SALMOS 79

1QaJaaw Dios, re' taqe ma' kinimanik taa weh xkichop naah aaye'aab'. Xkich'uwa'reej paam aSantolaj paat. Eh xkisach wach i tinamit Jerusaleem. 2Eh re' i kiti'jolal taqe awaj kamanoom, taqe i santo laj awaj nimaneel, xkiyeew chi rutiib' k'uch, chi rutiib' taqe josq'laj chikop. 3Re' kikik'eel xa je' chik inchihkik ha' kuum chupaam chu'nchel i tinamit Jerusaleem, eh ma' awach ta nmuuq'anik keh. 4Ruum i re' q'e' hoj kib'ajb'al, eh hoj kise'lb'aal taqe tinamit wilkeeb' chi junsuut i qatinamiit. 5QaJaaw Dios ¿Xti kojaruuj i nik'ik aajosq'iil? ¿Mi xa eliik naa ruqopiik chaajosq'iil chi qanaah je' rukab' noq inqop i q'aaq'? 6Chawik'saj la' aajosq'iil chikinaah i tinamit ma' kinimanik taa weh. Je' wo' chikinaah taqe i aj taaq'oom ma' nkian ta kitiij chawach. 7Ruum re' keh xkisach wach i Jacob. Eh xkisach wo' wach i rutinamiit. 8Chakuy, maa qohayeew chutojariik riij i kiyiib' wach na'ojb'al kianam chaloq i qamaam qati't. Chaketelaaj la' qawach chi jumehq'iil. Ruum re' hoj ma' nqakuy ta chik i ti' k'axik wilkooj wii'. 9QaJaaw aj ko'len qeh, qoh atoob'eej, qoh awesaj chupaam i ti' k'axik, cha kuy qamahk reh chi neenqayeew i ruloq'il aab'ihnaal. 10Reh chi ma' nee ta nkiq'or chi je' wili i ma' kinimanik taa weh: ¿Aha' wilik i ki Dios inkiq'or? ma' inko'q ta taqe. Inqaaj la' qilom chi neenaq'aj wach keh i kikanteesjiik taqe awaj kamanoom xkian. 11Chab'iraj i koq'iim i prexo wilkeeb' ruum i ti' k'axik. Eh chako'leej taqe ruuk' awajaawriik taqe k'ahchi' ruq'orariik chi naa kikanteesjiik. 12QaJaaw Dios, chayeew cho jilow wuquub'-oq pech keh i tinamit wilkeeb' chi qaka'jaah ab'ajariik xkian, ma' nkiyeew ta k'isinoq aloq'il. 13Eh re' hoj aatinamiit i je' hoj aatentzuun noq wilkooj, naaqat'iosem chi juneliik awotob'il, eh naaqatz'uyem awach, chiqiih chi qamaam.

will be added

X\