RUT 3

1Eh pan jinaj q'iij je' wili i xuq'or i Noemí reh i Rut: Hat wixq'uun, re' hin i ruk'ul chi naa nusik'im jino'q ab'ahiil reh chi suq nee ti k'acharik ruuk'. 2¿Mi ma' re', re' i Booz i ma' tokoom ta quuk' i kipatroon ixoq ximolwik reh i cabada xat ponik wii' chi kamanik i hat? Re' reh naa rojiik paruye'aab' chupaam aq'ab' yu'naak chi rupotz'ariik i riij i cabada. 3Re' hat je' wili i neena a'n: Cha a'n awitiin chakoj ink'ohnik laj iq'oom chawiij, chakoj aaholohik so', eh nee tiooj chupaam i ye'aab' wilik wii' i Booz, xa re' la' ma' nee ta nak'uhtaaj awiib' reh noq komajaa' ta rukohlaaj ruwa' ruhaa'. 4Eh noq neenooj chi wirik neenakoj rehtaal aha' neenooj yohkoq, nee tiooj ar neenateh i ruchamaar nah rooq, neenayok'aa' awiib' parooq. Eh chi riij i re', re' reh nee nq'orik aweh chib'ih i neena a'n, inki. 5Eh re' i Rut je' wili i ruchaq'weesjiik i xub'an: Neenub'an chu'nchel i xaq'or weh, inki. 6Re' Rut xooj wo' chupaam i ye'aab' wilik wii' i Booz xub'an wo' chu'nchel i xq'orarik reh ruum i rutuut i kamnaq rub'ahiil. 7Eh noq re' i Booz xukohlaaj chik ruwa' ruhaa' xk'utinik chi xasuq chik ruk'ux, xooj ruyok'aa' riib' chi wirik aha' wilik wii' i juntuhb' chi naq'wach i cabada. Re' i Rut xooj ar chiq'uun ma' xta choqik xub'an, xuteh i ruchamaar nah rooq i Booz, eh xuyok'aa' riib' parooq. 8Eh je' naa chik yejaal aq'ab' xrik'raaj riib' i Booz noq xusutej riib' i rilow chi jinaj ixoq yoklik parooq, eh ma' k'isiin ta xsahchik ruk'ux. 9Eh xupahqaaj reh ixoq chi je' wili: ¿Awach i hat? inki. Re' ixoq je' wili i chaq'wik xub'an: Re' hin i Rut i awaj kamanoom, re' hat ma' hat ta tokoom wuuk' neerub'an chi hat nee ti ilwik weh. Re' hin inwaaj naq chi neenub'an kaxáro awuuk', inki. 10Re' i Booz je' wili i chaq'wik xub'an: Re' ta naq i QaJaaw Dios neentoob'inik aweh, yu'naak xti xak'uhtaaj chik chi xiik' wo' chik naah i otob'il xa a'n xti xuk'ul naq chi xasik' ta jino'q i kok'ijool chi nuwach i hin atoob' ta b'ehoom, oon neb'aa', xa re' la' re' hat ma' je' ta re' i xa a'n 11Re' hat tuut mat yo'jik, panutinamiit keht'al chik awach chi nak'uhtaaj i holohik laj na'ojb'al, ruum aj re' naa nub'anam chu'nchel inapahqaaj weh. 12Korik noq re' hin, ma' hin ta tokoom awuuk', xa re' la' wilik i jinaj i xti ma' najt ta awuuk'. 13Re' hat tikaan pee ayu' chupaam aq'ab' wili, re' i ma' tokoom ta wuuk' re' re' saq'oq peet neenub'an nuk'utaaj ruuk', wila' xraaj chi re' reh neenchop wik anaah ma' xta reet. Eh wila' ma' xraaj i reh, re' hin xti korik i nuq'or aweh chuwach i Dios chi re' hin nee kinchopwik anaah xa re' la' ti woroq pee ayu', inki. 14Eh re' Rut ar wo' xrik'saj aq'ab' parooq i Booz. Re' Booz ma' xraaj taj chi xkinab'eej chi re' ixoq re' re' xponik woroq ar, ruum aj re', re' Rut ko q'equm wach ak'al xwuktik chi junwaar. 15Chi riij i re', re' Booz je' wili i xuq'or reh i Rut: Chak'am chaloq itz'ihy wilik awuuk' chahe' wach, inki. Eh noq ruhe'em chik wach itz'ihy i Rut, re' Booz xupaj chaloq i cabada waqiib' pajb'al xuyeew chuwach itz'ihy, xuyeew reje nah tileb' i Rut xuk'am reje pan tinamit. 16Eh noq xponik i Rut ruuk' i rutuut i kamnaq rub'ahiil, xpahqaljik reh chi je' wili: ¿Chib'ih i xponik ab'iraj i hat wixq'uun? inki. Re' Rut xuk'utjaaj reh i Noemí chu'nchel i xq'orarik reh ruum i Booz. 17Re' Rut je' wo' chik wili i xuq'or: Xuyeew cho weh i cabada wili waqiib' pajb'al i Booz, ruum xuq'or weh chi ma' toob' taj chi naa nusutiniik cha wuuk' chi ma' xta naa nuk'amam cha weh, inki. 18Re' i Noemí je' wili i xuq'or reh i Rut: Yu'naak wixq'uun chawuy-eej chib'ih pa' jariik nenooj kuxoq wii' wach i wili. Re' i Booz re' re' ma' nee ta nhi'lik yu'naak korehtaal i ruyejaa' wach chi korik, inki.

will be added

X\