SALMOS 38

1QaJaaw Dios, ma' ta naq neekinaq'il ruuk' aajosq'iil. Eh ma' ta naq nee kinayeew chutojariik i numahk ruuk' aajosq'iil. 2Re' hin je' naa ruuk' flecha k'ahchi' a'nam ti' k'axik weh. Je' naa xayeew cho chi nunaah i rahliil aaq'ab'. 3Ruum taqe numahk xayeew aajosq'iil chi nunaah, ruum aj re' chu'nchel i nuti'jolal xiik' naah ti'kiil wilik. Eh re' taqe nub'aqil ma' suq ta wilkeeb'. 4Re' taqe nuyiib' wach na'ojb'al xumol riib' chi nunaah, xa je' chik rukab' ahl laj ihq xama' nukuy ta chik. 5Ruum i rutehkiil nuwach xooj chi nimaal i ruti'kiil nuk'ux je' rukab' noq inooj chi nimaal q'aah. 6Re' hin xa kink'utzik chik chu'nchel q'iij ma' xta rukowiil nuk'ux noq inwik'raaj. 7Ruum re' hin xa eliik je' tz'a' wiij, chu'nchel i nuti'jolal wilik ruyab'ilaal noq inwik'raaj. 8Xa t'aqlik chik i nuti'jolal, xama' xta chik waansil inwik'raaj. Eh inchalik woq'iim ruum i ruti'kiil i wánima. 9QaJaaw Dios, re' hat aweht'al chu'nchel i k'ahchi' nukapaam rub'aan. Eh pan saqum wilik chawach chu'nchel i k'ahchi' nupahqaam aweh. 10Re' wánima xa tenej chik riib' inwik'raaj. Xa ma' xta chik waansil. Eh re' naq'nuwach k'ahchi' rupohyiik paam inwik'raaj. 11Re' taqe i naah wamigo ruch'ihil taqe i ma' tokoom ta wuuk' ma' nkijil ta cho kiib' wuuk' ruum i nuti'kiil. 12Eh re' taqe inkaaj nukanteesjiik je' naankikoj nuxo'reel. Re' taqe inkaaj nujot'ariik ma' holohik ta kiq'orik chi wiij. Chu'nchel q'iij inkiyejaa' wach chib'ih i naa kianam weh. 13Xa re' la', re' hin xa je' ma' imb'iraj i nub'an wiib' chib'ih inkiq'or. Eh xa je' hin meem i nub'an wiib' xama' xta wo' i xnuq'or keh. 14Re' hin xa je' nukab' jino'q i ma' rib'iraj ta q'orik chi jumpech. Eh ma' nchol ta q'orik reh chi nee ta ruko'leej riib'. 15WaJaaw hat nuDios, inwuy-eej awotob'il, re' hat naa aye'wiik weh i nupahqaaj aweh. 16Eh xnuq'or chi ma' ta naq nee kinkikaqse'laaj, ma' ta naq nee kinq'ehb'ik panti' k'axik, reh chi ma' nee ta nsuuqb'ik kik'ux 17Xti korik noq xa k'isiin chik ma' kinq'ehb'ik pamahk, re' nuti'kiil ma' kirukanaa' ta jumehq'-oq. 18Yu'naak naa nupahqaam kuyb'al numahk, ruum q'e' ti' nuk'ux ruum taqe i nub'an. 19Re' taqe i ki-ixowanik nuwach kow inki a'n kiib', xi k'ihaaxb'ik, yohb'aal kiwach i ma' ki ajwanik ta nuwach chi xama' xta rub'ehel. 20Re' otob'il i nub'an yiib' wach na'ojb'al inkitoj riij weh. Eh q'e' inkixow nuwach ruum inkilow chi ma' nukanaa' ta rub'aan i holohik laj na'ojb'al. 21WaJaaw, hat nuDios, makinakanaa' chi wutkeel. Maa kinaq'eb' chi riij ak'ux. 22QaJaaw Dios, hat waj ko'loom, kinatoob'eej tii chi jumehq'iil.

will be added

X\