1 Hat ta naq nuxib'aal jinaj ta xqa'an wii' qach'uuch' awuuk' nee naq i rub'an chi nee tinutz'ub' pantaq b'eeh, atoob' ta nee naq qoh kilow xama' awach ta naq neenkaqse'lanik weh. 2 Eh nee naq ti nuk'am i koq parupaat i qatuut re' naq chik i hat neetitijinik weh, eh nee naq i nuyeew aweh chi uuk'jik ink'ohnik laj vino, korjinaq ruuk' i riis granado. 3 Chi je' re' nee naq inakoj chee rutz'eet aq'ab' rijwalaq, eh ruuk' naq i rusak'aaj aq'ab' nee kinaq'ahcheej. 4 Re' hin i nuq'or taq aweh i hat ixoq aj Jerusaleem chi majot' taq i koq ruuk' i ruwiriik ixoq q'e' nuk'ax, cha kanaa' taq konik' pa' neenwuktik. 5 ¿Awach i xchalik chupaam i ye'aab' chiq yuuq' yoklik i koq wach tileb' i winaq q'e' ink'axwik reh? Re' hin chi ri'sil i juniwal chi mansano xat ponik wuksaj panawiriik re' i xuk'ul wii' i ti' k'axik aatuut noq xat-aasjik. 6 Juneliik ta naq neekinwihik pan awánima, chalechaa' wach atileb' i nub'ihnaal. Re' ak'axb'al xiik' naah ma' nuko'leej ta wiib' chuwach je' rukab' noq inchalik i kimik. Re' aak'axb'al je' rukab' i q'aaq' yohb'aal wach i xaq. 7 Eh re' i ruha'iil chu'nchel i palaw, i ruha'iil i nim ha' ma' jaruuj neenkian ruchupariik i ak'axb'al. Eh ma' awach taj i nee ruyeew chu'nchel i rub'ehomal chi jalb'al wach aak'axb'al xa ruk'ixb'ilaal naq i neeruk'uhtaaj. 8 Re' hoj wilik i jinaj i qanaab' ko k'isa q'ahxoq komajaa' ta chihruch'uuch'. ¿Chib'ih i neenqa a'n ruuk' wila' xk'ulik pahqaljoq ruum jino'q winaq? 9 Re' ta ruuk' jino'q i tz'aq nee naq inqayejaa' jino'q inajt naah paat chinaah ko'lemb'al iib' plata ruyej-aal. Eh wita re' ruuk' jino'q puerta nee naq inqatz'ap riij chi holohik chi chee' re' ruuk' i chakaltee'. 10 Re' hin je' nukab' jinaj i tz'aq, re' taqe i nuch'uuch' je' rukab' i paat najt naah re' i winaq q'e' nuk'ax xti xureq rusuqkiil ruk'ux wuuk'. 11 Re' Salomón xutik i ru-uuva chupaam i ye'aab' Baal-hamón xukoj taqe cha'jen reh. Reh chi paruq'ijil i rusik'ariik i wach i uuva nanaq kiye'em i ju'jun miil chi tumiin tojb'al riij. 12 Eh i junseht chi uuva i nutikim xa wee hin, re' hin kin cha'jinik reh, re' i jinaj miil chi tumiin re' Salomón naa ruk'ulwiik reh, eh kiib' siento i keh i cha'jen reh i uuva. 13 Re' hat ixoq q'e' ti nuk'ax, eh wilkaat xilak uhtz'ub' chayeew chi ib'irjik aq'oral k'ahchi' kuy-eem taqe i qamigo, chi naa aq'oriik. 14 Kim awajiim winaq q'e' ti nuk'ax je'-oq ti ajiminik cho keej, eh je'-oq ti ajiminik rak'uun keej chinaah taqe i yuuq' xank'ohnik chik aawach.
