SALMOS 66

1Re' taq i hat i wilkaat taq chi junsuut i wach ak'al, chayeew taq ruloq'il i Dios chi suq taq ak'ux. 2Eh cha a'n taq atz'uuy parub'ihnaal i QaJaaw Dios ye'b'al runimaal wach. 3Je' taq wili i cha q'or reh i QaJaaw Dios panatz'uuy: Re' taqe ayejaam xiik' naah kiholwochiil. Eh ruum i runimaal awajaawriik inkiloch' kiib' chawach taqe i ki-ixowanik awach. 4Eh re' i tinamitsut i wach ak'al tikiloq'ej. Eh inki a'n kitz'uuy panab'ihnaal tiko'q taq reh. 5Chab'iraj taq, chakoj taq rehtaal i rub'anam i Dios. Chakoj taq rehtaal i sachb'al k'uxliis rub'anam kuuk' i rutinamiit. 6Re' reh xuchiqsaj i yejaal i kaq palaw, je' wo' nim ha' Jordán noq ki-ik'ik ar i rutinamiit. Ruum aj re' suuqb'oq qak'ux ruuk' i Dios. 7Eh ruuk' i rajaawriik i rub'an i taaq'anik chi juneliik, eh reht'al chib'ih inki a'n chu'nchel i tinamit. Eh naa ruq'atam wach i kajaawriik i ma' kinimanik ta ree reh. 8Hat taq tinamit chayeew taq ruloq'il i qaDios. Chatz'uyej taq wach chi loq'oomb'al reh. 9Ruum kok'ahchi' ruye'em cho qak'achariik, eh ma' xuyeew ta q'ab' chi xsacharik taq awach. 10QaJaaw Dios, re' hat xoj anik'eej ruuk' i qanimaniik. Eh xojawik'saj pan xaq q'aaq', je' rukab' noq inik'tesjik wach q'aaq' i manlik plata. 11Xojayeew pan jinaj k'axik, je' naa jino'q ahl laj ihq xayeew chi qanaah. 12Eh xayeew q'ab' chi xojkiyeq' panak'al i ki-ixowanik qawach, eh xojik'ik pan xaq q'aaq', xojik'ik chupaam elal ha'. Eh noq xooj kuxoq xojawisaj chupaam xoj ponik chupaam i ye'aab' xojhi'lik wii'. 13Re' hin naawokiik chupaam aapaat chuk'atariik i numayiij. Chi je' re' naa nub'anam i nuq'orom aweh. 14Re' xnuq'or chaaweh chi naa nub'anam noq xinwihik cho panti' k'axik. 15Eh naa nuk'atam wach artaal chi numayiij taqe q'ina' laj chikop. Naa nuye'em aweh taqe b'ooyax, taqe imas tentzun, je' wo' taqe imas kaprax. Reh chi nk'ohnik neemponik chuwach. 16Kim taq chawunchelaal i hat i tiyohlinik ree Dios. Eh chab'iraj taq, re' hin naa nuk'utjaam taq aweh i rub'anam wuuk' i Dios. 17Eh ruuk' nuchii' xnuq'o'reej wuuk', eh xnuyeew ruloq'il ruuk' i nutz'uuy. 18Wi ta re' taqe i yiib' wach wilik pan wánima, re' QaJaaw Dios ma' xirib'iraj ta naq. 19Xirib'iraj la' i reh, xuyeew cho weh taqe i xnupahqaaj reh panutiij. 20Loq'imaj taa naq i QaJaaw Dios, ruum xrib'iraj i nutiij, eh ruum chi xuketelaaj nuwach.

will be added

X\