1 QaJaaw Dios, kinako'leej tii pan kiq'ab' i ki-ixowanik nuwach. Eh kinako'leej pan kiq'ab' inkaaj kianam weh. 2 Eh kinako'leej pan kiq'ab' i ma' holohik ta kib'anik, kinako'leej wo' pan kiq'ab' i kansan kas kichaaq'. 3 Kinako'leej chikiwach i yiib' wach kina'ojb'al wilik kajaawriik inki a'n kiib' inkaaj kianam weh. QaJaaw Dios re' hat aweht'al chi ma' ruum ta numahk inkaaj kianam weh. 4 Atoob' ta ma' xta numahk xankaaj chik nukanteesjiik. QaJaaw Dios chawilow i ti' k'axik k'ahchi' nuk'ulum kinako'leej chi jumehq'iil. 5 QaJaaw Dios, nim awajaawriik, hat ki Dios i aj Israel. Chakoj rehtaal inki a'n taqe i tinamit ma' kinimanik taa weh, chayeew taqe chutojariik i kimahk. Maaketelaaj kiwach ruum ma' holohik ta kib'anik. 6 Eh rajlaal xq'eq inchalik, kisutej riij i qatinamiit inkik'er kichii', je' rukab' i rub'an i tz'i' noq inokik chi ti'ooj. 7 Xa npuhik chik i kichii' chuq'orariik taqe i yiib' wach q'orik je' wili nkiq'or: Ma' awach ta inib'irinik qeh nki taqe. 8 Eh re' hat QaJaaw Dios xan chalik ase'eel inki a'n eh xama' nayeew ta wo' rajaawriik inki a'n taqe i ma' kinimanik taa aweh re' re'. 9 QaJaaw Dios, re' hat nee ti ko'linik weh chuwach, i kajaawriik i ki-ixowanik nuwach. Ruum xa re' wo' hat nee ticha'jinik weh. 10 Re' QaJaaw Dios inketelinik nuwach re' reh naa rutoob'inik weh, reh chi neenuq'at wach i kajaawriik i ki-ixowanik nuwach. 11 QaJaaw Dios, maakansaj peet taqe i re' xa chatukej la' kiwach. Eh chawesaj i kajaawriik, reh chi ma' nee ta nsahchik pankik'ux i nutinamiit i re' hat ti ko'linik qeh. 12 Ruum re' keh juneliik k'ahchi' kimahkunik ruuk' i kiq'oral. Chayeew taqe panti' k'axik ruum q'e' inkinimb'isaj kiib', ruum i yiib' wach, ruum taqe chukuj q'orik inki a'n 13 Eh chasach kiwach ruuk' aajosq'iil, reh chi chu'nchel neenkikoj rehtaal chi re' hat i Dios wilik awajaawriik chi taaq'anik chikinaah i aj Israel. Je' wo' chikinaah chu'nchel i tinamit sut i wach ak'al. 14 Re' taqe ki-ixowanik nuwach rajlaal xq'eq inkisuteej riij i qatinamiit, inkik'er kichii', je' rukab' i rub'an i tz'i' noq i rutoq'aa' ti'ooj. 15 Re' keh kikotik chusik'ariik i k'uxumb'al keh. Eh inkilow chi ma' nkireq taj inkitoq'aa' kik'erem kichii', je' rukab' i rub'an i tz'i' i rutoq'aa' intz'uytz'utik. 16 QaJaaw Dios, re' hin naa nutz'uyem awach ruum i awajaawriik, naa nuye'em aloq'il pan wahq'eq ruum i naaketelaaj nuwach. Ruum xa re' wo' hat titoob'inik weh, tiko'linik weh panti' k'axik. 17 Re' hin naa nutz'uyem awach ruum re' hat ti ye'wik rukowiil nuk'ux, hat ti ko'linik weh, hat i Dios tiketelinik nuwach.
