SALMOS 86

1QaJaaw Dios chab'iraj tii i nupahqaaj aweh, kinatoob'eej, ruum re' hin q'e' ntz'irik nuwach, eh q'e' ti' nuk'ux. 2Kinako'leej i hat nuDios, ruum korik wach nuk'ux awuuk'. Kinako'leej hin, hin amoso, awuuk' i hat nuye'em nuk'ux. 3QaJaaw Dios chaketelaaj tii nuwach ruum re' hin juneliik nupahqaaj aawotob'il. 4Jaaw chasuuqb'isaj i wánima hin, hin amoso, eh xa chawach hat i nub'an nutiij. 5Re' hin Jaaw weht'al chi q'e' hat atoob'. Eh hat kuyuul mahk, i naaketelaaj kiwach inki a'n kitiij chawach. 6QaJaaw Dios, chab'iraj tii i nutiij, chayeew weh i nupahqaaj aweh. 7Nik' ti' nuk'ux re' hat tinuq'o'reej, ruum weht'al chi nayeew weh inupahqaaj aweh. 8QaJaaw Dios, ma' xta chik jino'q dios chi je' rukab' i hat. Eh ma' awach ta neemb'anik reh taqe i na a'n i hat. 9QaJaaw Dios, chu'nchel i nimaq tinamit ayejaam, naa kichaliik chalooq'jiik. Eh naakiye'em runimaal wach aab'ihnaal. 10Ruum xa re' wo' hat i jinaj chi Dios, xiik' naah nimaal awach, eh i na a'n taqe i ma' ilooj taj. 11QaJaaw Dios, cha k'uhtaaj weh aab'eeh, reh chi neenub'an i korik. Eh chayeew rukowiil i wánima, reh chi neenuyeew runimaal wach aab'ihnaal. 12Hat waJaaw nuDios, naa kaat nuloq'em chu'nchel i wánima, eh juneliik naa nuye'em ruloq'il ab'ihnaal. 13Eh ma' k'isiin ta xaketelaaj nuwach. Ruum xinako'leej chuwach i kimik. 14QaJaaw re' taqe i ki-ixowanik nuwach yohb'aal wach i kijosq'iil. Re' taqe i ma' tikikapaaj taj inkaaj nukanteesjiik. 15Eh re' hat Jaaw, hat Dios, q'e' hat kuyuul. Ma' jumehq'iil ta inchalik aajosq'iil, xiik' la' naah i ketelinik wachiis awuuk', eh re' hat i korik. 16Kinawilow tii chaketelaaj nuwach. Chayeew rukowiil nuk'ux hin, hin amoso, hin rak'uun chaloq amoso re' i nutuut. 17Chak'uhtaaj weh chi korik aawotob'il, eh noq neenkilow i ki-ixowanik nuwach neenchalik kik'ixiik. QaJaaw Dios, weht'al noq re' hat titoob'inik ti ye'wik rusuqkiil nuk'ux.

will be added

X\