SALMOS 96

1Chatz'uyej taq i ak' laj tz'uuy loq'oomb'al reh i QaJaaw Dios. Chawunchelaal taq i hat aj wach ak'al cha tz'uyej taq wach i QaJaaw. 2Chatz'uyej taq wach i QaJaaw Dios, chayeew taq runimaal wach. Eh rajlaal q'iij taq cha q'or rib'iral chi xa re' wo' reh aj Ko'loom. 3Chaq'or taq rib'iral i ruloq'il keh chu'nchel i tinamit, je' wo' hoq i ma' ilooj taj i rub'an. 4Ruum re' QaJaaw Dios xiik' naah nimaal wach, i ruk'ul chi naa qaye'em ruloq'il. Eh xa re' wo' reh nim rajaawriik chikiwach taqe i tiyoox. 5Re' ki dios taqe i tokoom tinamit, xatz'aqoj tiyoox taqe. Eh re' i qaDios i hoj re' reh xyej-anik reh i taxaaj. 6Ma' k'isiin ta saqumaal chii' wach. QaJaaw Dios, xiik' naah nimaal i rajaawriik, i ruloq'il chupaam i rupaat. 7Chawunchelaal taq i hat aj wach ak'al chayeew taq rajaawriik, ruloq'il i QaJaaw Dios. 8Chayeew taq ruloq'il i QaJaaw ruum xa re' wo' reh i ruk'ul chi naa taq aye'em ruloq'il. Eh chak'am taq chaloq aamayiij chupaam i rupaat. 9Chaloq'ej taq i QaJaaw Dios chupaam i ruye'aab' q'e' holohik. Eh chu'nchel ta naq i tinamit neenyohlinik reh. 10Chaq'or taq keh i tinamit chi re' QaJaaw Dios manlik Reey, eh xuyeew paruye'aab' i wach ak'al, ma' awach ta neenk'uyu'sanik reh. Eh parub'ehel naa ruq'atam i q'orik chikinaah i tinamit. 11Neeta naq insuuqb'ik rik'ux i taxaaj, i wach ak'al. Neeta naq ink'uyu'jik i palaw, i wilkeeb' chupaam ruum i rusuqkiil kik'ux. 12Eh nee ta naq insuuqb'ik kik'ux i yuuq' k'ixkaab', taqe i wilkeeb' chuwach. Neeta naq inkik'er kichii' ruum rusuqkiil kik'ux taqe i chee' wilkeeb' pantaq ch'ahn. 13Chu'nchel naa rusuuqb'iik kik'ux chuwach i QaJaaw k'ulik iloq reh, ruum parub'ehel naa ruq'atam i q'orik chikinaah i tinamit ayu' wach ak'al.

will be added

X\