APOCALIPSIS 18

1Saypitanami ricargä munayyog ángil chipipiycar ciëlupita uraycämogta. Say chipipiyninmi intëru pasata asicyapargan. 2Say angilmi fuertipa nimorgan: “¡Ushacashganami, ushacashganami Babilonia marca! Cananga supaycunalanami saycho taycäyan. Saychöga wiscurcuna, condurcuna y tucucunalami wagaycäyan. 3Say marcacho tag runacuna mana pengacuypa jusalicuyashganta ricacurmi waquin runacunapis jusalicorgan. Saynölami Babilonia runacunata ricacur nacioncunapa mandagnin reycunapis Diosta mana cäsucuypa cawayargan. Say marca runacuna imatapis ricashgan cagtaga rantiptinmi negocianticuna segaypa rïcuyäyash.” 4Saynöpis yapay wiyargä ciëlupita Tayta Diosninsi cayno nimogta: “Nogaman yäracamag cäga, say marcapita jucläman gueshpicuyay. Jusalicur cawagcunapita witicuyay. Aywacuyaptiquimi paycunaman castïgo charpis gamcunamanga chämongapäsu. 5Paycunaga pasaypa jusasapami caycäyan. Jusalicuyashgantaga lapantami ricaycä. 6Jusalicuyashganpita paycuna yupami castigash cayangapä. Waquin runacunata nacasiyashganpita paycuna más yupami nacasish cayangapä. 7Runa-tucur alabacuyashganpitami segaypa castigash cayangapä. Paycunaga shonguncho caynömi yarpäyan: ‘Nogaga imaypis manami nacashäsu. Nogaga lapanpäpis munayyogmi caycä. Guërrachöpis manami pipis vinciyämashgasu. Nogaga imaypis manami laquicushäsu.’ 8Sayno cayashganpitami pasaypa nacaycuna paycunaman chäyangapä. Wanuypis, nacaypis y micanaypis elagpitami chäyangapä. Lapanpä munayyog car juzgaptëmi say marca rupaycar pasaypa ushacangapä. 9“Babilonia marcapita goshtay sharcuycagta ricarmi lapan nacioncunapa mandagnin reycuna laquicuyashpan wagayangapä. Say mandagcunaga Babilonia runacunawan shuntacaycushpan Diosta mana cäsucurmi jusalicur cawayargan. 10Say castigashganta ricarmi mansacash carulapita ricaräyanga: ‘¡Walärä! ¡Babilonia marca rupar ushacaycun! ¡Tagay marcaga munayyogmi cargan! ¡Cananga elagpitana ushacaycun!’ nir. 11“Saynömi lapan negocianticunapis wagayanga say marca ushacashganpita. Manami canganasu pipis apayashgan negociuncunata rantiyänanpä. 12Paycunami ranticuyänanpä apayag gorita, guellayta, cuyaylapä chipipiycag rumicunatapis, lïnupita rurash tëlata, sëdapita rurash tëlata y segaypa chanin puca-chiclu tëlatapis, tucuy-nirag fïnu tablacunata, cuyaylapä mar lpita, broncipita, ërrupita y marmolpita rurash aläjacunata y imaycatapis. 13Saynölami ranticuyänanpä apayag canëlata, inciensuta, mïrrata y tucuy-nirag mushcog jachacunatapis. Saynölami apayag vïnuta, aceitita, jarinata, trïguta, cargacuna cag uywacunata, uyshacunata, caballucunata y cärrucunatapis. Saynölami runacunatapis ranticuyag ashmaynin cayänanpä. 14Saychömi say negocianticuna laquicur say marcata niyanga: ‘Naupataga imatapis munayashgayquitami tariyargayqui. ¡Cananga manami imatapis tariyanquipänasu! ¡Cuyaylapä imayquipis cashgan cagcunaga ushacashganami caycäyan! ¡Rïcu cayashgayquinöga y ali mödanash cayashgayquinöga imaypis cayanquimannaräcu!’ nir. 15“Say marcacho rïcuyag negocianticuna marca rupaycashganta ricaycurmi wagashpan carulapita mansacash ricaräyanga cayno nir: 16‘¡Walärä! ¡Say cuyaylapä marca pasaypa ushacash! Say marca cuyaylapä car lïnupita rurash puca-chiclu ali mödanash warminömi cargan. Goriwan, perlascunawan y cuyaylapä chipipiycag rumicunawan adornash warminömi cargan. 17¡Say riquëzancunaga elagpita chipyagmi ushacaycun!’ “Barco manijag runacuna y barcucho lapan arupacogcunapis carulapita ricaraycar quëdacuyanga. 18Say marcapita goshtay sharcogta ricarmi segaypa wagayanga: ‘Manami may marcapis cashgasu say marcano segaypa cuyaylapäga’ nir. 19Pasaypa wagar gaparäyashpanmi alpatapis umancunaman chänanpä junagpa jitayanga: ‘¡Walärä! ¡Cuyapaypämi caycan Babilonia marca! Say marcachömi barcuyogcuna negociunta ranticur lapanpis rïcuyäyash. Cananga elagpitami say marca rupar pasaypa ushacäcush’ nir. 20Gloriacho cagcuna, yupa cushicuyay cay Babilonia marcata Tayta Diosninsi ushacäsishganpita. Tayta Diospa apostolnincuna, profëtancuna y payman lapan yäracogcunapis cushicuyay. Jusalicur cawayashganpitami Tayta Dios say marcata chipyag ushacäsish.” 21Saypitanami munayyog juc ángil mulïnu-nirag rumita jogarcur lamarman jitarergan cayno nir: “Babilonia marcacho tagcuna, cay rumita elagagpä lamarman jitarishgänömi gamcunatapis Tayta Dios elagäsiyäshunquipä. Gamcunataga imaypis manami runacuna ricayäshunquipänasu. 22Manami imaypis wiyayanquipänasu arpata, pinculluta, ni cornëtatapis cälliquicunacho tucaycäyagta. Saynöpis marcayquicho manami ima runapis canganasu ima aruyta arunanpäpis. Mulïnu agaycashganpis marcayquicho manami wiyacanganasu. 23Pipis mana taptin mechërupis mananami asicyanganasu. Casaray estapis mananami canganasu. Babilonia marcacho negocianticuna más munayyog captinpis marcayqui ushacangapämi. Brüju car may-saychöpis tag runacunata engañayashgayquipitami sayno ushacäyangapä. 24Say Babilonia marca runacunami Tayta Diosninsipa profëtancunata y payman yäracogcunata may-saychöpis wanusiyash. Sayno cayashganpitami paycunata lapanta ushacäsengapä.”

will be added

X\