1 WaJaaw nuDios, naa kaat nuloq'em chu'nchel i wánima. Eh naa nupuhkaam ruq'orariik taqe i xa a'n ruuk' i runimaal awajaawriik. 2 Awuum i hat naa nuk'erem nuchii' ruum rusuqkiil nuk'ux, naa wo' nutz'uyiniik panab'ihnaal QaJaaw Dios. 3 Re' taqe ki-ixowanik nuwach xi elik chikiij awuum i hat, eh xasach kiwach. 4 Re' hat k'ahchi' kiin awuy-eem ruuk' i ruk'ul chi weh. Eh xatzunaa' awiib' chupaam i loq'laj aye'aab' chuq'atariik q'orik parub'ehel. 5 Re' hat xatq'ilwik keh i ma' kinimanik taa weh. Eh xasach kiwach i kib'anik reh i yiib' wach na'ojb'al, xajux i kib'ihnaal chi jumpech. 6 Eh re' taqe i ki-ixowanik qawach, re' hat xatsachwik kiwach. Xasach wo' wach i kitinamiit, ni xata chik naa ruq'orariik kib'iral. 7 Eh re' i QaJaaw Dios wilik rajaawriik chi juneliik, eh xutzunaa' chik riib' paruloq'laj Ye'aab' chuq'atariik i q'orik. 8 Re' reh parub'ehel naa ruq'atam i q'orik chikinaah i tinamit, je' wo' chikinaah i kok' tinamit. 9 Re' QaJaaw Dios inko'linik keh i neb'aa'. Re' reh inko'linik keh nik' inchalik ti' k'axik chikinaah. 10 WaJaaw nuDios, nik' nimaal taqe i kinimanik aweh, awuuk' i hat ch'iklik kik'ux, ruum re' hat ma' jaruuj inakanaa' kitoob'jiik i kisik'wik aweh. 11 Chatz'uyej taq wach i QaJaaw Dios wilik chupaam i Ye'aab' Sión. Chapuhkaaj taq ruq'orariik pantaq tinamit taqe i xub'an. 12 Re' QaJaaw Dios i ruketelaaj kiwach i wilkeeb' panti' k'axik. Eh i ruyeew keh inkipahqaaj reh. Eh i ruyeew taqe chutojariik i kimahk i kib'anik ti' k'axik keh. 13 WaJaaw nuDios, chaketelaaj tii nuwach, kinawil, ruum ma' k'isiin ta nkitib'isaj nuk'ux i ki-ixowanik nuwach. Eh kinako'leej chuwach i kimik. 14 Chi je' re', neenuq'or keh i aj Jerusaleem chi ruk'ul chi naa alooq'jiik. Eh neenuq'or chi suq nuk'ux, ruum hat xat ko'linik weh. 15 Re' taqe tinamit ma' kinimanik ta aweh, xkik'ot i chaamlaj jul, xkiyejaa' i xirob', xa re' wo' keh xiq'ehb'ik chupaam. 16 Re' QaJaaw Dios xuk'uhtaaj i rukorkiil wach ruk'ux ruuk' i q'ataj q'orik xub'an. Re' taqe i runimaal aj mahk xa nkikoj kixirob' chi kib'il kiib'. 17 Re' i yiib' wach kina'ojb'al, insahchik pankik'ux i Dios, naa rusachariik kiwach, naakiye'ariik paruye'aab' kamnaq ruum i Dios. 18 Re' taqe k'axik wilkeeb' ma' naa ta rusahchiik paruk'ux i Dios. Eh ma' naa ta wo' rusahchiik wach i ch'iklik reje wii' kik'ux. 19 WaJaaw nuDios, cha k'uhtaaj awajaawriik, maayeew q'ab' chi neenkiq'at awach i xa winaq. Chaq'at la' q'orik chikinaah i tinamit. 20 WaJaaw nuDios, chayohb'isaj taqe, reh chi neenkireq chi riij chi ma' xta kajaawriik, xa winaq taqe.
