SALMOS 37

1Manchalik aajosq'iil kuum i yiib' wach kina'ojb'al, eh maawixowaaj kiwach i ma' holohik ta kib'anik. 2Ruum re' keh je' kiyok'arik ch'ahn naa rub'aan. Eh xa je' kichiqiik xaq ch'ahn na' ki-ohoq kuxoq. 3Re' hat ruuk' i QaJaaw Dios cha chop ak'ux, re' holohik cha a'n, korik-oq wach ak'ux, chi je' re' suq naa aak'achariik chupaam i ye'aab' wilkaat wii'. 4Eh cha k'ax i QaJaaw Dios chi korik, re' reh nee ruyeew aweh taqe inapahqaaj reh chu'nchel awánima. 5Chayeew pan q'ab' i QaJaaw Dios ak'achariik, eh cha ch'ikaa' ak'ux ruuk', re' reh neentoob'inik aweh. 6Re' reh nee rukanaa' chi xasaqum chik wach ana'ojb'al, xa je' chik rukab' i rusaqumaal i q'iij noq imponik kab'lajora. 7Maa k'er aachii' chuwach i QaJaaw Dios, chawuy-eej chi q'uun i rotob'il. Manchalik aajosq'iil ruuk' i nelik korik paruk'achariik, je' wo' ruuk' inyej-anik wach i yiib' wach chi b'anarik. 8Je' re' noq, cha kanaa' i josq'iil, ma' awach ak'ahej, ruum re' taqe re' xa ruman i ti' k'axik i ruk'am chaloq. 9Re' taqe i yiib' wach kina'ojb'al naa rusahchiik kiwach. Eh re' taqe i kichopom kik'ux ruuk' i QaJaaw Dios naakehchaam i ye'aab' q'orooj cho rib'iral keh. 10Re' taqe i yiib' wach kina'ojb'al ilook' insahchik kiwach, atoob' ta nee naq chik inooj asik' pan kiye'aab' ma' naa ta chik areqem taqe ar. 11Raaj taqe i xa kiloch'ik naakehchaam i ye'aab' q'orooj rib'iral keh. Eh naa kianam i rusuqkiil i wihik pansuqkiil k'uxliis. 12Re' i yiib' wach runa'ojb'al i ruyejaa' wach chi naa rub'anam reh i korik wach ruk'ux, eh xa ruqirich'eej chik naah i reeh chinaah. 13Re' QaJaaw Dios ruse'laaj i yiib' wach runa'ojb'al, ruum reht'al i reh chi ilook' inye'arik chutojariik i ru mahk. 14Re' taqe i yiib' wach kina'ojb'al inkesaj chaloq i kiq'aslaj ch'ihch', je' wo' kiflecha kantesb'al keh i k'axik wilkeeb', taqe i xama' nimaq ta kiwach ruch'ihil taqe i korik wach kik'ux. 15Xanaah re', xa re' wo' keh naa kikanteesjiik ruuk' i kiq'aslaj ch'ihch' eh re' kiflecha naa rutoqib'iik. 16Re' taqe korik wach kik'ux xa kok' taq tii chib'ih keh wilik, xa re' la' xiik' naah loq'il chuwach i kib'ehomal i yiib' wach kina'ojb'al. 17Ruum re' QaJaaw Dios naa ruye'em q'ab' chi naa rub'aan keh i yiib' wach kina'ojb'al. Eh re' taqe holohik kina'ojb'al naa rutoob'eem taqe. 18Re' QaJaaw Dios reht'al nik' najtiil naa kik'achariik i korik wach kik'ux. Eh re' kikooch naa ruye'ariik ma' naa ta rusahchiik wach. 19Re' keh ma' naa ta kik'uhtaam kik'ixb'ilaal na' chaloq i ti' k'axik. Eh na' chaloq i wi'jaleel xanaa wo' kianam kiwa' kihaa' chi manlik. 20Eh re' taqe i yiib' wach kina'ojb'al naakiqopiik je' rukab' i sohk'. Eh re' taqe i ki-ixowanik wach i QaJaaw Dios naa rusahchiik kiwach, je' rukab' noq sahchik wach isib'. 21Re' yiib' wach runa'ojb'al noq i rub'an rukemeel ma' ruyeew ta chik jilow. Raaj i korik wach ruk'ux reh i ruyeew jilow i rukemeel. 22Re' taqe irutoob'eej i QaJaaw Dios, naakehchaam i ye'aab' q'orooj cho rib'iral keh. Raaj taqe i ma' imponik ta chuwach i kina'ojb'al ma' naa ta kik'ulariik cho ar. 23Re' QaJaaw Dios ink'amwik rub'eeh i korik wach ruk'ux. Eh irutoob'eej chub'anariik imponik chuwach i reh. 24Re' korik wach ruk'ux atoob' ta neenq'ehb'ik panti' k'axik ma' q'ehb'ik ta naa rub'anam chi jumpech, ruum re' QaJaaw Dios naa ruksaniik reh. 25Re' hin xnub'an chaloq aak'uniil, yu'naak xin rijb'ik chik ma' jank'al ta inwilow i korik wach ruk'ux chi kanamaj ta ruum i Dios. Eh ma' jank'al ta inwilow taqe i riih rumaam chi pahqanik kiwa' chi' taq paat. 26Juneliik la' wilik i ketelenik wachiis ruuk', i ruyeew chi kemeel i chib'ih reh, eh re' taqe riih rumaam kitoob'jiik ruum i QaJaaw Dios. 27Chakanaa' rub'aan i yiib' wach na'ojb'al, re' chik i holohik cha a'n, chi je' re' neen wihik aak'achariik chi juneliik. 28Re' QaJaaw Dios imponik chuwach i korik. Eh re' taqe korik wach kik'ux ruuk' i reh ma' rukanaa' ta taqe. Eh re' taqe yiib' wach kina'ojb'al i rusach kiwach chi kiih chi kimaam. 29Re' taqe korik wach kik'ux naakehchaam i ye'aab' eh ar naa kik'achariik chi juneliik. 30Re' korik wach ruk'ux wilik runa'ojb'al ruuk' taqe chib'ih i ruq'or, eh re' wo' taqe rub'ehel i ruq'or. 31Ruum re' i ruk'uhb'aal i ruDios wilik cho paránima, ruum i re' ma' xta nq'ehb'ik wii'. 32Re' yiib' wach runa'ojb'al xak'ahchi' chutahariik i korik wach ruk'ux, eh i rusik' chi riij nik' wach noq naa rukansam. 33Xa re' la', re' QaJaaw Dios ma' naa ta ruye'em q'ab' chi naa rub'anam reh i korik wach ruk'ux, ma' naa ta wo' runimam na'kikoj ru mahk. 34Re' hat chayeew ak'ux ruuk' i QaJaaw Dios. Eh cha nimaj i ruk'uhb'aal, re' reh naa ruye'em awajaawriik chi naa awehchaam chi akooch i ye'aab'. Eh naa awilom na' sacharoq kiwach i aj mahk. 35Re' hin xwilow wo' naq i yiib' wach runa'ojb'al chi xa holohik chik i rub'an riib', xa je' naq chik rukab' i rax laj chee' chakaltee' wilik ar Líbano. 36Xa re' la', chik imb'anik reh xa xooj wo' hoq, xa xsacharik wo' wach, xnusik' naq chik ma' aha' ta chik xwilow wach. 37Chakoj rehtaal, i xa atoob', eh korik wach ruk'ux. Re' reh naa rilom wach i suq laj wihik. 38Re' taqe i yiib' wach kina'ojb'al i ma' kinimanik taj naa rusahchiik kiwach. Eh naa rusachariik kiwach kak'uun kixq'uun. 39Re' taqe korik wach kik'ux re' QaJaaw Dios inko'linik keh chupaam i ti' k'axik, re' wo' reh inye'wik rukowiil kik'ux. 40Re' QaJaaw Dios intoob'inik keh, reh chi ma' xta ki uchjik, i ruko'leej taqe pan kiq'ab' i yiib' wach kina'ojb'al, ruum ruuk' wo' reh xkisik' ko'lb'al kiib'.

will be added

X\