SALMOS 81

1Chatz'uyej taq wach i Dios, ruuk' rusuqkiil k'uxliis, re' ye'el rukowiil qak'ux. Chak'er taq aachii' chulooq'jiik i ruDios chee Jacob. 2Chatz'uyej taq wach ruuk' setesaq q'ooj re' ruuk' i kitzalajinik, ruuk' arpa, ruuk' taqe i k'ahaam wach q'ooj. 3Chaxulej taq aatuun noq rub'anam i ak' poh, je' wo' na'chub'an k'ul saqum i poh, ruum re' re' jinaj i runimaal ninq'iij chi qeh i hoj. 4Ruum re' re' i k'uhb'aal xuyeew i Dios reh i Jacob, eh xuyeew wo' keh i quch aj Israel. 5Re' wo' k'uhb'aal re' re' xq'orarik reh i José noq ruuk' i runimaal i rajaawriik i Dios xi ehteesjik cho ar Egipto. 6Eh xb'iraj jinaj i q'orik ma' jank'al ta nb'iraj, je' wili xuq'or: yu'naak xwisaj chik i ahl laj ihq taq cha naah, xat nuhi'lisaj taq chik ruuk' i kowlaj kamanik. 7Eh noq ti' taq wilkaat xapahqaaj taq i atoob'jiik, eh xatnuko'leej wo' taq. Kore' i rub'an cho wii' i kahoq xat b'iraj taq chaloq. Eh xatnupaj taq i wilik wii' i ha' Meriba. 8Chab'iraj taq i aq'ilariik naa nub'anam i hat taq nutinamiit Israel. Atoob' wii' xinanimaj taq. 9Ma' naa ta taq ruwihiik atiyoox, eh ni xata naa taq aloq'em i ki dios i tokoom tinamit. 10Ruum xa re' wo' hin taq aaWaJaaw aaDios xineesanik taq cha weh Egipto. Eh cha pahqaaj taq chib'ih taq inawaaj re' hin naa nuye'em taq aweh. 11Xa re' la' re' nutinamiit Israel xama' xinkinimaj ta wo' hoq. Eh xama' xkaaj ta wo' nuwach, 12ruum i re' xnuyeew q'ab' chi xkian i xkaaj i keh. Eh xi k'acharik nik' wach i xponik chikiwach i keh. 13Wi ta xkib'iraj i xnuq'or keh i nutinamiit Israel, xkik'am ta naah i nuk'uhb'aal. 14Re' hin xa chi jumehq'iil naq xnub'an keh inixowanik kiwach. Eh xnuyeew naq taqe panti' k'axik, inki Dios. 15Re' taqe i ki-ixowanik wach i QaJaaw Dios naakiloch'om kiib' chuwach. Eh junelik naakiye'ariik chutojariik i kimahk. 16Eh re' QaJaaw Dios nee naq i ruk'uxlaaj taqe ruuk' i chihooj laj trigo, eh ruuk' i riis kaab' i nelik cho panab'aj.

will be added

X\