SALMOS 72

1QaJaaw Dios, chayeew ta tii runa'ojb'al, rukorkiil wach ruk'ux i wak'uun naa rokiik chi reyil. 2Reh chi parub'ehel naa ruq'atam q'orik chikinaah aatinamiit. Eh parub'ehel naa ruq'atam q'orik chikinaah ti' wilkeeb'. 3Re' taqe ye'aab' parax yuuq' nee ta naq ruyeew taqe pansuqkiil k'uxliis, parurukorkiil wach k'uxliis i tinamit. 4Re' naa rokiik chi reyil naa rub'anam i q'ataj q'orik parub'ehel. Eh naa ruko'leem taqe i ma' xta wilik keh, eh naa rusacham kiwach imb'anik ti' k'axik keh. 5Eh naakiyohleem awach nik' najtiil naa rub'anam i rusaqumaal i q'iij, i rusaqumaal i poh ayu' wach ak'al. 6Eh nee ta naq i rujoot'isaj wach i ti' k'axik je' rukab' rub'an i jab' noq i rut'aqsaj aak'al, eh noq i rut'aqsaj taqe i ch'ahn. 7Nik' najtiil naa rub'anam i taaq'anik nee ta naq inwihik i suq kiil k'uxliis, rukorkiil wach k'uxliis nik' najtiil neerub'an i rusaqumaal i poh ayu' wach ak'al. 8Neeta naq inwihik rajaawriik chinaah i palaw, je' wo' chinaah i palaw jinaj chik, je' wo' chinaah i nim ha' Éufrates, je' wo' sut i wach ak'al. 9Eh re' taqe wilkeeb' panchiq yuuq' inaakixowaniik wach, nee ta naq inkiloch' kiib' chuwach noq neenkiq'asaj kiib' reh. 10Eh ma' k'isiin i rukooch naa ruk'uliik ye'aroq kuum i ruch reey, naa kichaliik Tarsis, inaakichaliik chupaam i ye'aab' sutimaj riij chi ha', inaakichaliik Sabá, eh Seba. 11Chu'nchel ta naq i reey neenkixuk'aa' kiib' chuwach. Eh chu'nchel ta naq i tinamit neekik'ulwik reh. 12Re' reh naa ruko'liniik reh i ti' wilik re' i rupahqaaj chi naa rutoob'jiik. Eh je' wo' hoq i ma' xta wilik reh, ma' awach ta ntoob'inik reh. 13Re' reh naa ruketelaam kiwach i xama' nimaq ta kiwach. Eh naa ruko'leem riij i kik'achariik ti' wilkeeb'. 14Naa wo' ruko'leem taqe chuwach i yiib' wach minooj taqe wii'. Eh je' wo' chuwach taqe i ti' k'axik, ruum q'e' k'ih tz'aaq i kik'achariik chi ree reh. 15Najt ta naq neenk'acharik i naa rokiik chi reyil. Neeta naq inye'arik reh i oro inchalik Sabá. Pahqb'al ta naq i rotob'il i Dios chi riij i reh chi neenkuxesjik. 16Neeta naq kiwachinik i trigo panqatinamiit, nee ta naq kiwachinik i tik ju' taq yuuq'. Je'-oq kik'ihaal i chee' wilkeeb' Líbano, nee ta kik'ihaaxb'iik i tinamit chi je' kik'ihaal taqe ch'ahn wilkeeb' wach ak'al. 17Ma' ta naq neensahchik wach i rub'ihnaal i naa rokiik chi reyil. Holohik ta naq rib'iral chi juneliik nik' najtiil naa ruwihiik i rusaqumaal i q'iij. Eh chu'nchel ta naq i neen kik'ul i rotob'il i Dios ruum i reh, eh nee ta naq i inkiq'or chi atoob' reh. 18Neeta naq inye'arik ruloq'il i QaJaaw, re' i qaDios i hoj, hoj aj Israel, ruum xa re' wo' reh imb'anik i nimaq wach na'ojb'al. 19Eh nee ta naq inye'arik ruloq'il chi juneliik i loq'laj rub'ihnaal. Neeta naq inwihik kuuk' i ruloq'il chu'nchel i tinamit. Je' ta wo' naq re'. 20Ayu' xukohlaaj wach i rutiij i reey David rak'uun i Isaí.

will be added

X\