1 QaJaaw Dios ruuk' ak'axb'al chaketelaaj tii nuwach. Eh ruuk' i runimaal aawotob'il chajux taqe i ruyib'kiil wach i nuna'ojb'al. 2 Chatz'aj iloq i ma' holohik taj i nub'an. Xti chawesaj iloq taqe numahk. 3 Ruum re' hin xnukoj rehtaal chi ma' tinunimaj taj, re' i numahk ma' jaruuj iraaj elik pan wánima. 4 QaJaaw Dios, re' hin xa re' i yiib' wach, xa re' i mahk i nub'an chawach. Eh xa re' chik i ma' imponik ta chawach i nub'an, ruum i re' parub'ehel xaq'at i q'orik chi nunaah, xti ruk'ul chi je' re' i xa a'n 5 Xti korik noq xa hin wo' aj mahk noq xintz'uhkrik chaloq. Eh xa pamahk wo' hin cho aasjinaq ruuk' i nutuut. 6 Re' hat QaJaaw Dios xtimponik chawach i korik. Eh xayeew weh chi naab'jik kopan wánima i holohik laj na'ojb'al. 7 Chatz'aj iloq i numahk ruuk' q'ab' chee' hisopo. Chatz'aj iloq i numahk reh chi neenkahnik chi xasaq saq chik i wánima, xa je' chik rukab' i saq laj suutz'. 8 Chayeew wo' chik rusuqkiil nuk'ux, makinakanaa' chi ntz'irik nuwach. Reh chi neenik'ik i nuti'kiil xinawik'saj wii'. 9 Chawesaj panaq'awach chu'nchel i numahk, chajux chu'nchel i yiib' wach xnub'an. 10 QaJaaw Dios, chasaqb'isaj wach i wánima. Chajal wach i wánjel nut'iosil reh chi neenub'an i korik chawach. 11 Maa kinaq'eb' tii chi riij ak'ux, eh maawesaj pan wánima aSantolaj Uxlab'al. 12 Chayeew wo' chik weh i suq kiil k'uxliis i ruyeew i ko'lemb'al iib'. Eh chayeew rukowiil nuk'ux ruuk' aSantolaj Uxlab'al q'e' atoob'. 13 Reh chi neenuk'uhtaaj keh aab'eeh i ma' kinimanik taa weh, reh chi nee wo' chik ti kinimaj taqe aj mahk. 14 QaJaaw Dios, aj ko'len weh, makinayeew tii chi tojariik i numahk chi riij ikaansanik xnub'anam, ruuk'tz'uuy neenuq'or chi korik wach ak'ux. 15 QaJaaw Dios, kinatoob'eej reh chi ma' nim k'ayeew ta noq neenteh i nuchii' reh alooq'jiik. 16 Ruum re' hat ma' re' ta wo' mayiij inawaaj, nee ta nuyeew aweh i k'atoj chikop chi numayiij xama' nee ta wo' naq inawaaj. 17 Re' mayiij inawaaj i hat QaJaaw Dios re' chi naa nuyot'om i wánima re' yot'oj k'uxliis chi riij mahk. Ruum re' hat ma' nee ta naq'eb' awach ineeruloch' riib' chawach. 18 Chaketelaaj ta tii wach i Sión. Eh chayeew wo' chik q'ab' chi neen korjik i tz'aq kotimaj wii' riij i tinamit Jerusaleem. 19 Eh neenak'ul i mayiij imponik chawach. Eh nee wo' nak'ul taqe chikop chi neenk'atarik chi mayiij chawach, eh neekik'atarik i kok' imas wakax chinaah aa artaal.
