Lukas 24

1Bengi-bengipi indo allo Minggu eta too, iya le'ba'um sanaka-naka baine lako indo ku'bu' umbaba bauam bubanau' indo puha napatoka. 2Sulei lako, iya naitam indo batu dilapasam ba'ba lokko' puham dilolim lao. 3Iya le'ba'im tama indo lokko', sapo' tä'um deem nalambi' indo bakkena Puang Yesus illaam. 4Mahassanni ma'papusa'-pusa' muitai, iya pissananna ham ke'de' dio ampe'na dua tau bassim ma'poheba pangkähhä. 5Naitanna, iya sangngim mahea' lambi' muoppä dokko litä' menomba. Sapo' ma'kada indo tau naua: "Akanna umpeäkoa' to tubo illaam alla'-alla'na to mate? 6Pa'dem inde aka tubom sule! Tä' daka ungkilalai indo puha natulasangkoa' indo anna diopokoa' Galilea 7naua: 'Änä' Mentolino la dibeho lako pala' limanna to madosa, la napatei yabo kaju sitambem, anna illaam allo katallunna la dipatibangom sule.' " 8Mane nakilalai hi indo tula'na Puang Yesus. 9Tappana sulei dio mai indo ku'bu', iya natula' asammi ingganna indo kaha-kaha naita lako indo to sapulo mesa suhona Puang Yesus sola ingganna to si untuhu'i. 10Indo baine to sule untula' indo kaha-kaha ia too isanga Maria Magdalena, Yohana, Maria indona Yakobus, anna deempi sanaka-naka solana. 11Sapo' indo ingganna suho tä' ungkatappa'i indo baine aka nasanga hia ma'tula' sasa bäbä. 12Sapo' tappa ke'de' ia Petrus lumumpa' lako indo ku'bu'. Sulei lako, lumukkum naolläi tama indo lokko', iya naitam angga ham pebalunna tihongkä' illaam. Iya ma'pasulem Petrus napasindum napenaba-nabaam kaha-kaha ia too. 13Allo eta too deem dua pentuhu'na Puang Yesus lao lako mesa tondä' isanga Emaus, umbai' sapulo mesa kilo alla'na Yerusalem. 14Mahassanni mellao, natula'um indo ingganna kaha-kaha to puha dadi. 15Mahassanni sipa'tula', sule ham Puang Yesus anna mellaoi sola-sola. 16Muita Puang Yesus sapo' deem ullabai matanna nasuhum tä' naissam. 17Iya ma'kadam Puang Yesus naua: "Aka hia' iko untula' mahassam mellao?" Iya bassim tohhom, manabo inabanna diita. 18Ma'tula'um indo mesa isanga Kleopas naua: "Ingganna tau to längäm Yerusalem, umbai' anggam iko tä' muissanni indo kaha-kaha puha dadi yabo sanaka benginna lessu'!" 19Nakutanaim Puang Yesus naua: "Kaha-kaha aka hia dadi?" Natimba' naua: "Diona indo Puang Yesus to Nazaret, mesa nabi to naponnoi kuasa susi illaam tula'na teem pa'palakoanna dio olona Puang Allataala anna ingganna hupatau. 20Nabeho ingganna kapala sando anna pepungngu'ta lako to ma'pahenta anna mala natahungkum mate. Iya napäso'im yabo kaju sitambem lambi' mate. 21Moi kela daa Ia ha kihannuam la ullappasam to Israel. Anna temo allo katallunnam anna dadii kaha-kaha ia too. 22Mane deenni, sanaka-naka baine illaam kamesaangki sulekam napatikkedu'. Aka bengi-bengipi anna le'ba'um lako indo ku'bu', 23sapo' tä'um deem nalambi' bakkena. Iya ma'pasulem anna natulasangkanni naua: 'Muitakam dua malaika' anna natulasangkam naua: Tubom sule Puang Yesus!' 24Iya le'ba' siaham sanaka-naka solaki lako indo lokko' anna nalambi' si'da susi liu indo pa'tula'na baine. Anna pa'dem Puang Yesus nalambi'." 25Ma'kadam Puang Yesus naua: "Abana mahokoa'! Aka tä' liupia' mala ungkatappa'i indo tula'na ingganna nabi. 26Aka tä' daka tia indo To dilanti' la mepasalama' la pahallu ussi'dim yolo ingganna indo pandahhaam mane ullambi'i kamatandeanna?" 27Mane napomakalesoanni Puang Yesus ingganna indo to puha tisuha' diona kalena illaam Pepaondonganna Musa anna suha'na ingganna nabi. 28Mahassampi ma'tula', iya la lambi' kalem lako indo tondä' la naongei. Naägä'i lelemmi Puang Yesus la tahhu', 29sapo' bassim nakekke' naua: "Tatohhonna' pa'bengi aka la bengim." Iya tohhom duka' Puang Yesus la ma'bengi sola. 30Tappana muokko'i la mangngande, iya mualam hoti Puang Yesus anna nasambajannii mane napiä'-piä'i nabeem. 31Mane naissam di pole' naua Puang Yesus siam ia, sapo' tappa pa'de bäbä naita. 32Iya sipa'tula'um naua: "Iam päläe' anna susi sugali'um tialanna inabanta indo sipa'tula'kia' muola lalam anna napomakalesoangki' diona issinna Battakada Debata!" 33Wattu eta too tappa ke'de' siaham mengkalao längäm Yerusalem indo to dua. Sulei längäm, nalambi'um indo to sapulo mesa passikola anna ingganna solana mahassam ma'hempum. 34Ma'kada indo to ma'hempum naua: "Abana tubo si'dam sule Debata aka puham umpellambi'i Simon." 35Iya tappa natula'um duka' indo to dua diona indo puha dadi illaam pa'laoanna. Anna nauapi duka': "Ia ham mane kiissanni kiua Puang Yesus dia, tappana umpiä'-piä' indo hoti." 36Mahassam siapi sipa'tula'-tula', pissananna ke'de'-ke'de' bäbä ham Puang Yesus illaam alla'-alla'na anna ma'kadai naua: "Kehongko'koa' anna maupa' nalambi'ungkoa' kamasannangam." 37Sangngim tikkedu' anna mahea' aka nasanga anitu. 38Sapo' ma'kada Puang Yesus naua: "Akanna mahea'koa'? Akanna bata-bataia' penabammu? 39Petua' siaia' inde limangku sola pala' bitti'ku. Aka Kao hi to Kao. Haka'ä' ammu pengkalesoiä' anna muissam manappaia'. Aka anitu ia tä' deem balena anna tä' deem bukunna. Sisala inde muitaä' temo." 40Puhai naua, iya umpa'paitaammi limanna sola pala' bitti'na. 41Sapo' tangkaam siapi nakatappa'i, napobua' katilallasanna anna kamängä-mängäanna. Iya mekutanam Puang Yesus naua: "Deem daka kinandemua' inde?" 42Iya nabeemmi mesa bau tunu. 43Naalam Puang Yesus anna naandei dio olona passikolanna. 44Puhai, ma'kada oom naua: "Iam too inde indo kaha-kaha si kutulasangkoa' wattunna anna sola-solapakia', kuua: Ingganna indo puha tisuha' illaam Pepaondonganna Musa, suha'na ingganna nabi, anna illaam suha' Pampujiam diona kaleku tä' mala tala sule lako asam." 45Mane sangngim naissam manappa hi pole' kalembasanna issinna Battakada Debata aka nabukkaiammi Puang Yesus pikkihanna. 46Mane ma'kada pole oi naua: "Puha tisuha'um illaam Battakada Debata naua: To dilanti' la mepasalama' la ussi'dim pandahhaam anna la tibangom sule dio mai kamateam illaam allo katallunna. 47Anna illaam sanganna pahallu duka' dipa'pakahebaam lako ingganna tau illaam inde lino diua pahallu mengkatoba' hupatau anna mala naampunniam dosana Puang Allataala. Anna ingganna ia too la dipa'pakahebaam napahandu' inde Yerusalem. 48Ikonna' too la mendadi sa'bi diona kaha-kaha ia too. 49Anna la kupasuleangkoa' Penaba Maseho to puha nadandi Ambeku. Sapo' la hapa'pokoa' illaam inde kota sule lako napakatoto'koa' indo kakuasaam yabo mai suhuga." 50Lessu'i ia too, iya le'ba'um Puang Yesus umpasola passikolanna messubum illaam mai kota anna lakoi mesa ongeam sikahuku' tondä' Betania. Dioi, muäkä'um limanna anna untamba'i passikolanna. 51Mahassanni natamba', iya tiäkä'um längäm suhuga umpellei passikolanna. 52Iya sangngim menombam mane ma'pasulei lako Yerusalem naponnoi kakassiam. 53Anna allo-allo illaam Banua Debata umpuji sanganna Puang Allataala.

will be added

X\