San Juan 19

1Chaymantaqami, Pilatuqa kach'akuran, Jesusta kusata llibachinanllapapaq. 2Chaymi suldadukunaqa kashamanta rurakasha kurunata Jesustaqa umachiranllapa. Chaynulla uk chupika murada rach'pata yakachiranllapa. 3Chaymantami kushipananllaparayku tukuynin qimikar kaynu niranllapa: --¡Biba Israel pwiblupa gubyirnun! nir. Chaynu nir imaqami, qaqllitanpi maqaqllapa. 4Chaynami, Pilatuqa qashanpis mantakunanmanta yarqamur niran: --Rikayllapa. Nuqaqami paytaqa yarqachimusha kani rikar kwintata qukanaykillapapaq, nuqapaqqa kay runaqa mana ima uchayjunlamapischu nir. 5Chaymantaqami Jesusqa yarqamuran, kashamanta rurakasha kurunata umakusha, chupika murada rach'pata yakakusha ima. Chaymi Pilatuqa niran: --¡Kaypimi kay runaqa! nir. 6Chaynu nitinqa, kurakunapa mantaqninkuna, Dyusta adurananllapa wasita kuytaqkunaqa niranllapa: --¡Kruspi klabay! ¡Kruspi klabay! nir. Piru Pilatuqa paykunataqa niran: --Chaqa, qamkuna apar kruspiqa klabayllapamapis. Nuqapaq-shuypaqa, kay runaqa mana ima uchayjunlamapischu nir. 7Chaynu Pilato nitinqa, Israelmanta karguyjunkunaqa niranllapa: --Nuqakunapaqami uk liyniyllapa kan. Chaymi, chay liyniyllapa nishannuqa, kay runaqa allin wanunanpaq. Chaqa payqa 'Dyuspa Wamran kani' nisha. 8Chaynu nitinllapaqa llallin Pilatuqa kusata manchakuran. 9Chaymi qashan mantakunanman yaykur, tapuran Jesustaqa kaynu nir: --¿Maymantataq qamqa kanki? nir. Piru Jesusqami, mana imatapis willaranchu. 10Chaymi Pilatuqa qashan niran: --¿Manachu imatapis willamayanki? ¿Manachu yach'anki, nuqa washashuyta puytini? nir. Manaqapis ¿mantakutiy kruspi klabashuyta puytinllapa nirqa? 11Jesusqa niran: --Tayta Dyus, mana munasha katinqa, manami imatapis ruramayta puytinkimanchu. Piru mayqanch'i nuqata qamman qukumasha chaymi mas uchayjunqa qammantaqa. 12Chaynu Jesu's nitinmi, Pilatuqa chay kutilla kach'ayta yarpuran imanullapis. Piru chay Israelmanta karguyjunkunaqa kusata lanyaranllapa, kaynu nir: --¡Chay runata kach'arqa, Romapa punta mantaqnin Cesarpaqa mana amigunchu kanki! ¡Mayqanpis mantakuq paylla tikrakarqa, mantakuq Cesarpaqa kuntran! nir. 13Chaynu nitinllapa Pilato uyaparqa, Jesustaqa tukuypa naypanman lluqshichimur, payqa mantakunanpina taran. Chay mantakunan lugarqami shutiq "Rumi Llutakasha Pampa". Nataq hebreo rimaypi-shuypaqa |i"Gabata"|r nir. 14Chaypimi uk diyalana Pascua fyistapaq faltayatin, alas dusi yupayna karan. Chaymi Pilatuqa niran: --¡Kaypimi mantakuqnikillapaqa! nir. 15Piru paykunaqami ashwan kusata laqyaranllapa kaynu nir: --¡Wanunqa! ¡Wanunqa! ¡Kruspi klabay! nir ima. Chaynu nitinllapa, Pilatuqa tapuran paykunataqa kaynu nir: --¿Mantakuqnikillapatachu nuqaqa kruspi klabayashaq? Chaynu nitinqami, chay kurakunapa mantaqninkunaqa niranllapa: --¡Nuqakunapaqa, Cesarla mantakuqniyllapaqa! ¡Manami chiqan mantakuqniyjunchu kanillapa! nir. 16Chaynu nitinllapami, Pilatuqa Jesustaqa paykunatana quran. Chaymi Jesustaqa aparanllapana kruspi klabaq. 17Jesusqa kayashanmantaqa krusninta rikrakur riran, Calavera shutiq lugarmanqa. (Hebreo rimaypiqa chay lugartaqa ninllapa Go'lgota nir.) 18Chay lugarpimi Jesustaqa klabaranllapa ishkay runawan pullata krusllapi, ukninta Jesuspa allilaw qichqanpi, ukninta ichuqlaw qichqanpi. 19Kruspi klabatinllapanaqa Pilatuqa kach'akuran, uk litriru kaynu niqta ch'urananllapapaq: |sc"NAZARETMANTA JESU'S, ISRAEL RUNAKUNAPA MANTAQNIN"|d nir. 20Chaymi chay litrirutaqa Israelmanta achka runakuna liyiranllapa. Chaqa Jerusale'n pwiblupaqa shipchanlapi karan. Chay litriruqami iskribikasha karan hebreo rimaypi, latin rimaypi, griego rimaypi ima. 21Chaymi Israelmanta kurakunapa mantaqninkunaqa niranllapa Pilatutaqa. --Ama iskribiychu 'Israel runakunapa mantaqnin' niqtaqa. Ashwan iskribiy kaynuta: 'Israel runakunapa mantaqnin tukuq' niqta. 22Piru Pilatuqa niran: --¡Chaynu iskribirqami, iskribishana kani! nir. 23Chaymanta suldadukuna Jesusta kruspi klabarllapanaqa rach'pantaqa kwatru partipaq pitir, uk parti kada unu aypakuranllapa. Piru chay atun rach'pa qatakunantaqa mana siranayjun katinmi, mana imanupis partinakuyta puytiranllapachu. Chaqa uk kwirpuyjunlami karan. 24Chaynu katinmi suldadukunaqa, kaynu niranllapa: --Ama llikirchu surtyakushunllapa, mabir mayqanninchikllapashi aypashunllapa nir. Chaynu ruratinllapami Dyus nitin iskribikashanqa kumplikaran. Chaqa niqmi: "Rach'paytami paykunalla ayparanllapa. Nataq qatakuna rach'payta-shuypaqa surtyakur ayparanllapa" nir. Chaymi chaynulla suldadukunaqa ruraranllapa. 25Jesu's klabakashanpa yatanpiqa karanllapa Jesuspa maman Mari'a, Jesuspa mamanpa irmanan, Cleofaspa warmin Mari'a, chaynulla Mari'a Magdalena ima. 26Chaymanta Jesu's mamanta rikar, chay kusa munashan yach'akuqnin mamanpa pullan shaqta rikarqa, mamantaqa niran: --Mamitay, chaypimi wamraykiqa nir. 27Chaynu mamanta nirqa, yach'akuqnintapis niran: --Chaypimi mamayki nir. Jesu's chaynu nishanmanta-pachami, chay yach'akuqninqa Jesuspa mamantaqa payna rikaran, kuytaran imamapis. 28Chaymantami, Jesusqa tukuy imapis kumplikashana nir yach'ashanrayku kaynu niran: --Yakunayani nir. Chaynuqami niran, Dyus nitin iskribikashapi nishan kumplikananpaq. 29Chaynu nitinmi, puqyala rach'pitata isupu qirupi watar, puchqu binu uk jarrupi tayatin nuyuchir, Jesuspa shiminmanqa qimiranllapa. 30Chaymi Jesusqa puchqu binuta kamarnaqa niran: --Tukuymi kumplikashana nir. Chaynu nirqa, pukch'irar wanuranna. 31Samana diyapi Pascua fyista qallarinanpaq katinqami, chay Israelmanta karguyjunkunaqa mana munaranllapachu, chay kruspi klabaraqkunapa kwirpun krusllapi kanantaqa. Chaqa Pascua fyistaqami kusala shumaq fyista karan. Chayrayku Pilatuta rugaranllapa kach'akutin rir chay kruspi klabaraqkunapa ch'ankanta pakitinllapa dasna wanutin, kwirpunta ashuchinanllapapaq nir. 32Chaymi kach'akutinllapa, suldadukunaqa rir, Jesuspa qichqanpi uk klabaraqpa ch'ankantaqa pakiran. Chaynulla chay uk qichqanpi kaqpatapis. 33Piru Jesuspa ch'ankanta pakinanpaq qimikayatinllapa-shuypaqa, wanushana karan. Chaymi ch'ankantaqa manana pakiranllapanachu. 34Piru ashwan chay suldadukunapa ukninqa rir atun puntayjun jyirruwan Jesuspa kustillanta uch'kuran. Chaymi chay kutilla, yawarwan yaku Jesuspa kwirpunmantaqa yarqamuran. 35Kaytaqami uk rikasha chay parlakun. Chaymi chiqapta riman. Chaynulla yach'anpis chiqapta rimayan nir. Chaynu rimatinmi, qamkunapis kriyinaykillapapaq. 36Chaqa tukuy kaykunaqami chaynuqa pasaran Dyus nitin iskribikashankuna kumplikananpaq. Chaqa niqmi: "Manami uk tullunlamatapis pakinqallapachu" nir. 37Chaynullami uk iskribikashakunapipis niq: "Rikakunqallapami uch'kushanllapamatapis" nir. 38Chaymantaqami Arimateamanta Josiqa, Pilatuta rugaran Jesuspa kwirpunta qutin apar pampananpaq. Josiqami, Jesuspa yach'akuqninna karan. Piru chay Israelmanta karguyjunkunata manchashanraykumi, upallala puriq, mana imatapis rimarchu. Chaymi Pilato apar pampay nitinqa, Josiqa rir, Jesuspa kwirpuntaqa aparanna pampaq. 39Chaynullami Nicodemupis ch'amuran, trinta kiluta yupay kusa mishki mutkiypaqla rimidyitukuna mirrawan, aluwita apar. Paymi unaylla uk tuta risha kayaq Jesuswan parlaq. 40Chaynumi, Josiwan Nicodemuqa Jesuspa kwirpuntaqa aypar, rach'pitata chay mishki mutkiypaqla rimidyitukunawan alli salar, pilluranllapa. Chaynuqami ruraranllapa, Israelmanta runakunapa chaynu pampakunanllapapaq kustumrin kashanrayku. 41Chay lugar kruspi klabashanllapapiqa kayaq uk wirta. Chaypiqami kayaqna qaqapi uk uch'ku wanuqkuna pampakananpaq. Piru chaypiqami manaraq mayqanpis pampakashachu kayaq. 42Chaymi chaylapi pamparanllapa, chay yatanlapi katin. Chaqa Israelmanta runakunapa samanan diyamapis qallariyarannari.

will be added

X\