1 QaJaaw Dios, hat waj ko'loom, re' hin chi q'iij chi aq'ab' nupahqaaj nutoob'jiik aweh. 2 Chab'iraj tii weh i nutiij. Chayeew weh aha' wilik i nupahqaaj aweh. 3 Ruum re' hin yohb'aal wach i ti' k'axik xumol riib' chi nunaah, xanaa chik nukimiik noq inwik'raaj. 4 Xa je' chik nukab' taqe i kamnaq noq inwik'raaj, ruum xama' xta chik rukowiil i nuti'jolal. 5 Je' naa xinkahnik chi tuch'ulkiin chi kixilak taqe i kamnaq, je' nukab' taqe i kikimik ruuk' q'aslaj ch'ihch' xi muhqik chik. Eh ma' xako'leej ta taqe i hat, xsahchik taqe panak'ux. 6 Je' naa pan jinaj ruchamiil jul xinayeew, xiik' naah q'equmaal paam. 7 Eh yohb'aal wach aajosq'iil chi nunaah. Eh nimaq taq rub'ohl ha' i k'ahchi' rumuq'aniik nunaah. 8 Xayeew q'ab' chi xinkiq'eb' chi riij kik'ux taqe wamigo. Eh ma' suq ta chik wilariik inki a'n ruum ma' xinatob'eej taj, xama' ha' ta chik kinelik. 9 Eh ruum i ma' k'isa oq'ik i nub'an, k'ahchi' rupohyiik paam i naq'nuwach. Jaaw ruum aj re' chu'nchel q'iij tinuq'o'reej, i nujosaj i nuq'ab' chawach. 10 ¿Mi ko neena a'n cho re' i nimaq wach ma' ilooj taj kuuk' taqe i kamnaq? Eh ¿Mi ko neetikiloq'ej re' taqe kamnaq? 11 ¿Mi koneeruyeew riib' re' chi neen q'orarik aak'axb'al, ruch'ihil i rukorkiil wach ak'ux chupaam i ye'aab' muqulkeeb' wii' kamnaq? 12 Eh re' taqe i kamnaq, ma' nee ta chik inkireq chi riij i korik. Eh ma' awach ta chik neenilwik reh i ma' ilooj taj i na a'n. 13 QaJaaw Dios re' hin rajlaal pantaq wahq'eq i nupahqaaj aweh panutiij chi naa kiin atoob'eem. 14 Jaaw ¿Chib'ih reet noq xinaq'eb' chi riij ak'ux? ¿Chib'ih reet noq ma' kinab'iraj taj? 15 Re' hin kopan nuk'ijolal rutik'aam chaloq i ruti'kiil nuk'ux, eh xink'u'loq ayu' yu'naak chi xa je' pankimik wilkiin awuum. 16 Yohb'aal wach aajosq'iil xayeew chi nunaah, ma' nukuy ta chik k'isinoq ransil. 17 Re' aajosq'iil eliik i nayeew chi nunaah, je' naa sutimaj wiij chi chaam laj ha'. 18 Eh xayeew q'ab' chi xinkiq'eb' chi riij kik'ux taqe i wamigo, taqe wuch'ihil, taqe weht'al kiwach xa panq'equm chik wilkiin.
