SALMOS 71

1QaJaaw Dios, xa awuuk' i hat inusik' ko'lemb'al wiib'. Ma' ta naq neenuk'uhtaaj nuk'ixb'ilaal. 2Eh kinatoob'eej, kinako'leej ruuk' i rukorkiil wach ak'ux, eh kinawesaj chupaam i ti' k'axik. 3Je'-oq akab' jino'q i saqrehp ab'aj ke'emb'al iib', reh chi nee kinako'leej kinatoob'eej. Eh kinako'leej tii ruum xa re' wo' hat ti ko'linik weh. 4WaJaaw nuDios, kinako'leej pan kiq'ab' i yiib' wach kina'ojb'al, pan kiq'ab' i kib'anik weh i re' ma' re', yohb'aal wach i kijosq'iil. 5Re' hin i nupahqaaj otob'il aweh ruum xa awuuk' wo' hat inuch'ikaa' nuk'ux. Eh re' wo' hat ticha'jinik weh noq ko hin cho ak'un. 6Eh xa awuuk' wo' hat i nuyeew chee nuk'ux noq ko xintz'uhkrik cho ruuk' i nutuut. Eh ruuk' awotob'il xin-aasjik ruum aj re' naa nuye'em aloq'il chi juneliik. 7Ma' k'isiin taqe insahchik kik'ux noq inkilow chi re' hat ruuk' awajaawriik kinako'leej chupaam i ti' k'axik. 8Je' re' noq re' hin chu'nchel q'iij i nuyeew aloq'il ruuk' nuchii', eh i nuyeew runimaal awach. 9Re' hin weht'al chi ma' nee ta kinakanaa' chi wutkeel, atoob' ta hin chik riji' winaq chi korik, atoob' ta ma' xta chik rukowiil i nuti'jolal. 10Re' taqe ki-ixowanik weh xkian jinaj wach k'ik'ux. Eh pankomonil k'ahchi' kiyejaam wach nukanteesjiik. 11Je' wili inkiq'or chi wiij: Qasik' qachop taq, ruum xkanab'jik chik ruum i ruDios, ma' awach ta chik neenko'linik reh, inki taqe. 12QaJaaw Dios, makinakanaa' tii chi wutkeel, kinatoob'eej la' chi jumehq'iil. 13Neeta naq inkik'uhtaaj kik'ixb'ilaal, nee ta naq insahchik kiwach inkaaj nukanteesjiik. Eh nee ta naq kikahnik chi xa se'lb'al taqe i xa re' i ti' k'axik inki a'n weh. 14Eh re' hin juneliik k'ahchi' wuy-eem aawotob'il, eliik neenuyeew aloq'il. 15Eh ruuk' nuchii' naa nuq'orom chi korik wach ak'ux, juneliik naa nuq'orom rib'iral chi xa re' wo' hat ti ko'linik qeh. Eh re' hin xata wo' jarpech hin ako'leem. 16QaJaaw Dios, re' hin naa nuq'orom rib'iral taqe nimaq wach na'ojb'al aab'anam chaloq. Eh naa wo' nuq'orom rib'iral chi xa re' wo' hat korik wach ak'ux. 17WaJaaw, nuDios, re' hat kopan wak'uniil xtohq'ik cho ak'uhtaam weh i korik, eh xink'u'loq ayu', yu'naak chi kok'ahchi' nuq'orom rib'iral taqe i na a'n ruuk' i runimaal awajaawriik. 18WaJaaw, nuDios, makinakanaa' chi wutkeel atoob' ta hin chik riji' winaq, saq chik i rismaal nunaah. Ruum re' hin ko nwaaj nuq'orom rib'iral awajaawriik keh i wilkeeb' yu'naak keh i naa kiwihiik na'chub'an. 19NuDios, re' rukorkiil wach ak'ux xiik' naah nimaal wach. Ruum re' hat yohb'aal wach i na a'n ruuk' awajaawriik. Eh ma' xta chik jino'q Dios chi je' rukab' i hat. 20Atoob' ta xayeew q'ab' chi xnuk'ul i ma' k'isa ti' k'axik. Eh ma' k'isiin ta xtib'ik nuk'ux nee wo' chik i nayeew nukowiil pan chaamlaj jul naa kiin awuksam chaloq. 21Eh naa aye'em ruman i runimaal nuwach, eh naa wo' chik aye'em rusuqkiil nuk'ux. 22Re' hin naa nut'iosem aweh i na a'n. Naa nutz'uyem awach ruuk' arpa, ruuk' k'ahaam wach q'ooj, i hat nuDios, Santo chikinaah i qatinamiit Israel. 23Eh xasuq chik nuk'ux noq neenutz'uyej awach ruuk' nuchii'. Chu'nchel wánima nee tinuloq'ej ruum re' hat xat ko'linik weh. 24Eh juneliik naa nuq'orom rib'iral chi re' hat korik wach ak'ux. Aha' naq wilik taqe i xa re' i ti' k'axik inkaaj kianam weh ma' k'isiin ta xkik'uhtaaj kik'ixb'ilaal.

will be added

X\