SALMOS 35

1QaJaaw Dios, kinatoob'eej, chaq'at kiwach i ki-ixowanik nuwach. Eh chak'ulb'ilej taqe i peleto inki a'n wuuk'. 2Je'-oq pulato ch'ihch' ko'lemb'al iib' awajaawriik. Eh je'-oq cha chop cha ch'ihch' reh chi nee kinako'leej. 3Chayeew weh awajaawriik je'-oq jino'q q'aslaj ch'ihch', reh chi nee kinako'leej pan kiq'ab' i ki-ixowanik nuwach. Eh cha q'or chi re' hat naa ako'liniik weh. 4Chi je' re', neenkimol chi elik ruum kik'ixiik taqe inkaaj nukanteesjiik. Eh nee wo' inkimol chi elik ruum kik'ixiik taqe inkaaj kiyojom nuk'ux. 5Neeta naq imb'aan keh ruum i ruánjel i QaJaaw Dios, je' rukab' imb'aan reh i rutuus ixiim noq inkutarik reje wulu' ruum i teew. 6Je' ta naq neenq'equmrik, je' ta naq neenkalb'eesjik i kib'eeh ruum i ruánjel i QaJaaw Dios. 7Ruum re' keh xkikoj nuxirob'aal, xkik'ot i chaamlaj jul reh chi nee kinq'ehb'ik chupaam, xanaah re' xama' xta wo' numahk. 8Eh nee ta naq insacharik kiwach chi ma' keht'al, xirob' kiyejaam, re' ta naq i keh neekiqajik chupaam. Eh re' ta naq i keh neekiq'ehb'ik chupaam i chaamlaj jul kik'otom. 9Chi je' re', ma' k'isiin ta neensuuqb'ik nuk'ux i hin, ruum neenwilow chi re' QaJaaw Dios neenko'linik weh. 10Eh chu'nchel i wánima neenuq'or chi je' wili: QaJaaw Dios ma' awach ta chi je' rukab' i hat ruum re' taqe ti' wilkeeb' xako'leej taqe pan kiq'ab' i kow kiib'. Xako'leej taqe i neb'aa' pan kiq'ab' inq'uchwik chib'ih keh, kinko'q. 11Wilik taqe yiib' wach kina'ojb'al kitz'aqwik numahk, kinkipech'uj, xanaah re' xama' xta wo' numahk. 12Re' hin i nub'an otob'il keh re' chik i yiib' wach inki a'n weh chi jilow, xa re' nkaaj chi inyoj nuk'ux. 13Eh noq xkian i yaab'ilaal xnukoj i nuq'eq' so' ruum ti' nuk'ux chikiij. Eh chu'nchel nuk'ux xnuk'ihpechej i nutiij chikiij chi ma' nub'anam ta nuwa' nuhaa'. 14Re' hin xtib'ik nuk'ux chikiij, je' taqe wamigo, je' taqe was nuchaaq' xnub'an keh. Nik' wach noq intib'ik nuk'ux chi riij i nutuut, je' re' i xnub'an kekeh, ma' xnukanaa' ta wo' naq i tiij chikiij. 15Eh noq xinq'ehb'ik panti' k'axik i hin, re' keh junokiik taqe chi nukaqse'ljiik, xa je' cho ma' weht'al kiwach xkian kiib'. Eh xkimol kiib' ma' inkikanaa' ta rub'aan weh i ti' k'axik. 16Xa ma' suq ta chik i nub'an kuum ruum xa kinkikaqse'laaj chik, xa nkiqirich'eej chik naah ikehruum i kijosq'iil chi nunaah. 17QaJaaw Dios, ¿Ko nik' chik najtiil naa nuk'ulum i ti' wili? Jaaw chako'leej tii wánima, chako'leej riij i nuk'achariik, pan kiq'ab' i je' taqe josq'laj kaq b'ahlam re' re' 18Chi je' re', neenuq'or rib'iral aawotob'il chikiwach i ruk'ihaal tinamiit inkimol kiib'. Eh neenuyeew aaloq'il xa aha' pantaq ruk'ihaal tinamit. 19Reh chi ma' nee ta kielik korik i ki-ixowanik nuwach chi xama' xtarub'ehel. Eh ni xata re' naq' kiwach nee nkimutz'muteej ruum i ma' nkaaj ta nuwach chi xama' xtarub'ehel. 20Eh ma' nkisik' taj i wihik pansuqkiil k'uxliis. Re' la' i yiib' wach inkiyejaa' wach chi jot'b'al keh tinamit ma' xtaj i yiib' wach k'ahchi' keeb'. 21Re' keh xa nkik'er chik kichii' chuq'orariik chi je' wili: Atoob' tii re' hoj xti xqilow ruuk' naq'qawach chib'ih i xub'an, inki taqe chi wiij. 22QaJaaw Dios, re' hat aweht'al chi ma' xta numahk. Maacanaa' chi je' re' inki a'n weh. Eh makinakanaa' chi wutkeel. 23Wajaaw hat nuDios, kinab'iraj tii, okeen chi wiij. Kinako'leej ruum re' hat aweht'al chi korik wach nuk'ux. 24Eh chaq'at q'orik chi nunaah ruuk' irub'ehel ruum re' hat korik wach ak'ux. Reh chi ma' nee ta kinkikaqse'laaj taqe i ki-ixowanik nuwach. 25Reh chi ma' nee ta nkiq'or chi je' wili: Xti je' aj wo' naq re' inqaaj chi naa ruk'ulum re', eh xti xqajot' chi manlik, ma' inko'q ta taqe. 26Ma' k'isiin la' neenchalik kik'ixiik taqe xasuq chik kik'ux noq k'ahchi' nuk'ulum i ti' k'axik. Eh ma' k'isiin wo' neenchalik kik'ixiik i xiik' naah i kajaawriik inki a'n kiib' chi nuwach i hin. 27Eh re' inkaaj chi naaweliik korik nee ta naq kitz'uyinik ruum rusuqkiil kik'ux, nee ta naq inkiq'or chi je' wili: Re' QaJaaw Dios nim rajaawriik, q'e' imponik chuwach chi suq naa ruwihiik i rumoso, inko'q ta naq taqe. 28Re' hin QaJaaw Dios, ruuk' nuchii' naa nuq'orom chi korik wach ak'ux. Eh chu'nchel q'iij naa kaat nuloq'em.

will be added

X\