1 Re' QaJaaw Dios nim rajaawriik, i ma' xta chik jino'q Dios chuwach. Re' reh xuq'oreej xuyuq'eej taqe i tinamitsut i wach ak'al. 2 Re' QaJaaw Dios chupaam i ye'aab' Sión xuk'uhtaaj i ruloq'il, je' wo' hoq i rusaqumaal. 3 Eh re' Dios ma' xata je' wili noq naa ruk'uliik, peet la' cho chuwach i q'aaq' aj kansaneel. Eh pa runimaal kaaq suut teew naa ruk'uliik iloq. 4 Re' QaJaaw Dios, naa ruq'oreem i wilkeeb' pan taxaaj, i wilkeeb' wach ak'al, reh chi naa kilom noq naa ruq'atam i q'orik chinaah i rutinamiit. 5 Eh je' wili naa ruq'orom: Kimol kiib' taqe i nuSantolaj aj nimaneel. Re' i kiq'orom chi naa kianam inwaaj noq xkik'at i kimayiij chi nuwach, inko'q. 6 Re' taqe wilkeeb' pan taxaaj kiq'orik chi re' qaDios korik wach ruk'ux. Eh chi parub'ehel inq'atwik q'orik. 7 Re' QaJaaw Dios je' wili xuq'or: Chab'iraj taq i hat aj Israel hat taq nutinamiit re' hin naa nutehem wach taqe i ma' holohik ta taq i na a'n. Re' hin, hin taq aaDios. 8 Re' hin ma' ruum ta chi ma' nayeew ta taq amayiij k'ahchi' taq kaatnuq'ilim, ruum re' taq i hat juneliik i nak'am taq chaloq ak'atoj mayiij. 9 Re' hin ma' k'ahchi' ta nupahqaam taq aweh aak'isa imas wakax, ni xata re' i kok' imas kaprax wilkeeb' taq panakoraal. 10 Ma' k'ahchi' ta nupahqaam taq aweh, ruum weh chu'nchel i chikop, chi je' taqe josq'laj chikop wilkeeb' pantaq ch'ahn, chi je' aachikoop taq i hat. 11 Wehin taqe i chikop kirupinik pan taxaaj wilkeeb' paraxchee', je' wo' chu'nchel i chikop inkik'er kichii' pantaq ch'ahn. 12 Eh nee ta inchalik nunuhmiik ma' nee ta wo' naq taq i nupahqaaj nuwa' aweh, ruum weh chu'nchel i wach ak'al, je' wo' i wilkeeb' chupaam. 13 ¿Mi nuk'ux re' i kitib'kaal i kok' imas wakax, eh mi nwuk'ej re' i kikik'eel i kok' imaas kaprax noq inakapaaj taq i hat? 14 Re' i mayiij inwaaj i hin, re' chi naa taq kinaloq'em, eh re' chi naa taq a'nam aq'orom taq weh i hin i Dios nim wajaawriik. 15 Kinaq'oreej taq awuuk' nik' ti' taq wilkaat, re' hin nee taq ti wesaj chupaam. Eh re' taq i hat nee taq i nayeew nuloq'il, inki Dios. 16 Eh re' Dios je' wili i ruq'or keh i yiib' wach kina'ojb'al: ¿Chib'ih reet noq inaq'or taq i nuk'uhb'aal, eh inaq'or taq rib'iral i xuk'ul nuk'ux? 17 Xa nah re' ma' ruk'ul ta taq ak'ux chi tinuq'il taq. Eh ma' nayeew ta wo' taq rajaawriik i nuq'oral. 18 Re' chik inche taqe i ajileq' inak'ul awuuk' panotob'il. Eh je' wo' taqe inkich'uwa'risaj wach i kikaxaro. 19 Re' taqe ma' holohik taj, re' taqe tz'aqaj wach q'orik, ra'j xti ma' nim k'ayeew ta noq i nelik taq cho ju' aawaaq' re'. 20 Re' taq i hat inakoj taq kimahk taqe aahermano. Eh ma' holohik taa taq ti q'orik chikiij i jinaj taq atuut awajaaw kuuk'. 21 Eh re' hin majaa' chih i nuq'or chi riij taqe re', inakapaaj naa taq i hat chi eliik wach nuna'ojb'al taq awuuk'. Yu'naak naa taq kaatnuq'ilim, naa taq nuq'orom aweh i k'ahchi' taq kaat re' re'. 22 Chab'iraj taq i nuq'or wili, taq i hat i xinsahchik taq panak'ux, ruum nee-oq taq tinuyeew panti' k'axik. Eh mo'-oq awach taq chik neenko'linik aweh. 23 Eh awach re' i nulooq'jiik i ruyeew chi jilow rumayiij, i ruyeew runimaal nuwach, eh i rub'an inwaaj, re' hin naa nuko'liniik reh, inki Dios.
