SALMOS 62

1Xa re' wo' ruuk' i Dios inureq i rusuqkiil nuk'ux. Eh re' wo' reh inye'wik i ko'lemb'al iib'. 2Xa re' wo' reh intoob'inik weh, eh xa re' wo' reh inko'linik weh. Ma' nee ta nuq'eb' wiib' ruum re' reh incha'jinik weh. 3Eh ¿ko jaruuj taq inakanaa' nupeletohjiik i hat inawaaj taq aq'atam nuwach. Re' taq i hat i nakapaaj taq chi je' nukab' jino'q i tz'aq xa q'ehb'ik chik reh. Eh i nakapaaj taq chi je' nukab' i koraal xa q'ehb'ik chik reh wach ak'al? 4Re' taq i hat xa re' i rehtesjiik i wajaawriik taq inakapaaj, i nayeew taq ak'ux chi chukuj q'orik. Eh xa chachii taq kinak'ax, eh chupaam taq awánima ma' holohik taj inakapaaj chi wiij. 5Re' hin xa ruuk' wo' QaJaaw Dios i nureq rusuqkiil nuk'ux. Eh xa ruuk' wo' reh inuch'ikaa' nuk'ux. 6Xa re' wo' reh intoob'inik, inko'linik weh jinaj paat ab'aj ko'lb'al iib' chi weh ma' nee ta nuq'eb' wiib' ruum re' reh incha'jinik weh. 7Re' Dios inye'wik weh i ko'lemb'al wiib'. Eh re' reh inye'wik weh i nuloq'il, re' wo' reh incha'jinik weh. 8Hat taq nutinamiit juneliik taq chayeew ak'ux ruuk' i Dios. Eh chu'nchel ak'ux cha a'n taq atiij chuwach ruum xa re' wo' reh i Dios inko'linik qeh. 9Re' taqe winaq xama' xta kiokik wii', chi je' taqe b'ehoom, chi je' taqe neb'aa'. Neeta naq kipajarik pan jino'q pexu eliik naq kiwach chi ma' ruk'aaj ahl taqe, ahl naq k'isinoq inerupaj i teew chikiwach. 10Mayeew taq ak'ux chinaah i peletohinik. Eh mo'-oq xa ruuk' taq i leq' neenareq ab'ehomal. Eh wila' xk'ihaaxb'ik taq i chib'ih aweh maayeew taq ak'ux chinaah. 11Re' Dios jinaj i Q'orik ruq'orom chaloq, eh ma' xata junriim b'iram i hin chi xa re' wo' reh nim rajaawriik. 12QaJaaw Dios xa re' wo' hat tiketelinik wachiis, ruum re' hat i nayeew kitojb'aal i ju'jun re' q'oreel chib'ih xkian i xkiq'or.

will be added

X\