CANTARES 1

1Re' iloq laj tz'uuy wili xub'an i Salomón. 2Kina tz'ub' ruuk' aachii' ruum re' i nuk'axariik neena a'n xiik' naah ki'iil chuwach i riis uuva. 3Re' hat xa je' chik ink'ohnik laj iq'oom aawach. Eh re' ab'ihnaal xa je' chik ink'ohnik laj iq'oom ruum aj re' q'e' kich'ilojik chawiij taqe i q'ahxoq. 4Kinak'am chawiij chi jumehq'iil. Kinak'am panapaat i hat reey. Re' hoj neenqa a'n i rusuqkiil, neensuuqb'ik qak'ux awuuk', neen k'ulik panqak'ux i k'axooj i na a'n xa je' chik ki'iil riis uuva, ruum i re' i q'e' kich'ilojik chawiij i q'ahxoq. 5Re' hin, hin ixoq aj Jerusaleem, q'eq i nuti'jolal, q'e' hin holohik, je' nuq'eqiil itz'ihy naa paat wilik Sedar. Eh je' nu holwochiil itz'ihy wilik parupaat Salomón. 6Maa koj taq rehtaal i nuti'jolal, eh chi re' q'iij xk'atwik reh. Re' taqe i was nuch'aaq xchalik kik'aah wuuk'. Eh xinkikoj naq chi rucha'jaljiik taqe i uuva tikooj, eh re' i nu uuva i hin ma' xnub'an ta rucha'jaljiik. 7Hat winaq, re' hin q'e' ti nuk'ax, aweeh i nuk'achariik. Chaq'or weh, ¿aha' taqe nab'esaj nayeew chi hi'lik aachikoop kab'lajora i q'iij? ¿Chib'ih reet noq k'ul kinooj chasik'ariik chi kixilak i aj cha'jen tentzun kuuk' taqe awuch'ihil? 8Hat ixoq q'e' hat holohik, wila' ma' aweht'al cha tahqeej i kooqb'aal i nutentzuun hiy chab'esaj aakapraax ma' najt ta ruuk' i kikok' paat i cha'jen tentzun. 9Re' i hat ixoq q'e' ti nuk'ax chi weh, je' akab' i holohik laj kawáyu i nqerinik reh i rukareta i kireey i aj Egipto. 10Q'e' holohik awach chupaam taqe i ka'xikin, eh q'e' holohik ti k'utinik noq leklik chawalaq aakarena re' ruuk' perla. 11Naaqayejaam aaka'xikin re' ruuk' i xti manlik oro, eh neenqayeew aholwochiil ruuk' i plata. 12Noq re' i reey tzunlik nah mexa, xnujik paam i ruye'aab' chi nuk'ohonkiil, xa je' chik k'ohonkiil iq'oom Nardo. 13Re' winaq q'e' nuk'ax xa je' chik k'ohonkiil i jinaj chi k'isa alb'oxox chi mirra i nuyeew chi xilak i nuch'uuch'. 14Re' winaq q'e' nuk'ax, xa je' chik k'ohonkiil i jumb'ohr chi uhtz'ub' i nelik i wilik wii' i uuva ar En-gadi. 15Re' hat ixoq q'e' hat holohik q'e' nuk'ax awach, xti korik chi q'e' hat holohik re' kab'chel i naq'awach je' rukab' i kiib' chi paloma. 16Re' hat xti xiik' naah aholwochiil q'e' nuk'ax awach chi weh. Eh rax wach i kok' ch'ahn naa qayohkiik wii'. 17Re' i holohaq chee' chakaltee' i rib'ojal i qapaat, eh re' ruuk' taqe i holohaq sohchaj i ruche'el i naah i qapaat.

will be added

X\