SALMOS 89

1QaJaaw Dios, re' hin juneliik naa nuq'orom panutz'uuy chi q'e' hat aj keteloom wachiis. Eh eliik naa nuq'orom chi korik wach ak'ux. 2Eh naa nuq'orom rib'iral chi re' ketelinik wachiis i na a'n ma' jaruuj naa rik'iik wach, je' wo' rukorkiil wach ak'ux. Je' rukab' noq wilik i taxaaj paruye'aab'. 3Eh je' wili aq'orom: Re' hin wilik i xnuyejaa' wach ruuk' i David i numoso nusik'im wach je' wili i xnuq'or reh: 4Re' chik taqe aawiih aamaam naa nukojom chi reyil chajilob'aal na' ti eloq i hat re' keh naa kikahniik chi reey chi juneliik, tiki. 5QaJaaw Dios, chu'nchel i k'achareel wilkeeb' pan taxaaj tikiloq'ej ruum i wilik kisantohiil. Eh ruum taqe i ma' ilooj taj i na a'n. 6Ruum re' hat QaJaaw Dios xiik' naah nimaal awajaawriik, ma' xta chik jino'q dios wilik pan taxaaj chi je' ta rukab' i hat. 7Ruum xa re' wo' hat nim awajaawriik, eh xiik' naah yohb'alil awach. Sutimaj awiij kuum i k'achareel wilkeeb' pan taxaaj, xa re' wo' hat nim awach chi kixilak i keh. 8QaJaaw Dios nim awajaawriik, ma' awach ta chik jino'q chi je' rukab' i hat. Q'e' nim awajaawriik, xa re' korik wilik awuuk'. 9Wilik awajaawriik chuq'ilariik i palaw noq yohb'aal wach i rujosq'iil. Eh noq yohb'aal wach i wuktik i rub'an i rub'ohl inapab'aa' wo' hoq. 10Re' hat xa a'n reh i josq'laj chikop Rahab xa je' chik kamnaq xakanaa'. Xatukej kiwach ruuk' awajaawriik taqe i ki-ixowanik awach. 11Re' taxaaj, i wach ak'al re' hat ti ehchanik keh. Ruum re' wo' hat xatyej-anik reh i wach ak'al, je' wo' i wilkeeb' chupaam. 12Re' hat xatyej-anik reh i wilkeeb' pantz'eet ree rookb'aal i q'iij, pansak'aaj ree rookb'aal i q'iij. Eh re' yuuq' Tabor, i yuuq' Hermón inkiyeew aloq'il. 13Re' hat xiik' naah awajaawriik, eh kow awiib' ruum aj re' ti elik korik ruuk' i taqe i na a'n. 14Re' hat parub'ehel ti q'atwik q'orik chupaam aa ye'aab', eh ruuk' rukorkiil wach ak'ux. Eh juneliik re' k'axooj, eh re' korik wilik awuuk' i hat QaJaaw. 15QaJaaw Dios, atoob' keh i tinamit tikiloq'ej ruuk' rusuqkiil k'uxliis. Eh k'acharik inki a'n chupaam i rusaqumaal i na'ojb'al i nayeew i hat. 16Eh panab'ihnaal i hat neen wihik rusuqkiil kik'ux chi junelik. Eh neen kichop kik'ux ruum i rukorkiil wach ana'ojb'al i hat. 17Ruum xti korik noq re' hat ti ye'wik kikowiil, kiloq'il. Re' hat ti ye'wik ruman qeh i qajaawriik ruum je' re' inawaaj i hat. 18QaJaaw Dios, re' hat ti ko'linik qeh, eh hat qareey i hoj, hoj aj Israel. Eh hat wo' santo chi qanaah. 19Re' hat xaq'o'reej taqe aatinamiit pan kisaq wiriik je' wili i xaq'or keh: Re' hin xnusik' wach jinaj i kow riib' chi kixilak i nutinamiit, xnuyeew runimaal wach, xnutoob'eej. 20Eh nureq i David, chi numoso. Eh xnuyeew i waseite wach naah noq xnupab'aa' chi reyil. 21Re' reh ma' jaruuj naa nukanaam rutoob'jiik. Juneliik naa nuye'em rukowiil ruk'ux ruuk' i wajaawriik. 22Eh ma' xta naruuchjiik kuum i nixowanik wach. Eh ma' nata ruq'atariik wach kuum i yiib' wach kina'ojb'al. 23Re' hin naa nusacham kiwach i ki-ixowanik wach. Eh naa nuye'em taqe panti' k'axik i ma' ki ajwanik taa wach. 24Eh re' hin ma' nata nukanaam ruketeljiik wach, je' wo' hoq i rutoob'jiik. Naa nuye'em ruman i rajaawriik. 25Naa nuye'em rajaawriik chinaah i palaw Mediterráneo, eh imponik i wilik wii' i nim ha' Éufrates. 26Eh je' wili naa ruq'orom weh: Re' hat i wajaaw, hat i nuDios, hat paat ab'aj ko'lemb'al iib' chi weh, inkoq. 27Eh naa nuye'em ruloq'il chi je' peet wak'uun. Eh q'e' naa nuye'em i ruloq'il chuwach i kiloq'il i reey wilkeeb' wach ak'al. 28Ma' naa ta nukanaam ruketeljiik wach, ni xata naa nujalam wach i nuq'orom reh chi naa nub'anam ruuk'. 29Re' taqe riih rumaam naa kokiik chi reyil chi jilob'aal i reh, je' re' naa rub'aan kuuk' korehtaal insahchik wach i taxaaj. 30Eh wila' re' taqe i riih rumaam ma' xkik'am naah i nuk'uhb'aal. Eh wila' ma' xkian i korik inwaaj i hin, 31eh wila' xkian i mahk chuwach i nuk'uhb'aal. Eh wila' ma' xkaaj kianaam taqe i ruq'or i nuk'uhb'aal, 32re' hin naa nuye'em taqe chutojariik i kimahk. Je' naa ruuk' b'olob'ik chee' naa nub'anam ti' k'axik keh. 33Eh re' David reh eliik naa nuketelaam wach, ma' naa ta nuyojom wach i korik nuq'orom cho reh. 34Ma' naa ta nuyojom wach i nuk'uhb'aal nuyejaam wach ruuk', ni xata naa nujalam wach i nuq'orom cho reh. 35Re' hin ruuk' i nuSantohiil nuq'orom cho reh i David, chi ma' jaruuj neenuchuk i q'orik reh. 36Xti korik chi re' taqe i riih rumaam naa kokiik chi reyil chi juneliik, korehtaal insahchik wach i q'iij. 37Re' keh naa ruwihiik kajaawriik chi reyil korehtaal insahchik wach i poh. Je' wo' hoq i taxaaj, inki i Dios. 38Je' wo' naq re' i xaq'or chaloq xa re' la' xaq'eb' wo' chi riij ak'ux i reey asik'im cho wach, xchalik aajosq'iil ruuk'. 39Xayoj wach aq'orom cho reh amoso chi naa a'nam cho ruuk'. Je' naa xaq'uch i ru corona, je' naaxakut panak'al. 40Eh xateheb'eej i tz'aq kotimaj wii' riij i rutinamiit reh chi xusach kiwach. 41Chu'nchel i ki-ik'ik ar inkelq'aaj i chib'ih keh i rutinamiit. Eh kikaqse'ljik kuum kika'jaah. 42Xayeew kikowiil inixowanik wach reh chi xb'aan keh. Eh xasuq suq chik kik'ux chi xi elik korik taqe aj ixowaal re' re'. 43Ma' xatoob'eej ta cho panq'aq'inik xawesaj i ruq'asiil i ruch'ihch'. 44Xawesaj chi jumpech i ruloq'il, i rajaawriik chi reyil. 45Eh xatoq rooq i ruhab'ul, eh xayeew q'ab' chi xuk'uhtaaj ruk'ixb'ilaal. 46QaJaaw Dios, ¿Ko jaruuj i naaketelaaj cho nuwach? ¿Mi juneliik naa ruqopiik re' aajosq'iil chi nunaah chi je' nqop q'aaq'? 47Jaaw, k'oloq panak'ux chi re' nuk'achariik xama' najt ta rooq. Eh chu'nchel i tinamit xatz'uhkrisaj xama' najt ta wo' rooq i kik'achariik. 48¿Mi wilik jino'q ineenk'acharik chi ma' nee ta inkimik? ¿Mi wilik i neerukot riij chi ma' naa ta reliik reje wach ak'al? 49QaJaaw Dios, ¿Mi xakanaa' re' i ketelenik wachiis i na a'n cho najtir, re' i xaq'or cho reh i David ruuk' i rukorkiil wach ak'ux? 50Jaaw, chakoj rehtaal chi re' taqe amoso k'ahchi' kib'ajariik kuum i tinamit. Eh re' hin ma' inik'ik panuk'ux i ruti'kiil inki a'n weh re' re'. 51Re' taqe i ki-ixowanik awach, je' re' rub'ajariik taqe amoso inki a'n Je' wo' re' rub'ajariik i reey inki a'n re' asik'im cho wach, eh xa aha' inooj je' re' inki a'n reh. 52Loq'imaj ta naq i QaJaaw Dios chi juneliik. Je' ta wo' naq re'.

will be added

X\