San Marcos 6

1Chaymantaqa chay Jairupa pwiblunmanta lluqshir Jesusqa yach'akuqninkunawan qashan tikrakaran Nazaret pwiblullamanna. 2Chaymi uk samana diyapi Jesusqa chay tantakananllapa wasipi yach'achikuq qallariran. Chaynu yach'achikutin kusala achka runakuna uyapar kusa dispantakashalla kaynu nir tapunakuyaqllapa: "¿Kayqa maypitaq yach'akuranqa kay kusa yach'ayashantaqa? ¿Wak yach'ayninqa maymantataq kanqaqa? Chaynulla ¿imanutaq milagrukunata kusalata ruranqa? 3¿Manachu kayqa Mariapa, ich'kakuq wamran? Chaynulla ¿manachu Santiagupa, Josipa, Judaspa, Simonpa uknin kay runaqa? ¿Manachu paypa warmi ukninkunamapis kaypi nuqanchikkunawan tanllapa?" Chaynu nir imami, mana kasunaranllapachu. 4Chaymi Jesusqa niran: --Tukuy uklaw pachapimi kusa shumaqta rikanllapa uk runa Dyuspaq rimaqtaqa. Piru chay pwiblunllamanta kaqkuna, ayllunkuna chaynulla wasinllapi imaqami mana kasunllapachu nir. 5Chaymi payqa chay Nazaret pwiblunllapiqa mana ima milagrutapis ruraranchu. Ashwanmi wakin qishaqkunapa ananman makinkunata ch'urar allicharanla. 6Piru Jesusqami kusalata yarpupakuran, chay runakuna paypi mana kriyinashanrayku. Jesusqami tukuy shipchakaq pwiblukunapi yach'achikur puriran. 7Chaymantami dusi yach'akuqninkunataqa qayamur pudirninta quran, dyablupa yarpuyninta ima itakunanllapapaq. Chaynami ishkay ishkay kach'aran rir yach'achikunanllapapaq. 8Kaynu nirmi kach'aran paykunataqa: "Nanpaqqami ama imatapis aparchu, bastunnikillapata charikurla rinkillapa. Chaynulla amami alburjata, jyamrita, qillayta imamapis apankillapachu. 9Chaynullami llanqikillapata llanqikur, rach'paykillapata yakakur ama mudanantinqa aparchu rinkillapa. 10Chaynullami, uk kusa allin runapa wasinman ch'ar samarqa, chay wasilapina kidankillapa chay ima diyach'i rinaykillapakaman. 11Piru may lugarlawpi mana samachishurllapa chaynulla yach'achikutkillapa mana uyakushunatinllapaqa, chaymantaqa ch'akikillapapi kaq pulbumatapis ch'aspir rinkillapa. Chaynu rurarqami intrachinkillapa: 'Manami nuqakunapa kwintayllapanachu. Ashwanmi qamkunapina kanqa' nir. [Chiqaptami nishaykillapa: Jwisyu diya ch'amutinqami chay pwibluqa kusala manchaypaqtana kastigakasha kanqa chay Sodomawan, Gomorra pwiblu kastigakashanmantaqa nir.]" 12Chaymi Jesuspa yach'akuqninkunaqa rir yach'achikuranllapa: Uchaykillapata dijarna Dyusman tikrakayllapa nir. 13Chaynulla dyablupa yarpuyninmatapis kusala achkata itakuranllapa. Qishaqkunatapismi allicharanllapa asaytiwan salar ima. 14Gubyirnu Herodesmi Jesuspaq kusalata rimaqllapata uyaparan. Chaqa chaynu rimatinllapami tukuy intirupi yach'aranllapana. Chaymi Herodesqa kaynu niran: "Chay Jesusqami, Shutichikuq Juanlla kanqa. Chaqa wanushanmanta kawsamushanraykumi milagrukunamatapis rurayta puytiyanqa" nir. 15Nataq ukkunaqa Jesuspaqqa niqllapa: "Dyuspa rimaqnin Eliasmi" nir. Wakinkuna-shuypaqa niqllapa: "Dyuspa uk rimaqninmi kanqa, imanutaq unay rimaqkuna kaq chaynulla" nir. 16Chaynu nitinllapa uyaparmi Herodesqa, kaynu niran: "Chayqami Shutichikuq Juan. Nuqami umanta pitichikutiy wanuran. Piru kananqami kawsamusha" nir. 17- 18Chaqa Shutichikuq Juan kawsayatinmi, Herodesqa uknin Felipipa warmin Herodias shutiqta warmikur mana allintachu tukusha karan. Chaypaqmi Shutichikuq Juanqa Herodestaqa kaynu nisha kayaq: "Chay ukniki Felipipa warmin Herodiasta warmikita yupay purichiyashaykiqami mana allinchu" nir. Chayta nishanraykushi, Herodesqa kach'akuran Juantaqa aypar kadinakunawan watar karsilananllapapaq. 19- 20Chaynullashi chay Herodias warmipis Shutichikuq Juan, runanta chaynu willashanrayku ch'iqnir, kusalata wanuchiyta munarmapis mana puytiranchu. Chaqa Herodesqashi warmintaqa mana dijaranchu chayta rurananpaqqa. Chaqa payqashi yach'aq Juanqami imatapis karanlata ruran chaynulla mana uchayjunlamapischu nir. Chayshi kusalata manchakuran. Chayraykushi Juan imata nitinpis Herodesqa kusa aligrila uyakur, mana imata nishaq nirpis yach'aqchu. 21Piru uk diyapishi chay Herodiasqa imanullapis Shutichikuq Juantaqa wanuchichiran. Chay diyapishi Herodespa kumpliyañun karan. Chayshi paypa mantaqninkunawan, suldadukunapa mantaqninkunawan, chaynulla chay Galileamanta kusa runa nishakunawan ima fyistata ruraranllapa. 22Chaypi katinllapashi Herodiaspa warmi wamranqa tukuyla chaypi kaqkunapa naypanpi lluqshir bayliran. Chayshi chay baylishanqa tukuy chaypi kaqkunata chaynulla Herodestapis kusalata gustaran. Chayshi Herodesqa intinadanta niran: --Mamitay, ima munashaykitapis mañamay, nuqami qushayki nir. 23Chaymi qashan qashan jurar kaynu niran: --Ima munashaykitapis mañamay, nuqami qushayki, michka tukuy nuqa mantakushaymanta lamtar partin kaqmanmatapis nir. 24Chaynu nitinshi, chay wamraqa lluqshir rir, maman Herodiasta tapuran: --¿Imatataq mañayman? nir. Mamanqa niran: --Shutichikuq Juanpa umanta mañay nir. 25Chayshi wamraqa kallpaylla ruriman yaykur, Herodestaqa kaynu niran: --Kananllami Shutichikuq Juanpa umanta uk platupi qumanaykita munani nir. 26Chaynu nirqashi mantakuq Herodestaqa kusalata llakichiran. Piru chaynu llakiyarmapisshi, chaypi kaqkunapa naypanpi jurar arnishanrayku kach'akuran chaynu rurananllapapaq. 27Chayshi uk suldadunta kach'aran karsilman rir Juanpa umanta apamunanpaq. 28Chayshi chay suldaduqa karsilman rir, Juanpa umanta pitir uk platupi apamur, chay warmi wamratana quran. Nataq chay wamraqashi mamantana ashwan quran. 29Chaymantashi Juanpa yach'akuqninkunaqa chayta yach'arqa rir, karsilmantaqa kwirpunlatana apar pamparanllapa. 30Chaymantaqami Jesuspa dusi yach'akuqninkunaqa, tikrakamuranna. Chaynu tikrakamurmi Jesusta parlaranllapa imakunata rurashanllapata, yach'achikushanllapata ima. 31Piru chay diyakunapiqami Jesu's kayashanmanqa kusala achka runakuna tantakaranllapa. Chaymi chay runakunata yanapar ima Jesusqa yach'akuqninkunawan mana puytiqllapachu samar mikuylamatapis. Chaymi Jesusqa chay yach'akuqninkunata niran: --Rishunllapa chay chunllaq lugarkunaman, ratulaqa samaq nir. 32Chaymi yaku karrupi paykunalana riranllapa chay chunllaq lugarkunamanna. 33Piru chaynu ritinllapami kusa achka runakuna rikar riqsiranllapa. Chaymi yach'aranllapa maymanmi riyanllapa nir. Chayraykumi tukuyla pwiblukunamanta runakunaqa kusalata kallpar rir, ashwan paykunamantaqa naypaqta ch'ar yararanllapa. 34Chaymanta Jesu's yaku karrumanta ishkirqa chay kusa achka runakunata rikar kusalata llakiran. Chaqa paytaqami yarpuchiran, uyshitakuna mana michikuqniyjun kanman yupay. Chaymi payqa kusa achka shumaq imakunata yach'achiran. 35Piru limpu tardiyayatinnaqami chay yach'akuqninkunaqa qimikar kaynu niranllapa: --Kay lugarpiqami mana imapis kanchu. Chaynulla kusa tardinami. 36Chayraykumi runakunataqa willay chay lugarkunaman, pwiblukunaman rir mikunanllapata rantinanllapapaq nir. 37Piru Jesusqami niran paykunataqa: --Qamkuna qarayllapa nir. Chaynu nitinqa niranllapa: --¿Munayankichu kwichka achka dusyintus dinaryu qillaywan tantata rantir qaranayllapapaq? nir. 38Jesusqa niran: --¡Rir, rikayllapa! ¿Aykataq tantitaykillapaqa? Chaymanta paykuna rir rikarqa niranllapa: --Sinku tantitawan, ishkay piskaditulami kan nir. 39Chaynami Jesusqa tukuy chay runakunataqa wakpi kaypi muntun muntun tananllapapaq willaran chay qiwakunapina. 40Chaymi paykunaqa kada muntunpi syin, syin; chaynulla sinkwinta, sinkwinta ima taranllapa. 41Chaynu tashallapana katinqami, Jesusqa chay sinku tantitawan, ishkay piskadituta aypar unaq syiluman chapakur payji nir, Taytan Dyusman mañakuran. Chaymantami chay tantakunata pidasu pidasu pakir yach'akuqninkunata quran tukuyla chaypi kaq runakunata aypachinanllapapaq. Chaynumi chay ishkay piskaditutapis tukuylata aypachiranllapa. 42Chaynumi tukuyla mikuranllapa tiqllananllapakaman. 43Chaymantaqami chay tantapa chaynulla piskadupa subrantaqa dusi kanasta untataraq tantaranllapa. 44Piru chay mikusha chaykunata yupatinllapaqami ullqukunala sinku mil (5,000) karanllapa. 45Chaymanta Jesusqa yach'akuqninkunata yaku karruman iqachiran, rir ch'askinanllapapaq quch'apa uklawnin Betsaida pwibluman paymantaqa naypaqta. Nataq payqa chaylapi kidaran tukuyla dispidikur rinanllapakaman. 46Chaynu dispidikur ritinllapanaqa, Jesusqa uk sirkaman payla iqaran Taytanman mañakuq. 47Limpu amsayatinnaqa yaku karruqa chay quch'a ch'aypipina karan. Piru Jesu's payla pachapi karmi, 48rikaran chay yaku karruqa mana yaqqa riyta puytiqtachu. Chaqa naypanllapalawmantami kusala jwirti wayra shamuyaran. Limpu achkiyaqpinaqa, Jesusqa yaku ananllata riran yach'akuqninkunalawman. Piru chaynu paykunaman riyarmapis, dirichu pasar rinaq yupay tukuran. 49- 50Chaynu yakupa ananta riqta tukuy yach'akuqninkuna rikarmi, kusalata manchakur "¡Wakqami aya!" nir kusata qaych'akuranllapa. Chaymantami Jesusqa paykunataqa kaynu niran: --¡Shachinakur ama manchakuyllapachu! ¡Nuqami kani! nir. 51Chaynu nirmi, payqa chay yaku karruman iqaran. Chaymi ashwan wayraqa limpu qasillaran. Chayta rikarmi paykunaqa limpu dispantakaranllapa. 52Chaqa manari intrakashallapachu karan Jesu's chay tantitakunawan milagruta ruratin rikarmapis, mana allita paypi kriyishanllaparayku. 53Chaymanta chay atun quch'ata pasarqa, Genesaret lugarman ch'aranllapa. Chaymi ashwan chay yaku manyapina yaku karrutaqa watar dijaranllapa. 54Piru chaypi taqkunaqami yaku karrumanta ishkiqlata Jesustaqa riqsiranllapa. 55Chaymi chay rikaqkunaqa rir tukuyla may lugarkunapi parlakuran Jesuspaqqa. Chayraykumi kusala achka qishaqkunata wintur ima ch'achimuranllapa Jesusman. 56Chaymi Jesusqa maylawpi nir yach'arllapaqa, chay may riyashan nankunapi ima qishaqninllapakunataqa apar yarachiqllapa. Michka pwiblukunapi, ch'akrankunapi, nankunapi ima katinmapis, qishaqninllapataqa yarachiqllapa. Chaymi kusalata Jesustaqa rugaranllapa rach'panpa manyanlamatapis kamananllapapaq. Chaynu chay rach'panpa manyanta tukuy kamaqkunaqa allinna kidaqllapa.

will be added

X\