SALMOS 84

1QaJaaw Dios, nim awajaawriik xiik' naah holwochiil aapaat. 2Re' hin xa nwotow chik wihik chupaam i aapaat QaJaaw Dios. Eh chu'nchel nuk'ux, chu'nchel i wánima inutz'uyej awach ruum re' hat i k'achlik Dios. 3QaJaaw Dios nim awajaawriik, hat nureey, hat nuDios. Re' taqe kok' tz'unun, taqe i kok' si'q'jil inki req naa re' wo' kiye'aab' chuwach taqe aa artaal, eh ar inkiyejaa' kisuuq' ye'aab' kok' kak'uun. 4Je' re' noq q'e' atoob' keh i eliik wilkeeb' chupaam aapaat, ruum ma' kihi'lik ta chalooq'jiik. 5Eh atoob' keh i awuuk' i hat inkireq rukowiil kik'ux. Eh ma' kikanaa' ta rub'aan inawaaj i hat. 6Eh noq ki-ik'ik chi ti', noq ki oq'ik inasutej chi rusuqkiil k'uxliis, i nayeew aawotob'il chikinaah je' rukab' noq i nujik i ye'aab' ha' noq i rub'an chee jab'. 7Eh reh reh kireqem kikowiil reh ojik chikiwach. Eh ar Sión naakilom awach i hat qaDios. 8QaJaaw Dios, nim awajaawriik, ruDios chee i Jacob, xti chab'iraj tii cho weh i nutiij. 9QaJaaw Dios aj ko'len qeh, chayeew tii aawotob'il chinaah i reey asik'im cho wach. 10Eh q'e' chihooj chi weh chi nee kinwihik jino'q q'iij chupaam aapaat chuwach chi nee kinwihik jino'q miil Q'iij xa aha'. Eh q'e' chihooj chi weh chi nee nucha'eej i ookb'al reh aapaat i hat nuDios chuwach chi nee kinwihik aha' imb'aan wii' i mahk. 11Ruum re' QaJaaw Dios insihq'inik reh i qana'ojb'al. Eh qoh ruko'leej, qohruk'ax i ruyeew kiloq'il i ma' xta kiq'ehb'iik wii'. Eh i ruyeew keh i chihooj chi keh. 12QaJaaw Dios, nim awajaawriik. Q'e' atoob' keh taqe i awuuk' i hat inkiyeew i kik'ux.

will be added

X\