SALMOS 94

1QaJaaw Dios, cha k'uhtaaj aajosqiil kuuk' i yiib' wach kib'anik ruum xa re' wo' hat neetiq'ajwik wach keh inki a'n 2Re' hat i q'atal q'orik, chayeew taqe chutojariik i kimahk i nimaq kiwach inki a'n kiib'. 3QaJaaw Dios, ¿xti kojaruuj inkimay elik korik i yiib' wach kina'ojb'al? Eh ¿Xti kojaruuj i nelik i rusuqkiil kik'ux? 4Eh ¿Xti ko jaruuj inkikanaa' ruq'orariik yiib' wach q'orik? Eh ¿Xti ko jaruuj inkikanaa' runimb'eesjiik kiwach taqe i yiib' wach kina'ojb'al? 5QaJaaw Dios, re' taqe re' kian ti' k'axik keh awak'uun awixq'uun, inkiyeew ruti'kiil ruk'ux. 6Eh inkikansaj taqe ixoq kamnaq kib'ahiil, taqe i ma' xata kituut qajaaw, je' wo' taqe i tokoom tinamit wilkeeb' ar. 7Je' wili inkiq'or: Re' ruDios chee Jacob ma' rilow taj chib'ih jariik i k'ahchi'kooj, inki taqe. 8Re' taq i hat i yiib' taq wach ana'ojb'al, i na a'n inawaaj taq i hat, ma' nareq ta taq chi riij taq inaq'or. 9¿Mi ma' nee taq tirib'iraj re' ixyej-anik reh taqe axikin? ¿Mi ma' nee taq tirilow re' ixyej-anik reh taqe i naq'awach? 10¿Mi ma' nee taq tiruyeew chutojariik taq amahk re' i Dios, inq'ilwik keh i nimaq tinamit? ¿Mi ma' neerunab'eej re' taq i na a'n, inkojwik qana'ojb'al? 11Re' QaJaaw Dios reht'al chi re' taqe winaq xa memil laj na'ojb'al inkikapaaj. 12QaJaaw Dios atoob' keh taqe inakoj kina'ojb'al i hat. Eh inak'uhtaaj keh chib'ih taqe ruq'or aak'uhb'aal. 13Reh chi xasuq wo' kik'ux noq neenk'u'loq i ti' k'axik chikinaah. Eh re' taqe i yiib' wach kina'ojb'al, k'ahchi' rukorjiik kiye'aab' naakikutariik wii'. 14Eh re' QaJaaw Dios ma' jaruuj neeruq'eb' chi riij ruk'ux i rak'uun rixq'uun, ni xata nee rukanaa' taqe chi kutkeel. 15Eh re' taqe i q'atal q'orik parub'ehel chik naakiq'atam i q'orik. Chu'nchel i korik wach kik'ux je' re' naa kianam. 16¿Awach naq i xchalik chi nuko'ljiik i hin pan kiq'ab' taqe i yiib' wach kina'ojb'al i ma' holohik ta kib'anik? 17Wita ma' xirutoob'eej i QaJaaw Dios xin kimik naq chik pan kiq'ab' i aj ixowaal, ma' wilkiin ta naq chik yu'naak. 18Eh nik' xnuq'or chi ma' naa ta chik nukuyum, re' hat QaJaaw Dios xatoob'inik weh ruuk' aak'axb'al. 19Nik' xantukik chik paam i nunaah ruum taqe i nukapeew re' hat xat ye'wik rusuqkiil nuk'ux. 20Re' hat maa k'am awiib' pansuqkiil kuuk' i q'atal q'orik yiib' wach i kina'ojb'al, re' i ma' inki a'n taj i ruq'or i k'uhb'aal. 21Eh inkimol kiib' chukojariik kimahk i korik wach kik'ux, inkiq'at i q'orik reh chi naa kikanteesjiik. 22Eh re' hin xa ruuk' wo' QaJaaw Dios inuko'leej wiib', re' reh je' rukab' paat ab'aj ko'lemb'al iib' chi wee hin. 23Re' QaJaaw Dios, naa rusacham kiwach taqe i yiib' wach kina'ojb'al, ruum taqe i kimahk. Eh re' wo' reh naa rusachwiik kiwach.

will be added

X\