SALMOS 48

1Re' QaJaaw Dios xiik' naah nimaal wach. Xti ruk'ul chi naa rulooq'jiik chupaam i rutinamiit, je' wo' chinaah i rusantolaj yuuq' Sión. 2Re' yuuq' re' re' yohb'aal wach holwochiil i runajtiil naah, ar wilik pansak'aaj ree rookb'aal q'iij. Eh chu'nchel i tinamit ki ilwik reh insuuqb'ik kik'ux. Re' wo' re' i rutinamiit i qareey nim rajaawriik. 3Re' QaJaaw Dios ar wilik chupaam tinamit Jerusaleem, re' reh inko'linik reh i rutinamiit re' re'. 4Re' taqe reey wilkeeb' chupaam i ju'jun chi tinamit, xkimol cho kiib' chi peleto ruuk' i tinamit re' re'. 5Xa re' la' noq xkilow wach i tinamit Jerusaleem xsahchik kik'ux, xi kahnik meem, eh xkimol chi elik. 6Eh xchalik kib'arb'otiik ruum kiyo'jiik, xichoparik ruum jinaj ti' je' rukab' i ruti'kiil ixoq noq ink'ulik ruk'ux. 7Je' rukab' i kowlaj teew inchalik pareelb'aal q'iij xsachwik kiwach taqe i barco kichalik Tarsis. 8Eh parutinamiit i QaJaaw Dios, nim rajaawriik, qilom ruuk' naq'qawach, je' rukab' i kik'utjaam cho qeh. Chi re' Dios naa rukojom chi rutinamiit chi jumpech i Jerusaleem, eh chi naa ruko'leem. 9QaJaaw Dios, noq wilkooj chupaam i santo laj aapaat, ink'ulik cho panqak'ux chi re' hat q'e' naaketelaaj qawach. 10QaJaaw Dios, chu'nchel i tinamit sut i wach ak'al kiye'wik aloq'il. Eh inkiyeew runimaal wach aab'ihnaal ruum parub'ehel i na a'n i taaq'anik. 11Eh naa rusuuqb'iik kik'ux wilkeeb' chinaah i yuuq' Sión. Naa wo' kipisk'anik pankooq ruum rusuqkiil kik'ux taqe i aj Judá ruum rub'ehel i xayejaa' wach chi naa a'nam. 12Re' taq i hat cha sutej taq riij i ye'aab' Sión, chawajlaaj taq jarub' inajt naah tz'aq wilik reh. 13Eh chakoj taq rehtaal i tz'aq kotimaj wii' riij, je' wo' hoq i holohaq paat wilkeeb' chupaam. Reh chi nee taq inak'utjaaj keh awiih aamaam. 14Naa taq aq'orom rib'iral chi je' re' i xub'an i QaJaaw Dios. Eh chi re' reh i qaDios, chi juneliik. Re' wo' reh naa ruk'amwiik qab'eeh chi juneliik atoob' ta hoj chik kamnaq.

will be added

X\