SALMOS 55

1Hat nuDios, chab'iraj tii i nutiij, maakanaa' chi je' re' i nupahqaaj aweh. 2Kinab'iraj tii, chayeew weh aha' wilik inwaaj, ruum noq k'ahchi' kiin chi nutiij xa nyot'ik chik i wánima. 3Eh kiyo'jiik ruum inkiq'or chi wiij i ki-ixowanik nuwach, re' taqe i yiib' wach kina'ojb'al inkikoj numahk. Eh yohb'aal wach i kik'aah, inkaaj kianam weh. 4Eh re' wánima xa nyot'ik chik inwik'raaj, ma' k'isiin ta nchalik nuyo'jiik noq imb'iraj rib'iral chi naa kinkikansam. 5Re' hin kiyo'jik xa kinb'arb'otik chik. Je' nchi xanaa chik nukimiik noq inwik'raaj. 6Ruum aj re' i nuq'or chi je' wili: Wilik ta naq nuxiik' chi je' rukab' i paloma nee naq kinrupinik reje nee naq kinooj hi'loq. 7Eh jumehq'iil naq nee kinrupinik reje chi najt. Eh nee naq kinooj chi patinik panchiq yuuq'. 8Jumehq'iil naq neenukeb'aa' wiib' chikiwach i yohb'aal wach i kijosq'iil chi nunaah xa je' chik rukab' i kaq suut teew jab', kinki. 9QaJaaw Dios, nee ta nasach kiwach ruuk' i kiq'oral. Ruum re' hin xnukoj rehtaal chi xa re' i ti' k'axik xa re' i peleto inki a'n ree tinamit. 10Re' keh chi q'iij chi aq'ab' kikotik chi riij i tz'aq kotimaj wii' riij i tinamit, re' yiib' wach na'ojb'al inki a'n eh xa re' ikaansanik inkaaj. 11Xa re' rub'anariik i ti' k'axik inkikapaaj, xa re' jot'ooj, xa re' ileq' inki a'n pantaq ookb'al reh i tinamit. 12Re' imb'anik weh i ti' k'axik ma' re' ta jino'q inixowanik nuwach. Wi ta re' jino'q inixowanik nuwach xnukuy naq, oon xnukeb'aa' naq wiib' chuwach. 13Re' la' hat k'ahchi' ab'aniik ti' k'axik weh i hat naq naah wamigo, xanaah re' ma' hat ta naq tokoom wuuk'. 14Xanaah re' noq xub'an xti suq inqaq'oreej qiib' awuuk'. Eh quch'ihil qiib' xasuq chik inqa'an noq qohponik chulooq'jiik i Dios chupaam i rupaat. 15Xa chi ma' keht'al ta naq neenk'uloq i kimik chikinaah i ki-ixowanik nuwach. Neeta naq kimuhqik chi k'achilik kiwach, ruum xa re' i ma' tob'laj na'ojb'al wilik pan kánima. 16Eh re' hin, re' nuDios naa nuq'o'reem, eh re' reh neenko'linik weh chupaam i ti' k'axik. 17Re' hin naa nuq'o'reem i QaJaaw Dios ruuk' ooq'ik, pan wahq'eq, kab'lajora i q'iij, chaq'ab'. Eh re' reh naa kiin rib'iram. 18Re' reh naa ruko'liniik weh panq'aq'inik, chuwach i kimik, atoob' ta naq yohb'aal wach kik'ihaal taqe i neenkaaj nukanteesjiik. 19Re' QaJaaw Dios wilik rajaawriik chi taaq'anik, neerib'iraj i nutiij. Eh naa resam i kajaawriik taqe i aj ixowaal, ruum re' keh ma' nkijal ta wach i kina'ojb'al. Ni xata nkiyohleej i Dios. 20Eh aha' naq wilik i kamigo, inki a'n ti' k'axik reh. Aha' naq wilik i k'axooj naa kianam noq inkiq'or xama' kian ta wo' hoq. 21Eh xa ch'ub'ik chik i kiq'oral inki a'n kiib', xa je' chik ch'ub' kiil mantekilla. Xanaah re' xa re' i q'aq'inik inkaaj. Xa je' wo' naq chik ch'ub' kiil aseite i kiq'oral inki a'n kiib'. Xanaah re' q'e' ti' kiq'orik, xa je' chik rukab' i ruyok' i q'aslaj ch'ihch'. 22Chakanaa' pan q'ab' i QaJaaw Dios chu'nchel i tiqaaj wii' kapeew re' reh neentoob'inik aweh. Ruum re' i QaJaaw Dios ma' jaruuj neeruq'eb' i korik wach ruk'ux. 23QaJaaw Dios, re' taqe kaansoom, taqe i chukul q'orik ma' naa ta kik'achariik yejaal-oq i kik'achariik. Ruum re' hat naa aye'em q'ab' chi naakikimiik chi jumehq'iil. Eh re' hin, awuuk' i hat i nuyeew nuk'ux.

will be added

X\