SALMOS 7

1WaJaaw nuDios, awuuk' i hat nuye'em nuk'ux. Kinako'leej chikiwach chu'nchel i ki-ixowanik nuwach. 2Ma' inwaaj tee hin chi neenkixereb'eej i nuti'jolal je' rukab' i rub'an i kaq b'ahlam reh i rutiib'. Ruum aj re', inwaaj chi nee kinako'leej i hat. 3WaJaaw nuDios, wila' ma' holohik i k'ahchi' kiin, wila' ma' holohik i nuna'ojb'al, 4eh xnub'an oon i ti' k'axik keh i wamigo. Eh re' taqe i ki-ixowanik nuwach ma' nik' ta xnub'an ti' k'axik keh chi ma' xta rub'ehel. 5Eh wila' yiib' wach i nuna'ojb'al, neerub'an chi nee kinkichop taqe i ki-ixowanik nuwach nee kinkiqerej wach ak'al. Eh neerub'an chi neenkiyeq' panak'al i runimaal nuwach. 6WaJaaw nuDios, cha k'uhtaaj aajosq'iil keh i yohb'aal wach i kijosq'iil chi nunaah. Ruum re' hat i q'atal q'orik, eh inwaaj chi neena a'n otob'il weh. 7Chamol kiwach chu'nchel i tinamit. Chak'uhtaaj i runimaal awajaawriik chikinaah. 8WaJaaw nuDios, re' hat ti q'atwik q'orik chikinaah i tinamit. Re' hat aweht'al chi re' hin korik wach nuk'ux, k'oloq panak'ux chi ma' xta numahk. 9Jaaw, re' hat korik wach ak'ux, eh aweht'al chib'ih i wilik cho paránima, parukapeb'aal i ju'jun. Eh chasach wach inki a'n i yiib' wach kina'ojb'al. Eh re' i ma' xta ru mahk chawach, chatoob'eej. 10Re' inko'linik wee hin re' Dios nim rajaawriik, eh re' wo' inko'linik keh i korik wach i kánima. 11Re' Dios parub'ehel inq'atwik q'orik. Eh juneliik i ruq'at q'orik chikinaah i yiib' wach kina'ojb'al. 12Wila' ma' xkiyot' i kik'ux chi riij i kimahk. Re' Dios naa rujuk'um ruch'ihch', ruyejaam chik i ru flecha. 13Re' Dios ruyejaam chik choo wach i rukanteesb'aal. Eh ruuk' flecha qoplik ruq'aq'al k'ahchi' choo kitz'ehtjiik. 14Re' i yiib' wach imb'anik, ti' wilik, ruum xa re' yiib' wach na'ojb'al hamlik cho paránima. Eh xa re' i chukuj q'orik i nelik choo panchii'. 15Re' reh naa ruk'otom jino'q i chaamlaj jul, eh chupaam i re' naa ruq'ehb'iik. 16Re' yiib' wach na'ojb'al i rub'an, ruch'ihil taqe ti' k'axik i rub'an keh i tokoom, wach naah i reh naa rusutiniik. 17Re' hin nuyeew ruloq'il i QaJaaw Dios ruum parub'ehel inq'atwik q'orik. Naa nutz'uyem wach i QaJaaw Dios wilik cho pan taxaaj.

will be added

X\