CANTARES 4

1Re' hat ixoq q'e' tinukax chi weh xiik' naah aholwochiil, xti hat holohik. Re' taqe i naq'awach, je' rukab' inaq'wach paloma chupaam i b'urb'al awach, eh xa q'eq b'utz'ik chik i rismaal anaah, xa je' chik rukab' i kiij i kaprax kiqajik cho wach yuuq' Galaad. 2Re' taqe aweeh xasaq chik, xa je' chik saq'iil i kiij i tentzun kore' xkian kitiin panha', kore' xyok'arik i rismaal kiij. Eh laach i kiha'lak'uun, inwihik, ma' jino'q keh i ma' nak'unanik taj. 3Eh xa kaq chik i xaq aachii' xa je' chik iq'omamaj ruuk' i kaq laj iq'oom yohb'aal wach holwochiil ti q'orik. Eh re' pantaq awach xa je' chik kaq'iil paam granado ink'utinik chupaam i b'urb'al awach. 4Re' i awalaq, je' holwochiil inajt naah paat xuyejaa' chee David, re' inkich'ilaa' wii' i jinaj miil chi pulato ch'ihch' re' inkiko'leej wii' kiib' i kow kiib'. 5Re' i kab'chel ach'uuch' je' kikab' i kok' ixoq keej laach noq ki-aasjik wilkeeb' chupaam i uhtz'ub'. 6Eh noq naa ruchaliik rusaq'iik noq naa rokiik chee saqum, re' hin nawojiik chinaah i yuuq' wilik wii' i mirra, i wilik wii' i Insensia. 7Re' hat ixoq q'e' ti nuk'ax chi weh, xti manlik wach aawooq aq'ab'. 8Kim wuuk' i hat wehk'een, taq chupaam i ye'aab' Líbano taq chinaah i yuuq' Amana rub'ihnaal, je' wo' chinaah i yuuq' Senir wilik ar Hermón, re' inkikeb'aa' wii' kiib' i kaq b'ahlam, re' wo' inkikeb'aa' wii' kiib' taqe i nimaq winaq b'ahlam. 9Re' hin xti ch'ilojik chawiij i wánima wehk'een je' hat wanaab' noq wilkaat, xa ruuk' i jun iil xa a'n weh xanoq wo' xinok'rik chawiij ruum ma' k'isiin holwochiil aakarena wilik chawalaq. 10Hat weh k'een, hat wanaab' noq wilkaat, ma' k'isiin ta holwochiil noq kinaq'acheej, ma' xata je' suq kiil i riis uuva. Xiik' naah k'ohonkiil awach ma' xata je' k'ohonkiil chu'nchel ink'ohnik laj iq'oom 11Re' aq'oral i nelik cho xaq aachii' wehk'een xa je' chik ki'iil i riis kaab', xa je' chik suq kiil lecha. Re' aso' xiik' nah k'ohonkiil wach xa je' chik k'ohonkiil iq'oom inchalik Líbano. 12Re' hat wehk'een, je' hat wanaab' noq wilkaat, je' akab' i uhtz'ub' kojooj pan koraal, je' akab' i k'achlik ha' kotimaj riij chi tz'aq. 13Re' hat je' akab' i ye'aab' wilik wii' i granado q'e' suq i ruwachuj, je' akab' i ye'aab' wilkeeb' wii' uhtz'ub' Alhen-a rub'ihnaal. 14Je' akab' i ye'aab' i nelik wii' ink'ohnik laj Nardo, i Azafrán, nimaq rooq wach chee' canela. Eh i nelik wii' i insensia, i mirra, i áloes, eh chu'nchel ink'ohnik laj iq'oom 15Re' hat je' akab' i ye'aab' wilik wii' uhtz'ub', je' wo' akab' i raasb'al k'achlik ha' inb'ehik chee rooq ar Líbano. 16Neeta naq inchalik i teew pantz'eet pansak'aaj reh i rookb'aal q'iij nee ta naq inik'ik hupinoq chinaah i je' ye'aab' wilik wii' i tik. Re' hat winaq, q'e' ti nuk'ax chi weh kim ruuk' i je' tik chak'ux aweh i suq laj wach.

will be added

X\