1 QaJaaw Dios, hat aj cha'jen qeh i hoj, hoj aj Israel, je' incha'jaljik tentzun i na a'n i riih rumaam i José. Eh ar wilkaat chi kixilak i k'achaach wilik kixiik', cha k'uhtaaj i rusaqumaal aaloq'il 2 Je' wo' hoq junch'uq chi tinamit Efraín, i tinamit Benjamín, i tinamit Manasés, chawilow, chako'leej taqe ruuk' awajaawriik. 3 QaJaaw Dios, qoh atoob'eej reh chi nee wo' chik qohkahnik chi je' rukab' i pampeet. Suq tii qilariik cha a'n, eh qoh ako'leej. 4 QaJaaw Dios, nim awajaawriik, ¿xti kojaruuj i rumay aajosq'iil chi qanaah? ¿Mi xti ma' naa chik ab'iram re' i qatiij i hoj, hoj aatinamiit? 5 Xa re' chikoq'ik inqawab'eej ruum i ruti'kiil qak'ux i nayeew, eh re' qahaa' re' suq suq laj oq'ik inqa'an. 6 Eh xoj akanaa' chi hoj kib'ajb'al i tinamit wilkeeb' chi qaka'jaah. Eh xa hoj kikaqse'lb'aal taqe i ki-ixowanik qawach. 7 QaDios, nim awajaawriik, qoh atoob'eej, reh chi nee wo' chik qohkahnik chi je' rukab' i pampeet. Suq tii qilariik cha a'n, eh nee qoh ako'leej. 8 Re' hat je' nehtesjik cho uuva xa a'n chaloq aatinamiit Egipto. Eh aha' xawesaj taqe reje i tokoom tinamit re' chik i keh xatik taqe ar. 9 Re' hat xames wach i ye'aab' re' re' chi kekeh, eh yohb'aal wach noq xi k'ihaaxb'ik. Xa je' chik rukab' noq i ruk'am raa' i uuva. 10 Eh noq xi k'ihaaxb'ik xa je' chik rukab' i rub'an i uuva, rutz'ap naah taqe i ch'ahn i rumuuj. Eh re' taqe q'ab' i rutz'ap naah taqe i nimaq chee'. 11 Eh re' taqe q'ab' xik'ihik reje, je' naa xi ponik chinaah i palaw, re' rutoxl je' naa xponik ko chi chii' i nim ha' Éufrates. 12 ¿Chib'ih reet noq xa a'n reh aatinamiit je' rukab' i ruk'ul i uuva noq inehteesjik i koraal chi riij, eh inik'ik sik'aroq i wach kuum taqe i aj b'eeh? 13 Re' i ki-ixowanik wach aatinamiit je' kikab' i k'ichi'ahq, je' kikab' i josq'laj chikop re' taqe re' insachwik kiwach. 14 Hat Dios nim awajaawriik, qoh atoob'eej cho pan taxaaj ruuk' i chib'ih i k'ahchi' qak'ulum, i hoj, i je' hoj uuva noq wilkooj. 15 Re' hoj je' naa qohtikarik uuva xooj a a'n je' naa xak'isaj johtoq i rutoxl. 16 Re' hat, chasach kiwach ruuk' awajaawriik i kich'uqwik reh, i kik'atwik reh i je' taqe uuva re' re'. 17 Xa re' la' chatoob'eej i winaq asik'im cho wach, re' i naa ruko'liniik qeh chi juneliik. 18 Chi je' re' ma' nee ta chik inqakanaa' qiib' chawiij, chayeew qak'achariik, xa re' chik i hat nee tiqaq'o'reej pan qatiij. 19 QaJaaw Dios nim awajaawriik, qoh akanaa' wo' chik chi je' rukab' i pampeet. Suq tii qilariik cha a'n, eh nee qoh ako'leej.
