SALMOS 99

1Re' QaJaaw Dios manlik Reey, chi kixilak i k'achaach wilik kixiik'. Re' tinamit, eh re' wach ak'al xakib'arb'otik chik ruum kiyo'jiik chuwach. 2Re' QaJaaw Dios xiik' naah nimaal wach ar Sión. Eh xiik' naah i rajaawriik chikinaah chu'nchel i tinamit. 3Neeta naq inye'arik ruloq'il rub'ihnaal, ruum re' reh xiik' naah yohb'alil wach. Eh xti wilik rusantohiil. 4Re' reey xiik' naah nimaal i rajaawriik imponik chuwach i korik. Eh xub'an cho ruuk' i Jacob i rub'ehel, i korik. 5Chayeew taq ruloq'il i QaJaaw i qaDios chaxuk'aa' taq awiib' ri'si rooq ri'si q'ab'. Ruum re' reh xti wilik rusantohiil. 6Re' Moisés, re' i Aarón xi kamanik chi kajaaw aj tiij chuwach i Dios. Re' i Samuel xwihik chi kixilak i xiloq'inik reh i rub'ihnaal i Dios. Eh noq xkipahqaaj i rotob'il i Dios xitoob'jik wo' hoq. 7Eh chupaam i junrahp chi suutz' xiq'orob'jik cho ruum i QaJaaw Dios. Eh xkian wo' i xq'orarik keh, xkinimaj chu'nchel i ruk'uhb'aal. 8QaJaaw Dios, xatoob'eej taqe noq xkipahqaaj awotob'il xat kikoj chi ki Dios kuyuul mahk. Eh xayeew taqe chutojariik i kimahk i yiib' wach kina'ojb'al. 9Chaloq'ej taq i QaJaaw i qaDios, chaxuk'aa' taq awiib' chulooq'jiik chupaam i rusantolaj ye'aab' Sión. Ruum re' i QaJaaw Dios xti wilik rusantohiil.

will be added

X\