SALMOS 40

1Re' hin ruuk' q'unil xwuy-eej i rotob'il i QaJaaw Dios, korehtaal xirib'iraj. Eh xuyeew wo' weh i xnupahqaaj reh. 2Xiresaj cho chupaam runimaal ruti'kiil k'uxliis je' naa pan ch'uwa' xiresaj chaloq. Eh je' naa chinaah ab'aj xuyeew i wooq reh chi ma' nee ta chik kinsutinik chi wiij. 3Eh xuyeew weh i QaJaaw Dios chi tz'uuyjik jinaj i ak'laj tz'uuy loq'oomb'al reh. Re' wili ma' k'isiin naa kilwiik reh, ruuk' i re' naakiyohleem, eh naakiye'em kik'ux ruuk' i QaJaaw Dios. 4Atoob' reh awach i ruyeew ruk'ux ruuk' i QaJaaw Dios, ma' ruk'am ta naah inki a'n i yiib' wach kina'ojb'al. Eh ni xata ruloq'ej taqe i tiyoox. 5WaJaaw nuDios, ma' k'isiin i sahchb'al k'uxliis xa a'n quuk' ruuk' aawotob'il, xa eliik qoh akapaaj. Ma' awach ta chik jino'q neemb'anik i na a'n. Re' hin inwaaj naq nutusum wach chi ju'junaal taqe i na a'n, xa re' la' nee kinsahchik chuq'orariik. 6Re' hat ma' imponik ta chawach i mayiij, je' wo' i limóxna. Ma' nawaaj ta chi nk'atarik i chikop chi mayiij wach artaal. Xateh la' nuxikin reh chi xnureq chi riij. 7Re' hin je' wili i xnuq'or: QaJaaw Dios ayu' wilkiin chub'anariik, je' rukab' i ruq'or i tz'ihb'amaj cho chi wiij pan santo laj huuj. 8WaJaaw nuDios, re' hin imponik chi nuwach rub'anariik inawaaj i hat. Eh re' aak'uhb'aal wilik pan wánima chi juneliik. 9Re' hin xnuyeew chi naab'jik i rukorkiil wach ak'ux keh ruk'ihaal chi awak'uun awixq'uun. Re' hat aweht'al chi ma' nukanaam ta ruq'orariik rib'iral aaloq'il. 10Ma' nukanaam ta ruq'orariik i rukorkiil wach ak'ux, i nuq'or la' rib'iral chi q'e' hat atoob', eh chi hat aj Ko'loom. Je' re' noq ma' jank'al ta nukeb'aa' chikiwach i ruk'ihaal chi awak'uun awixq'uun i k'axooj i na a'n. 11QaJaaw Dios, maakanaa' ruketeljiik nuwach, nee ta la' naq kinako'leej chi juneliik ruuk' aak'axb'al, ruuk' i korik. 12Re' hin yohb'aal wach i ti' k'axik k'ahchi' nuk'ulum. K'ahchi' ruk'isimb'iik nuk'ux ruum taqe i numahk, je' nche k'ahchi' inche rupohyiik paam i naq'nuwach noq inwik'raaj. Xti xiik' naah i numahk, ma' xata je' k'ihaal i rismaal i nunaah, ma' xta chik rukowiil nuk'ux inwik'raaj. 13QaJaaw Dios, cha kuy kinako'leej tii. Eh kinatoob'eej chi jumehq'iil. 14Neeta naq kikahnik chi xase'lb'al chik taqe inkaaj nukanteesjiik. Neeta naq inkimol chi elik ruum kik'ixiik taqe i xa re' i yiib' wach na'ojb'al inkikapaaj chi wiij. 15Neeta naq inkimol chi elik ruum kik'ixiik taqe i kikaqse'lanik weh. 16Eh chu'nchel i kisik'wik aweh nee ta naq insuuqb'ik kik'ux. Re' taqe ki ajwanik reh i ko'lemb'al iib' i nayeew i hat, nee ta naq inkiq'or chi je' wili: nim wach i QaJaaw Dios, inko'q ta naq taqe. 17QaJaaw Dios, ro'q ta q'e' ketel nuwach, atoob' ta q'e' ti' nuk'ux, re' hat naa kiin akapaam ruum re' hat titoob'inik weh. Eh nee kinawesaj chupaam i ti' k'axik i hat nuDios.

will be added

X\