1 QaJaaw Dios nim awajaawriik, yohb'aal wach holwochiil alooq'jiik, je' wo' hoq i rutzuyjiik wach aab'ihnaal. 2 Eh ruq'orariik rib'iral pan wahq'eq pan chaq'ab' i ketelinik wachiis i na a'n, i rukorkiil wach ak'ux. 3 Ruuk' i k'ahaam wach q'ooj, ruuk' arpa xama' q'e' ta kow inq'orik, eh ruuk' k'isa q'ooj k'ahaam wach. 4 QaJaaw Dios, re' hat xayeew rusuqkiil nuk'ux ruuk' taqe i xa a'n wuuk'. Eh noq inwilow taqe akamaj i na a'n ma' k'isiin ta nsuuqb'ik nuk'ux. 5 QaJaaw Dios, yohb'aal wach nimaal wach taqe akamaj i na a'n, eh yohb'aal wach chamiil paam taqe akapeb'aal. 6 Re' i ruchop ruk'ux chub'anariik i ruyiib' wach na'ojb'al, ma' reht'al taj i wili, ni xata rureq chi riij. 7 Re' taqe i yiib' wach kina'ojb'al, xa je' kikab' noq ink'ihik johtoq i yiib' wach ch'ahn. Eh kielik korik ruuk' inki a'n xa re' la' naa wo' naa rusachariik kiwach. 8 Eh re' hat QaJaaw Dios, naa ruye'ariik runimaal awach chi juneliik. 9 Jaaw xti korik noq re' taqe i ki-ixowanik awach naa rusachariik kiwach. Eh chu'nchel i kib'anik reh i yiib' wach na'ojb'al naa rutuukjiik kiwach. 10 Re' hat xayeew ruman i waansil je' rukab' i ransil jino'q i kowlaj imas wakax. Eh xachihkaaj ink'ohnik laj iq'oom wach nunaah. 11 Re' hin naawilom noq naa rub'aan keh taqe i ki-ixowaanik nuwach. Eh naab'iram noq naakik'erem kichii' i yiib' wach kib'anik re' re'. 12 Re' i korik wach kik'ux naakixmak'iniik je' rukab' noq inixmak'inik i kalaab'. Je' rukab' noq ink'ihik i chakaltee' ar Líbano. 13 Re' keh naa kiwihiik parupaat i Dios, eh naakeliik korik je' naa ki ixmak'inik jino'q chee' ma' najt ta ruuk' i rupaat i QaJaaw. 14 Re' keh atoob' ta pan kirijb'iil xanaa wo' kiwachiniik ruuk' i naa kianam, xanaa wo' ruwihiik kikowiil. 15 Reh chi naa kiq'orom rib'iral chi re' QaJaaw Dios inko'linik qeh. Eh chi korik wach ruk'ux, chi parub'ehel i rub'an chu'nchel.
