1 Re' hin nujinaq i wánima chi holohaq laj q'orik, ruum aj re' naa nutz'uyem i wach i reey. Re' ju' waaq' xaraaj chik q'orik, je' rukab' i rutz'ihb'aal i winaq kow intz'ihb'anik. 2 Je' wili nuq'or ree reey panutz'uuy. Xa re' wo' hat i xiik' naah aholwochiil chikiwach taqe i winaq. Eh q'e' holohik taqe q'orik i nelik chaloq panachii'. Ruum aj re', re' QaJaaw Dios xatrukuxisaj chi juneliik. 3 Eh chayeew reje aq'as laj ch'ihch' nah atuuq, i hat kowlaj winaq. Ruum re' re' naa ruye'wiik runimaal awach, eh i naa ruye'wiik aloq'il. 4 Chayejaa' awiib' hiy chuko'ljiik riij i korik, i rub'ehel, naa wo' atoob'eem taqe i xama' nimaq ta kiwach. Eh ruuk' awajaawriik naa a'nam i peleto korehtaal inaq'at kiwach i aj ixowaal. 5 Re' hat reey naa a'nam keh i ki-ixowanik awach, korehtaal inik'ik chi juntar i kánima aq'as laj ch'ihch', re' chik i hat naa akahniik chi taaq'anik chinaah i kitinamiit. 6 QaJaaw Dios, re' awajaawriik naa ruwihiik chi taaq'anik reh juneliik, re' taaq'anik re' re' parukorkiil naa a'nam. 7 Re' hat re' i rub'ehel imponik chawach, eh re' yiib' wach inawixowaaj wach. Ruum aj re' xusik' chaawach aaDios. Eh xiik' nah i rusuqkiil ak'ux xuyeew chuwach i xuyeew keh awuch'ihil. 8 Re' aso' naa runujiik chi nk'ohnik laj i mirra, ink'ohnik laj canela. Eh naa kitz'uyem awach ruuk' k'ahaam wach q'ooj chupaam aapaat marfil ye'jamaj wii'. 9 Eh chupaam i paat naa awihiik wii' chi taaq'anik ar naa kiwihiik taqe i kixq'uun i reey. Eh panasak'aaj naa ruwihiik ixoq reey xoyimaj ruuk' i oro, re' ruuk' inchalik pan i ye'aab' Ofir. 10 Chab'iraj i naa nuq'orom aweh i hat rixq'uun i reey, chakoj rehtaal: Re' hat maakapaaj chik taqe reje awach aweh panapaat, je' wo' hoq aatinamiit. 11 Re' reey naa ruponiik chuwach aholwochiil. Re' chik i reh naa rehchaniik aweh, eh xa re' chik i reh naa animam. 12 Eh re' taqe holohaq xq'un aj Tiro, naa ruchaliik kisihim chib'ih aweh. Re' taqe i b'ehoom laj tinamit naa rusuuqb'iik kik'ux chawiij, naakisik'im awotob'il. 13 Wili ixoq reey naa rub'anam kaxáro ruuk' i reey yohb'aal wach holwochiil. Xoyimaj chi oro i ruso', rixq'uun jinaj chik i reey. 14 Re' reh xoyimaj ch'ikooj paam i ruso', noq naa ruk'amariik reje ruuk' i reey. Eh tahqalimaj reje kuum i kok' q'ahxoq ma' keht'al ta wach q'o'rinik winaq, kuch'ihil taqe i ki ajwanik wach. 15 Eh noq xi k'amarik reje, noq xi okik chupaam i holohik paat wilik wii' reey yohb'aal wach suuqb'ik kik'ux. 16 Re' hat qajaaw reey, re' chik taqe aawak'uun naa akojom chi taaq'anik. Eh naa wo' akojom taqe chi taaq'anik chikinaah chu'nchel i tinamit. 17 Eh ruuk' i tz'uuy xnub'an wili naa ruye'ariik runimaal wach kib'ihnaal jar ch'iht pa' chi k'achareel inaakik'iik. Reh chi re' taqe tinamit naakiye'em aloq'il chi juneliik.
