SALMOS 36

1Re' imb'anik reh i yiib' wach na'ojb'al, xa re' wo' re' wilik cho paránima, ma' rukapaaj taj chi yohljik iraaj i Dios. 2Re' reh iraaj chi naa ruye'ariik runimaal wach, ma' rukoj ta rehtaal chi yiib' wach i rub'an i ma' rukapaaj ta rukanab'jiik i mahk. 3Xa ma' holohik ta imb'anik, chukul q'orik, xukanaa' taqe rub'aan i holohik chi b'anarik, xukanaa' wo' rub'aan otob'il. 4Atoob' ta nah ruch'aht wilik, ar i ruyejaa' wach rub'aan i yiib' wach na'ojb'al. Ar choplik chupaam i yiib' wach b'eeh, ma' jaruuj ta rukanaa' rub'aan i ma' holohik taj. 5Raaj aak'axb'al i hat QaJaaw Dios imponik kopan taxaaj. Eh re' suq kiil k'uxliis i nayeew imponik ko aha' wilik cho wii' i suutz'. 6Re' rukorkiil wach ana'ojb'al, ma' xata je' najtiil naah i nimaq taq yuuq'. Eh re' taqe ruq'or aak'uhb'aal ma' xata je' chamiil paam i palaw. Jaaw re' wo' hat ticha'jinik keh, i winaq je' wo' taqe chikop. 7QaJaaw Dios, yohb'aal inche wach i ak'axb'al. Ruum xa awuuk' wo' hat inkisik' ko'lemb'al kiib' taqe awak'uun awixq'uun, ruuk' aaxiik' i namoheej taqe. 8Re' hat ti ye'wik cho keh chi manlik pan aloq'laj aa ye'aab' chu'nchel i ajwaal wach chi keh. Eh k'achlik rooq ha' i nayeew keh chi uuk'jik. 9Ruum xa re' wo' hat ti ye'wik reh i k'acharik, re' wo' hat tisaqumb'isanik paam i qakapeb'aal reh chi neenqareq i manlik saqum. 10QaJaaw Dios, juneliik ta naq nee naketelaaj kiwach i kieht'alinik awach. Eh re' i rub'ehel cha a'n kuuk' i korik wach kik'ux. 11Eh maayeew q'ab' chi nee kinkiyeq' pankooq i nimaq kiwach. Eh chi neenkian weh iraaj ma' raj b'anarik i yiib' wach kina'ojb'al. 12Re' hin weht'al chi re' taqe yiib' wach kina'ojb'al naa rub'aan keh. Naa rusachariik kiwach, eh ma' naa ta chik kiwuktiik chi jumpech.

will be added

X\