SALMOS 73

1Xti korik noq re' qaDios xiik' naah rotob'il kuuk' i aj Israel saq wach i kánima. 2Eh re' hin, k'isiin ma' xinkalojik, xwaaj naq nukanaam runimjiik i Dios. 3Ruum nukaqwachej taqe inkinimb'isaj kiwach, eh noq xwilow chi kielik korik i yiib' wach kina'ojb'al. 4Re' keh ma' kimik tan kikapaaj kow taqe ma' xta k'isinoq kiyab'ilaal. 5Eh ma' inkik'ul ta keh i ruti'kiil k'uxliis je' rukab' ink'ularik, ma' xta ti' inkik'ul je' rukab' inkik'ul i tokoom. 6Re' niimb'isanik kiwach inki a'n inkikoj chi xoyb'al kiib'. Eh re' i ti' k'axik inki a'n reh i tokoom inkikoj chi kiso'. 7Re' keh xa nelik chik chaloq inaq'kiwach ruum kiq'ina'iil. Eh xa re' i yiib' wach na'ojb'al inki a'n re' nujinaq cho pan kánima. 8Ruuk' jot'ooj, ruuk' niimb'isanik wachiis, ruuk' yiib' wach Q'orik inki a'n i ti' k'axik reh i kas kichaaq'. 9Eh inkib'aj i Dios wilik cho pan taxaaj. Eh re' inkiq'or imponik rib'iral chi junsuut i wach ak'al, 10Ruum aj re' inye'arik runimaal kiwach kuum i tinamit, inkikapaaj i keh chi ma' xtaj i yiib' wach inki a'n 11Eh je' wili inkiq'or: ¿Mi reht'al re' i Dios inki a'n? ¿Mi rukoj rehtaal re' i QaJaaw nim rajaawriik? inki taqe. 12Re' taqe yiib' wach kina'ojb'al re' re'. Ma' xta inq'ilwik keh noq inkimol wach i kib'ehomal. 13Re' hin wilik pech i nukapaaj chi xama' xta nkih chi saq wach i wánima oon chi nukanaam i yiib' wach na'ojb'al. 14Ruum re' hin chu'nchel i q'iij inkitib'isaj nuk'ux. Eh juneliik pantaq wahq'eq inki a'n ti' k'axik weh. 15Xnub'an ta wee hin i je' rukab' inki a'n i yiib' wach kina'ojb'al re' re', xnumin naq taqe panti' k'axik aawak'uun awixq'uun. 16Re' hin xwaaj naq nureqem chi riij, xa re' la' xama' xnureq ta wo' chi riij. 17Kore' noq xi nokik pan aapaat, kora'j xnureq chi riij re' aha' naa kojiik pa'lojoq i yiib' wach kina'ojb'al re' re'. 18Xnureq chi riij chi panyohb'aal taqe aye'em, k'ahchi' taqe aminim chupaam chi naa rojiik sahchoq kiwach. 19Eh xa chi jumehq'iil naa rojiik sahchoq kiwach. Ma' k'isiin ta naa ruchaliik kiyo'jiik, re' re' naa rub'aniik keh. 20QaJaaw Dios nik' wach noq inwuktik chi jumehq'iil jino'q i wirik i rub'an. Je' re' noq naa awuktiik i hat chub'aan keh i yiib' wach kina'ojb'al, ruum ma' imponik ta chawach inki a'n 21Eh noq xb'iraj chi je' re' naa a'nam keh, xtib'ik nuk'ux i hin, xa nyot'ik chik i wánima. 22Ruum re' hin ma' kinimanik ta naq chawach, ma' nureq ta naq chi riij je' naq nukab' i kawáyu. 23Atoob' ta je' re' nuna'ojb'al, re' hin xa awuuk' wo' hat nuye'em nuk'ux. Eh re' hat achopom chi rusak'aaj nuq'ab'. 24Eh i nak'am nub'eeh ruuk' aak'uhb'aal, eh na' ohoq kuxoq naa kiin ak'ulum chaawuuk' chupaam i loq'laj taxaaj. 25Re' hin xa awuuk' wo' hat i nuyeew nuk'ux, ruum ma' awach ta chik jino'q neentoob'inik weh chi je' rukab' i hat, ni xata taxaaj wilik, ni xata wach ak'al wilik. 26Re' nuti'jolal xama' xta chik rukowiil. Xa re' la' weht'al chi re' Dios inko'linik weh, eh re' reh inye'wik rukowiil i wánima chi juneliik. 27Eh re' taqe inkikanaa' animjiik naa kikimiik, eh naa asacham wach i ma' korik ta wach ruk'ux awuuk'. 28Eh chi wee hin q'e' chihooj animjiik hat waJaaw nuDios. Ruum xa re' wo' hat ti ko'linik weh, naa nuye'em nuk'ux awuuk' reh chi naa nuq'orom rib'iral chu'nchel i na a'n.

will be added

X\