rurasha kanqa' nir. Chaynu nitinqa chay trabajaqkunaqa kaynu nir tapuranllapa. '¿Allinchu kanqa rir chay ballikuta pilar itakunayllapapaqqa?' nir. 29"Piru chay amunqa niran: 'Ama chaytaqa rurayllapachu. Chaqa chay ballikukunata pilashaq nirqami, chay trigukunatapis pilayankillapa kanqa. 30Ashwanmi dijayllapa pulla winanqa chay kusichakuna tyimpu ch'amunankaman. Chaymi chay diyaqa kach'akushaq chay ballikukunataqa akrananllapapaq. Chaynu akrarqami manuju manujula watar dijanqallapa rupachikananpaq. Nataq chay trigu kaqta-shuypaqami ch'uranqallapa chay ch'urakunaypina' ". 31Jesusqami kay kumparasyuntapis parlakuran: "Syilumanta kaqpa mantakuyninqami uk mustasa qirupa simillanta, runakuna tarpun chaynu. 32Chaqa, mustasa qirupa simillanqami kusala llampitu tukuy qirupa simillanmantaqa. Piru winarqami, kusala atunpaqna tikrakan, wakin mallkikuna ch'akrapi kaqkunamantaqa. Chaymi ashwan pariq kuritukunamapis, chaymanna rir qushakun". 33Chaynullami kay kumparasyuntapis parlakuran, kaynu nir: "Syilumanta kaqpa mantakuyninqami imanutaq uk warmi tantata ruraqmaqa, achkalla arinaman pitila libadurata itar dijatin saksachin chaynu". 34Tukuy kaykunatami, Jesusqa runakunataqa willaran kumparasyunkunalawan. Manami imatapis mana kumparasyunkunawanqa willaranchu. 35Piru tukuy kaykunaqami chaynuqa pasaran Dyuspa rimaqnin unaylla nishankuna kumplikananpaq. Chaqa kaynumi nisha kayaq: "Tukuytami kumparasyunkunawan willashaq. Chaynullami willashaqpis kumparasyunwan, Dyus kay pachata rurashanmanta-pacha imakuna pakaplla katin mana intrakayashanllapapaq ima". 36Chaymantaqami Jesusqa chay runakunata chaypi dijar rir yaykuran uk wasiman. Chaypimi yach'akuqninkunaqa qimikar mañaranllapa intrachinanpaq chay balliku ch'akrapi winasha kayaq chaypaq. 37Chaymi Jesusqa niran paykunataqa: "Chay kusala shumaq simillata tarpukuq chayqami Dyusmanta Shamuq Runa. 38Nataq ch'akra tarpukasha chay-shuypaqami kay pacha. Chaymi chay shumaq simillaqa intrachimanchik Dyus munashanta rurar mantakuyninpi kaq chaykunapaq. Nataq balliku-shuypaqami intrachimanchik dyablu munashanlata ruraqkunapaq. 39Piru chay ch'iqnikuq kar, ballikuta tarpusha chay-shuypaqami dyablullapaq intrachimanchik. Nataq chay kusicha tyimpu-shuypaqa intrachimanchik chay jwisyu diyapaq. Chay kusichakuqkuna nir-shuypaqami intrachimanchik Dyuspa angelninkunapaq. 40"Chaymi nishaykillapa: Imanutaq chay ballikukunata chiqanchanchik rupachinapaq, chaynumi chay jwisyu diyapipis wakinqa chiqanchakanqa. 41Chayraykumi Dyusmanta Shamuq Runaqa kach'amunqa angelninkunata, chay mantakuyashanmanta chay ukkunata uchakuchiqkunata, chaynulla chay mana allinta ruraqkunata chiqanchananllapapaq. 42Chaynu chiqancharmi apar kusala miraq ninaman itakunqallapa. Chaymi chaypiraq kusala mana agwantaypaqta qischakar qaych'akushanrayku kirunmatapis richyachinqallapa. 43Piru mayqanpis Dyus munashannu ruraqkuna-shuypaqa, rupay yupay kusa shumaqta llipyaranqallapa Taytanllapa mantakuyashanpina. Chaymi nishaykillapa: Rinriyjun kaqkunaqami, uyakur intrakayllapa nir. 44"Syilumanta kaqpa mantakuyninqami imanutaq uk lugarpi kusala ch'aniyjun ima pakaplla katin mana rikanchikchu chaynu. Chaqa nishaykillapa: Mayqan runapis uk pachapi kusala ch'aniyjun imata tarirqa mana dijayta munanchu. Ashwanmi chayllapi pampar dijar kusala aligrilla rin tukuy iman kaqkunata rantikur tikrakamur, chay pacha kusa imayjun kaqta rantin chaynu. 45"Chaynulla syilumanta kaqpa mantakuyninqami, imanutaq uk nigusyantimaqa kusa ch'aniyjun pirla shutiq rumisituta maskar purin rantinanpaq, chay yupay. 46Chaynu maskar puriyar uk kusa ch'aniyjunta tarirqami, rir iman kaqkunatapis limpu rantikur, imanupis chay pirla shutiq rumisitutaqa rantin-ari. 47"Syilumanta kaqpa mantakuyninqami imanutaq piskadukuqkunamaqa chay shikranta mar yakuman itakurqa kusala achka ukman ukman piskadukunata aypamun chay yupay. 48Chayna chay piskadukuna shikranpi untatinqa chay piskadukuqkunaqa waqtaman urqumunllapa. Chaymantaqa tar akraq qallarinllapa. Chaynami chay kusala shumaq chaykunataqa kanastanman ch'uranllapa. Nataq chay mana shumaq kaqta-shuypaqami itakunllapa. 49Chaynullami pasanqapis chay jwisyu diya ch'amutinqa. Chaymi chay angelkunaqa rir chay mana allin kaqkunataqa chiqanchanqa allin kaqkunamantaqa. 50Chaynu chiqancharmi chay mana allin kaqkunataqa kusalata nina ratakuqmanna itakunqa. Chaymi chaypiraq kusala mana agwantaypaqta qischakar qaych'akushanrayku kirunmatapis richyachinqallapa". 51Chaynu nirqa, Jesusqa tapukuran: --¿Qamkunaqachu intrakankillapa, tukuy kay nishushayllapataqa? --Intrakanillapami Taytituy-- niran paykunaqa. 52Chaymantaqami Jesusqa niran: --Moise's mantakushanta uk yach'ar yach'achikuqqami syilumanta kaqpa mantakuyninmanta yach'akurqa, uk wasipa amun yupay tukun. Chaymi chay kusa ch'aniyjun ch'urakushantaqa urqumun mushuq kaqkunata, unay kaqkunata ima. 53Chaynu nir ima kay kumparasyunkunata parlakurnaqami riranna chay kayashanmantaqa. 54Chaynu rirmi chay pwiblunllaman ch'aran. Chaymi chay tantakananllapa wasipi yach'achikuq qallariran. Chaynu yach'achikutinmi runakunaqa limpu dispantakasha kaynu ninakuqllapa: "¿Kayqa maypitaq yach'akuranqa kay kusa yach'ayashantaqa? ¿Imanutaq chay milagrukunata rurayta puytin? 55¿Manachu kayqa, chay ich'kakuqpa wamran? ¿Chaynulla manachu wakpa mamanqa Mari'a? ¿Manachu Santiagupa, Josipa, Simonpa, Judaspa uknin ima? 56¿Manachu paypa warmi ukninkunamapis kaypi nuqanchikkunawan tanllapa? ¿Piru chaynu katinqa, imanu kartaq tukuy wakkunata rurayta puytinqa?" nir. 57Chaynu nir ima piñakur mana kasunatinllapami, Jesusqa paykunataqa niran: "Tukuy uklaw pachapimi kusa shumaqta rikanllapa uk runa Dyuspaq rimaqtaqa. Piru chay pwiblunllapi chaynulla wasinllapi imaqami mana kasunllapachu" nir. 58Piru chay pwiblunllapiqami Jesusqa mana achka milagrukunataqa ruraranchu. Chaqa chaymanta kaq runakunaqami mana paypiqa kriyiqllapachu.

will be added

X\