SALMOS 77

1Re' hin, re' nuDios inuq'o'reej chi kow panutiij, reh chi kirib'iraj. 2Eh noq intz'irik nuwach inusik' i QaJaaw, xa eliik wo' naq i nujosaj i nuq'ab' chub'aan i nutiij pantaq chaq'ab'. Xa re' la' xama' nureq ta wo' rusuqkiil i wánima. 3Noq ink'ulik panuk'ux i nuDios inchalik woq'iim. Eh noq i nukapaaj riij i rutz'irkiil nuwach inyoj wo' chik nuk'ux. 4QaJaaw Dios, re' hat ma' naaqasaj ta naq chik, i nuwiriik. Eh insahchik nuk'ux, xama' kinchol ta chik q'orik. 5Re' hin ink'ulik cho panuk'ux nik' wach xinik'ik cho wii' chupaam taqe q'iij, chupaam taqe haab' ik'inaq chaloq. 6Eh ink'ulik wo' panuk'ux noq inutz'uyej awach pantaq chaq'ab'. Eh i nukapaaj riij, i nupahqaaj panuk'ux chi je' wili: 7¿Mi ma' naa chik rik'iik chi jumpech re' i ruk'aah i QaJaaw? ¿Mi ma' nee wo' chik i ruyeew qeh re' i rotob'il? 8¿Xumay ta'j inchel i k'axooj chi jumpech? ¿Xsahchik ta'j inche paruk'ux i ruq'orom chaloq chi naa rub'anam quuk'? 9¿Xsahchik ta'j inche paruk'ux i Dios i rotob'il? ¿Mi xti ma' nkuyjik chik re' i rujosq'iil chi ma' neeruketelaaj qawach? kinki panuk'ux. 10Re' xti ruti'kiil panuk'ux i hin, re' chi nk'ulik panuk'ux chi re' qaDios nim rajaawriik, ma' rub'an ta chik qatoob'jiik je' rukab' i rub'an cho quuk' noq xub'an. 11Re' hin naa ruk'uliik panuk'ux taqe i sahchb'al k'uxliis rub'anam quuk' i QaJaaw najtir cho q'iij. 12Eh naa nukapaam riij chu'nchel i rub'anam, naa nuq'orom rib'iral chu'nchel i rub'an. 13QaJaaw Dios, re' hat ma' xta chik jino'q i Dios nim rajaawriik chawach ruum re' hat Santo ab'eeh. 14Xa re' wo' hat i Dios i na a'n taqe sahchb'al k'uxliis. Eh xayeew chi naab'jik awajaawriik keh i nimaq tinamit. 15Ruuk' awajaawriik xako'leej taqe aatinamiit re' taqe rak'uun rixq'uun i Jacob, ruch'ihil taqe i rak'uun rixq'uun i José. 16QaJaaw Dios, noq xrilow awajaawriik i palaw xyo'jik awuum, eh xti nk'uyu'jik taqe i ruha'iil xiik' naah kichamiil. 17Re' taqe suutz' xkiyeew chaloq i ma' k'isa jab'. Eh xa nteleninik chik i kahoq pan taxaaj, xan saqumanik chik i ruch'aab'. 18Eh x-ib'irjik noq xq'orik chaloq taqe kahoq chupaam i teew jab'. Eh xusihq'eej i wach ak'al taqe ruch'aab', xk'uyu'jik aak'al chi kow ruum iyihk. 19Xateh i-ik'b'al panyejaal i palaw, panyejaal taqe nim ha'. Eh noq xa a'n chaloq taqe re', ma' awach ta x-ilwik aweh. 20Re' hat xak'am cho kib'eeh aatinamiit chi je' kik'amarik cho tentzun. Eh re' Moisés, re' i Aarón xakoj chaloq chi k'amal kib'eeh.

will be added

X\