Matius 17

1Annanni benginna puhanna ia too, iya umbabaim Petrus Puang Yesus anna indopi to ma'solasubum isanga Yakobus sola Yohanes, anna le'ba'i längäm mesa tanete malangka', anna yaboi paka-paka ia. 2Iya naitam indo to tallu tieli' hupanna Puang Yesus. Indo lindona pangkähhä susi mata allo anna indo pohebana mesilo mabussä'. 3Pissananna, naita ham duka' indo dua nabi yolona isanga Musa sola Elia mahassam sipa'tula' Puang Yesus. 4Iya ma'kadam Petrus lako Puang Yesus naua: "O Debata, tä'um deem la susi kamasannangantaa' eta inde. Kela muaku anna kupake'desangkoa' tallu bahum: mesa Iko, mesa Musa anna mesa Elia." 5Mahassampi ma'tula' Petrus, iya tuhummi gabum mabussä' ussikuku'i indo ongeam. Anna dihingngii kamaha buttu illaam mai indo gabum naua: "Iam too inde Änä' pa'pakamajangku to umpomasannam penabangku. Pahallua' la umpehingngii!" 6Nahingnginna indo kamaha, iya sangngim muoppäm dokko litä' aka tä' deem pada samahea'. 7Sapo' tappa napellambi'i Puang Yesus anna nahaka'i napasindum naua: "Bangongkoa', daa ummahea'!" 8Umbangongam siaham duka' ulunna, iya angga ham mesa-mesanna Puang Yesus naita. 9Tappana tuhunni Puang Yesus sola indo to tallu yabo mai indo tanete, iya napakahi'dim naua: "Deem aia' la untula' säkä indo to puhaa' muita yabo tanete le, ke tä'i puhaä' dipatibangom to disangai Änä' Mentolino dio mai alla'na to mate!" 10Iya nakutanaim passikolanna naua: "Sapo' maaka hia anna nauai to ullatta' Pepaondonganna Musa: 'Tä' mala tala sule yolo nabi Elia anna mane sule indo To dilanti' la mepasalama'?' " 11Natimba' Puang Yesus naua: "Abana pahallu la sule yolo Elia umpatoka ingganna-ingganna sia. 12Sapo' kuuaangkoa' tentomai: Abana puham sule Elia, sapo' tä' naissam hupatau nasuhum ia siam anna ia napogausam. La susimä' too duka' to disangai Änä' Mentolino, la ia siam anna ia napogausannä' hupatau." 13Tappana nahingngi passikolanna indo pa'tula'na, iya mane sikanapähäm di pole' naua: "Yohanes to si mantedo' päläe' nauaam: 'Elia.' " 14Tappana ma'pasule Puang Yesus sola indo tallu passikolanna lako indo tau buda, iya sule siaham mesa tau anna ma'balinguntu'i dio olona Puang Yesus 15napasindum naua: "O Tuam! Kamaseiannä' kao änä'ku anna umpabono'i, aka limpu mänesam anna tä' deem pada sanasussai. Aka si bassa' punala songka tama api anna deem toi lu dokko uwai. 16Anna puham kubabaam lako passikolammu, sapo' tä' mala napabono'." 17Iya ma'kadam Puang Yesus naua: "Kukapusa'i si'dakoa' pole' inde to tubo lapi' temo, aka kuhäm sugali'a' kamatappasammu! Anna tä' liupia' muissam usse'la kamapiaam anna kakadakeam. La pada polepi isanga umba masäena sola-solakia' anna la pada polepi isanga umba masäena la kusa'bahasangkoa'?" Mane nauai: "Babaannä' mai itim änä'-änä'!" 18Iya nakissä'im Puang Yesus indo setam illaam kalena indo änä'-änä'. Iya tappa bono' eta siaham. 19Puhai, iya napellambi'im passikolanna sapo' paka-paka ia ham anna nakutanai naua: "Maaka hia isanga anna tä'i kami' mala kihambai lao indo setam?" 20Iya natimba'im Puang Yesus naua: "Aka kuhäm sugali'a' kamatappasammu. Setongam-tonganna, maka' la deenna' kamatappasammu moi podo padam i'di', iya tä' deem aka-aka la ungkapusa'i. Maka' ussua inde dio buntu mentieli' lako ongeam senga', tä' mala tala tieli'. [ 21Sapo' inde setam susi, tä' sia mala disua lao ke tä'i tau ma'sambajam yolo sola puasa.]" 22Tappana ma'mesai Puang Yesus sola passikolanna dio lembäna Galilea, iya nauam Puang Yesus: "Kao to disangai Änä' Mentolino la dibeho tama pala' limanna hupatau. 23La napateiä', sapo' illaam allo katallunna la dipatibangonnä' sule." Tappana nahingngi ingganna passikolanna pa'tula'na, iya tä' deem pada samasussa nasi'dim. 24Tappana sule Puang Yesus sola passikolanna lako kota Kapernaum, iya sule siaham indo to si uhhempum tanggunganna tau tama Banua Debata umpellambi'i Petrus anna nauaanni: "Si nabaja' daka duka' tuangguhummua' indo tanggungam tama Banua Debata?" 25Natimba' Petrus naua: "Io, si nabaja'!" Tappana sule tama banua Petrus, iya tä'pi deem ma'tula' anna nakutanaim Puang Yesus naua: "Maaka iko susi pikkihammu Simon diona indo sima si dibaja' lako to ma'pahenta? La ha'ja' illaanna haka botto umbaja'i, la ha'ja' lakona haka ongeam senga', indo to puha nataloi?" 26Natimba' Simon Petrus naua: "Indo ha'ja' lako ongeam senga'!" Iya nauam Puang Yesus: "Dadi maka' tä'um ia pahallu mamaja' ha'ja' illaam botto, iya la susingki' too duka' tä'ungki' pahallu la umbaja' tanggunganta tama Banua Debata aka issinnangki' kapahentaanna Puang Allataala. 27Sapo' päbäim too tabaja', indana masussai penabanna. Dadi le'ba'ungko popekam lako le'bo' Galilea. Alai indo bau uhuna naala pekammu anna umbekkä'i sädäna, aka la ullambi'um too doi' illaam la ganna' tabajasam tanggunganta duaki' tama Banua Debata. Alai indo doi' anna laoko umbajasangki' tanggunganta."

will be added

X\