SAN LUCAS 1

1Cuyay waugui Teó lo: Noga Lucasmi cay libruta Jesucristupita gampä guelgamö. Jesucristo wilacuyta galaycushganpita-pasami lapan rurashgancunata apostolnincuna ricayargan. Ricayashganta wilacuyänanpämi apostolnincunata Jesús cachargan. Paycuna wilacuyaptinmi wiyagcuna Jesuspita ascag guelgayash. Saymi nogapis cay libruta guelgä, galaycushganpita-pasa imano cashgantapis shumag tapucurcur. Saynöpami Jesucristupita yachasiyäshushgayquita más tantyanquipä. 5Israel nacioncho Herodes mandag rey caycänan wisanmi juc cüra cargan Zacarías jutiyog. Paymi cargan Abías cürapa castan. Zacariaspa warminmi cargan Elisabet. Paypa taytanpis cürami cargan. 6Paycunaga Tayta Diosninsi mandashgancunata cumplirmi imaypis cawayag. Saymi paycunapäga washanta pipis parlayagsu. 7Ishcanpis chachanami cayargan. Chacwanyashganyagpis Elisabetpa wawan manami cargansu. 8Saypitami Zacariaspa y cüra mayincunapapis turnun chämuptinna Jerusalenman aywayargan templucho Tayta Diosninsita sirviyänanpä. 9Saychömi imaypis rurayashganno suertitarä jitayargan maygan cürapis templuman incienso rupaseg yaycuyänanpä. Saymi suerti yargamorgan Zacariaspä. 10Sauraga Zacarías templo rurinman yaycuycur inciensuta rupasishganyagmi lapan runacuna Tayta Diosta manacuycäyargan templo patiucho. 11Templucho inciensuta rupaycäsiptinmi altarpa derëcha cag läduncho Tayta Diosninsipa angilnin Zacariasta yuripargan. 12Say angilta ricaycurmi Zacarías yupa mansacargan. 13Saymi ángil cayno nergan: “Zacarías, ama mansamaysu. Tayta Diosninsimi wiyashushcanqui manacushgayquita. Saymi warmiqui Elisabet gueshyacongapä olgu wamrata. Paypa jutinta churapanqui Juan cananpä. 14Suriqui yuriycuptinmi yupa cushicunquipä. Saynöpis lapan runacunami cushicuyangapä. 15Tayta Diosninsipa wilacuyninta wilacogmi suriqui cangapä. Manami vïnuta ni ima shincäsicogcunatapis upongasu. “Mamanpa pachancho cashganpita-pasami Santu Espíritu payta yanapangapä. 16Saymi Diospa wilacuyninta wilacuptin Israel runacuna jusancunata cacharir Tayta Diosninsi munashganno cawayangapä. 17Tayta Diosninsipa profëtan Elías wilacushgannömi paypis wilacongapä. Saynömi runacunata yäsenga wayinchöpis cuyanacur cawayänanpä. Jusalicur cawacogcunatami yäsenga Tayta Diosninsi munashgannöna cawayänanpä. Saynöpami runacunata yachasenga Cristo shamuptin ali chasquicuyänanpä.” 18Ángil sayno niptinmi Zacarías taporgan: “¿Imanöpatä musyäman nimashgayquicuna rasunpaypa cashganta? Nogaga auquinnami cä. Saynömi warmëpis chacwanna caycan. Sayno caycaptëga ¿imanöpatä surë canman?” 19Saymi ángil nergan: “Tayta Diosninsipa wilacognin Gabrielmi caycä. Paymi cachamash suriqui yurinanpä cashganta wilanäpä. 20Cay wilashgäcunaga lapanpis cumplengapämi. Nishgäcunata mana criyishgayquipitami cananga shimiqui watpash cangapä suriqui yurishganyag.” 21Sayyagmi templo patiucho runacuna shuyaraycäyargan: “¿Imanirtä cay hörayag Zacarías yargamunsu?” niyashpan. 22Saymi templupita yargarcamurna shimin watpash captin sëñalapana tantyasergan shuyaraycagcunata. Sauraga shuyaraycagcuna tantyayargan templo rurincho imapis yuripashganta. 23Saypitaga turnunta ushasquirnami wayinpana Zacarías cuticorgan. 24Saypitanami warmin Elisabet gueshyag ricacur pisga quilantin wayinpita mana yarguypa täcorgan. 25Cushicushpanmi nergan: “Tayta Diosmi nogata cuyapämash. Cananpitaga runacuna mananami jamuräyämanganasu wawaynag cashgäpita.” 26Elisabet gueshyag ricacushganpita sogta quilatanami Tayta Diosninsi cachamorgan ángil Gabrielta Galilea provinciacho caycag Nazaret marcaman. 27Saychömi virgen Mariata watucargan. Mariami aunishgana caycargan rey Davidpa castan Josëwan tänanpä. 28Chaycurmi ángil nergan: “¡María! ¡Tayta Diosninsi acrashganmi caycanqui!” 29Sayno niptinmi María yarpachacorgan: “¿Imanirtä sayno niman?” nir. 30Sayno yarpachacuycaptinmi ángil nergan: “María, ama mansamaysu. Tayta Diosninsimi gamta cuyashunqui. 31Cananpitaga gueshyagmi ricacunqui. Wawayqui yurenga olgumi. Paypa jutinmi canga Jesús. 32Payga munayyogmi cangapä. Saymi payta niyanga Diospa surin cashganta. Paytami Tayta Diosninsi churanga mandag rey cananpä, unay castan Davidtano. 33Paypa maquinchömi Israel runacuna imayyagpis cayangapä.” 34Sauraga María taporgan: “Runata manarä reguerga ¿imanöpatä gueshyag ricacöman?” 35Niptinmi ángil nergan: “Santu Espíritu gamman shamuptinmi Tayta Diosninsipa munayninwan gueshyag ricacunquipä. Saymi wawayquipä runacuna niyanga Diospa surin cashganta. 36Saynömi castayqui Elisabetpis, chacwanna caycar, gueshyacongapä. Paytami runacuna: ‘Golog warmi’ niyargan. Sogta quilanami payga gueshyag caycan. 37Tayta Diosninsipäga manami imapis ajasu.” 38Saymi María nergan: “Nogaga Tayta Diospa maquinchömi caycä. Sayno captenga pay munashganno cayculäsun.” Saypitanami ángil aywacorgan. 39Ángil nishganpita waraynincuna María aywargan Judea provincia jircacho caycag marcaman Elisabetta watucananpä. 40Zacariaspa wayinman chaycurmi saludargan Elisabetta. 41Saludaptinmi Elisabetpa pachancho caycag wamrapis cuyorgan. Sauraga Santu Espiritupa munayninwanmi Elisabet cushicushpan nergan: 42“¡Lapan warmicunapitami Tayta Diosninsi gamta acrashushcanqui! Gueshyag caycashgayqui wawayquita paymi imaypis yanapanga. 43Cristupa maman caycar watucamänayquipäga ¿pitä cä noga? 44Saludamashgayquita wiyaycur pachächo caycag wawäpis cushicur cuyushmi. 45¡Tayta Diosninsi nishushgayquita cumplinanpä cashganta criyishgayquipitami imaypis yanapäshunquipä!” 46Saymi María nergan: “Lapan shongöwanmi Tayta Diosninsita alabä. 47Salvacog Tayta Diosninsi acramashganpitami cushicö. 48Mana merëceg captëpis Tayta Dios cuyapämarmi acramash. Cananpitaga imaypis runacuna niyanga Tayta Dios acramashganta. 49Munayyog Tayta Diosninsi alimi ricamash. Paynöga manami pipis cansu. 50Pay munashganno cawagcunataga imaypis cuyapanmi. 51Pipis mana rurashgancunatami payga ruran. Yachag-tucogcunataga manacagmanmi churan. 52Mandag cashganpita nación mandagcunatapis gargun. Mana runa-tucogcunatami isanga ali cawayänanpä yanapan. 53Muchuycho cagcunatami micuyta puestupan. Mana cuyapäcog rïcucunatanami isanga yanapannasu. 54Abrahamta promitishganta cumplirmi paypita miragcunata imaypis yanapan. Saymi Israel runacunata mana gongaylapa cuyapan.” Sayno nirmi Tayta Diosninsita María alabargan. 56Elisabet cagcho quimsa quilano tarcurnami wayinpana María cuticorgan. 57Elisabetpa quilan tincusquiptinnami olgu wamrata gueshyacorgan. 58Wawayog cananpä Tayta Diosninsi payta yanapashganpitami castancuna y reguinacuyashgancunapis cushicuyargan. 59Saymi puwag (8) junagyog wamran caycaptin Zacariaspa wayinman paycuna aywayargan wamranpa cuerpunta señalayänanpä. Saychömi taytanpa jutilanta jutisiyta munayargan. 60Saymi maman nergan: “¡Manami sayno jutin canmansu, sinöga Juan casun jutenga!” 61Elisabet sayno niptinmi waquin runacuna niyargan: “Castayquicuna say jutiyog mana caycaptenga ¿imanirtä munanqui Juan jutin cananta?” 62Sauraga ima jutita churayänanpäpis sëñalapa Zacariasta tapuyargan. 63Tapuyaptinmi pay manacorgan tacshala tablata saycho guelgananpä. Nircurna saycho guelgargan: “Juanmi jutin canga” nir. Zacariaspis surinpa jutin Juan cananta munaptinmi saycho cag runacuna äyacash ricacuyargan. 64Sauraga jinan hörami shimin pashtarcuptin Zacarías Tayta Diosninsita alabargan. 65Saycunata ricaycur lapan reguinacuyashgan cushicuyargan. Say päsashganpitami pï-maypis parlayargan intëru say marcacunacho. 66Sayta wiyagcuna yarpachacuyargan: “¡Cay wamra winarcur ima munayyogrä cayconga!” Runacuna parlayashgannölami say wamrata Tayta Diosninsi yanapargan. 67Saymi Santu Espíritu tantyasiptin Zacarías nergan: 68“Israel runacunata yanapag Tayta Diosninsi alabash cayculäsun. Payga salvamänansipänami caycan. 69Pay munashganno cawag Davidpa castancunapitami munayyog salvador yurengapä. 70Sayno cananpämi unaypita-pasa musyasimargansi wilacog profëtancunawan. 71Saynöpis musyasimargansi contransicunapita jorgamänansipä cashganta. 72Abrahamta y paypita miragcunatapis promitishgancunataga manami gongashgasu. 74Saymi cananga chiquimagninsicunapa maquincho cashgansipita Tayta Diosninsi jorgamäshun pay munashganno mana mansacuypa waran waran cawanansipä.” 76Zacarías sayno niyta ushasquirmi wamrantana nergan: “Cristuta chasquicuyänanpä wilacuptiquimi runacuna musyayanga Tayta Diosninsipa profëtan cashgayquita. 77Wilacognin carmi runacunata tantyasinquipä Tayta Diosninsi perdonar salvananpä cashganta. 78Runacunata cuyaparmi Tayta Diosninsi Cristuta cachamonga. 79Saymi Cristo shamur sacäpacushno cawagcunata tantyasengapä jusancunata cacharir Tayta Dios munashgannöna cawayänanpä.” 80Juanga winaylantami Tayta Dios munashganno ali cawargan. Sunyag jircalacho targan Tayta Diosninsipa wilacuyninta Israel runacunata wilapayta galaycushganyag.

will be added

X\