Markus 7

1Pissam wattu sulei yabo mai Yerusalem sanaka-naka to illaam kakalebuanna Parisi anna to ullatta' Pepaondonganna Musa umpellambi'i Puang Yesus. 2Wattu eta too muita sanaka-naka passikolanna Puang Yesus mangngande bäbä, tä' umbasei yolo limanna situhu' kabiasaanna to Yahudi. 3Aka situhu' kabiasaanna nene to naponene to illaam kakalebuanna Parisi anna to Yahudi senga', si tä' mala mangngande ke tä'i umbasei yolo limanna. 4Anna maka' sule dio mai pasa' tä' mala mangngande ke tä'i membase yolo. Anna napepaondongam toi duka' lako peampoanna naua: "Manggi' tau umbasei ihusam, tehhesam, anna ingganna pangkakka' gällä," anna budapi kabiasaam senga' manggi' natuhu'i. 5Iam too anna mekutanam lako Puang Yesus naua: "Akanna tä'i untuhu'i kabiasaanna nene to taponene indo passikolammu, mangngandei bäbä, tä' umbasei yolo limanna?" 6Natimba' naua: "Ikoa'-iko anggangkoa' ma'pudu' pandem anna ma'lila manähä. Abana tappa' kadanna Puang Allataala natula' loppo' nabi Yesaya yolona diona panggauammua' naua: 'Itim matim tau dio bäbä pudu'na napa'kasalleiä' sapo' setonganna illaam penabanna napemboko'iä'. 7Alla'um napenombaiä' aka anggam pepa'guhuam hupatau napepatuduam, mato-mato ia kupepatuduam anna taia hia.' " 8Mane nauai Puang Yesus: "Umpa'bahinni'ikoa' pahentana Puang Allataala anna muanda'-anda'ikoa' kabiasaam hupatau. Si manähhäkoa' untampeam pahentana Puang Allataala anna umpasulleia' kabiasaammu! 10Puham napaondom Musa naua: 'Pa'kasalleiko ambemu sola indomu;' anna: 'Menna-menna umpakaänä'-änä' ambena battu haka indona, tau ia too la dipatei.' 11Sapo' si muua hia' iko ma'patudu lako tau: Tä' tau pahallu muola oloanta lako ambeta sola indota ke diuai: 'Indo la kutahiaiangkoa' battuam, puham kupehumalasam lako Puang Allataala.' 13Kahana umpateenna', iya umpa'pa'deingkoa'i pahentana Puang Allataala anna kabiasaammuia' umpalako. Anna budapi susinna si umpogau'a'." 14Puhai ia too, iya untambaim tau buda Puang Yesus anna napa'tula'i naua: "Pehingngii manappaia' inde tula'ku anna umpaillaam penabai! 15Ingganna lu tamanna kalena tau tä' ia la nakadakei, sapo' messubunna hi tia illaam mai kalena iam too ungkadakei. [ 16Pehingngiia' anna umpaillaam tambu'ia' inde tula'ku!]" 17Puhai ma'tula', umpelleim indo tau buda anna lu tamai mesa banua, iya nakutanaim passikolanna naua: "Aka kalembasanna indo pehapangam untula' ingngena'?" 18Iya natimba'um naua: "Aka tä'paka' tiko duka' muissam? Aka kinande dipatama sädä tä' ia ungkadakei hupatau, 19aka ia too tä' lu tama penaba sapo' lu tama tambu', anna tahhu' ditibe lao." Naägä'i Puang Yesus natula' kada ia too, anna mala naissam tau buda naua tä' deem kinande pemali diande. 20Mane ma'kada polei Puang Yesus naua: "Indo hia mengkalao illaanna penabanna hupatau lemba' dio panggauanna ia hi tia ungkadakei, susinna: pikkiham kadake, gau' sessu', maboko, papateam, lullusam bannetau, mailu anna matinna, gau' kadake, manipu, mohäe sugali', kembuhu, ma'pakolo'-kolo'i, malangka' penaba, anna tä' muissam se'la. 23Ingganna kakadakeam ia too mengkalao illaam penaba anna iam too ungkadakei hupatau." 24Puhai ia too umpelleim Galilea Puang Yesus anna le'ba'i lako lembäna Tirus. Sulei lako melolo tamam mesa banua, aka pattujunna indana deenni muissanni kasuleanna. Sapo' tä' dia mala aka naissam liu tau kasuleanna. 25Pissananna deem mesa baine tappa naissam kasuleanna, iya napellambi'im napasindum ma'balinguntu' dio olona anna nauai: "Kupelau kela mala umpabonosannä' änä'ku baine, aka napentamai setam." (Indo baine taia to Yahudi sapo' to Siro-Penesia.) 27Sapo' natimba'i Puang Yesus naua: "Päbäii duka' medea' yolo änä' ikale aka tä' mapia kela dialai kinande dipatokaam änä'-änä' anna ditibeanni lako asu." 28Naua oom indo baine: "Abana tappa'ko, Tuam! Sapo' kuua hi kao, indo asu dio ibi' meja mala hi tia duka' muande kinande honno'na änä'-änä'." 29Nasuhum ma'kada Puang Yesus naua: "Uhhuako kada, dadi le'ba'ungko aka indo setam to umpentamai änä'mu, mäläim illaam mai kalena." 30Iya le'ba'um indo baine lako banuanna. Sulei lako, ullambi'um änä'na metindo masannam, aka indo setam to umpentamai mäläim lao. 31Lessu'i eta too, umpelleim lembäna Tirus Puang Yesus anna untahhusanni pa'laoanna lako le'bo' Galilea naola lako Sidon, muolai lembäna Sapulo Kota. 32Wattu eta too deem sanaka-naka tau sule umpasola mesa tau ia binga ia mämä. Napelaum naua: "O Tuangguhu, antiangkam inde to bingangki anna mala bono'." 33Iya natässu'im duka' Puang Yesus indo to binga dio mai alla'na tau buda anna napalao senga'i mane napehhosisanni tahuno-hunona tama talinganna mane untikkudui tahuno-hunona anna natu'doanni lilana. 34Anna mentongai längäm langi' napasindum umbussangam penabanna mane ma'kadai naua: "Efata!" (kalembasanna: |i"Titungka'ko!|r"). 35Iya tappa titungka' siaham talinganna indo tau anna makalesom pole' pa'tula'na. 36Ingganna indo to sule wattu eta too napakahi'di asam Puang Yesus nauaam: "Deem aia' untula' le, moi la menna tala untulasanni." Sapo' tuttuam dilaham, tuttuam napalele mandi sau' dekke. 37Ingganna to uhhingngii kaheba ia too sangngim pilla' anna mängä-mängä naua: "Tä' deem tanaissam napadadi. Mala umpopahingngi to binga anna mala umpatappa' tula'na to mämä."

will be added

X\